Psalmowo 44 - Biblia alo Ŋɔŋlɔ Kɔkɔe La Le Eʋegbe Me 1913

Konyifafa le alesi Mawu nyã eƒe dukɔ la ɖa ta.

¹ Korax-viwo ƒe nufiameha na henɔ la.

² Mawu, míesee kple míaƒe to, mía fofowo ɖa xo na mí, le nusiwo nèwɔ le wo ŋɔli le blema la ŋuti.

³ Etsɔ wò asi nyã dukɔwo, ke woawo la èƒo woƒe aganu ɖe to; ègblẽ anyigbadzitɔwo, ke èna woawo keke la.

⁴ Elabena menye woawo ŋutɔ ƒe yi wotsɔ xɔ anyigba lae o, eye menye woawo ŋutɔ ƒe alɔe xɔ na wo o; ke boŋ wò nuɖusi kple wò alɔ kpakple wò ŋku me ƒe kekelie, elabena woƒe nu nyo ŋuwò.

⁵ Mawu, nye fia nènye, ɖo xɔnume ɖe Yakob!

⁶ Wòe míatsɔ aƒu míaƒe futɔwo anyii, eye wò ŋkɔ míatsɔ anyã avuzi le míaƒe ketɔwo dzii.

⁷ Elabena nyemele ŋu ɖom ɖe nye dati ŋu o, eye menye yie axɔ num o;

⁸ ke boŋ wòe xɔ mí tso míaƒe futɔwo si me, eye nèna ŋukpe lé míaƒe ketɔwo.

⁹ Míetsɔ Mawu le adegbe ƒomi ɖaa, eye míekafu wò ŋkɔ tegbee. Sela.

¹⁰ Ke ètsɔ mí ƒu gbe, ède ŋukpe mo na mí, eye mèho yi kple míaƒe aʋakɔwo o.

¹¹ Ena míede megbe le míaƒe futɔwo nu, eye míaƒe ketɔwo ha nu.

¹² Etsɔ mí na, ne woaɖu abe alẽwo ene, eye nèkaka mí ɖe dukɔwo dome.

¹³ Etsɔ wò dukɔ dzra ho kpɔtsɔe, eye medo asi loloe ɖe wo ŋu o.

¹⁴ Etsɔ mí wɔ vlodonu na míaƒe aƒelikawo kple alɔmeɖenu kpakple nu ɖikokoea na amesiwo ƒo xlã mi.

¹⁵ Etsɔ mí wɔ hameloe le dukɔwo dome kple ame, ne woɔʋuʋu ta ɖe eŋua le anyigbɔdzitɔwo dome.

¹⁶ Nye vlododo le ŋkunye me ŋkekeawo katã, eye ŋukpe, si le ŋunye le, nyẽ tsyɔm,

¹⁷ be manɔ vlodoamela kple fewuɖula ŋkɔ sem, eye manɔ futɔ kple hlɔ̃biala kpɔm kple ŋku.

¹⁸ Nusiawo katã va mía dzi, ke míeŋlɔ wò be o, eye míezu alakpatɔwo le wò nubabla la me o.

¹⁹ Míaƒe dzi mefe ɖa o, eye míaƒe afɔɖede mete ɖa le wò mɔ dzi o.

²⁰ Elabena èto mí nyanyanya le amegãxiwo nɔƒe, eye nètsɔ blukɔ tsiɖitsiɖi tsyɔ mía dzi.

²¹ Ɖe wònye ɖe míeŋlɔ mía Mawu ƒe ŋkɔ be, eye míeke míaƒe asiwo na mawu tutɔwo la,

²² enye ne mía Mawu madi egɔme oa? Elabena enya dzi me gogloeaƒe ke.

²³ Elabena tawò wole mía wum atraɖi ɖaa, eye wobua mí abe alẽ, siwo wu ge woala la ene.

²⁴ Nyɔ, Aƒetɔ! Nukaŋuti nèle alɔ̃ dɔm? Fɔ, eye megatsɔ mí ƒu gbe ɖika o!

²⁵ Nukaŋuti nèɣla wò ŋku me, eye nèŋlɔ míaƒe hiã kple míaƒe xaxa be?

²⁶ Elabena míaƒe luʋɔ bɔbɔ vaseɖe ke me ke, eye míaƒe ƒodo lé ɖe anyigba ŋu.

²⁷ Tso, naxɔ na mi, eye naɖe mí le wò amenuveve la ta!