Psalmowo 38 - Biblia alo Ŋɔŋlɔ Kɔkɔe La Le Eʋegbe Me 1913

Dawid la konyi le fukpekpe gãa ɖe te, eye wobia Mawu ƒe kpekpeɖeŋu.

¹ Dawid ƒe ha na ŋkuɖodzi.

² Yehowa, megaka mo nam le wò dɔmedzoe me o, eye megahe to nam le wò dziku me o!

³ Elabena wò aŋutrɔwo ɖo agu ɖe menye, eye wò asi te ɖe dzinye.

⁴ Agbagbeƒea ɖeke mele nye lãme o le wò dɔmedzoe la ta; ŋutilafaa ɖeke mele nye ƒuwo me o le nye nuvɔ̃ ta.

⁵ Elabena nye vodadawo gbɔ tanye, eye wole kpeyem ŋutɔ abe agba kpekpe ene.

⁶ Nye abiwo le ʋeʋẽm le tsi kplɔm yoo le nye bometsitsi ta.

⁷ Mexa gobaa, eye mebi ŋutɔ, meƒo ɖi le yiyim ŋkekeawo katã.

⁸ Elabena nye alime ʋu dzo hẽ, eye agbagbeƒea ɖeke mele nye lãme o.

⁹ Megbɔdzɔ, eye nye lãme gbã gudugudu, mele ɣli dom wu alesi dzata ɖea gbee.

¹⁰ Aƒetɔ, ŋkuwò me nye didiwo katã le, eye nye hũɖeɖewo meɣla ɖe wò o.

¹¹ Nye dzi le totrom, nye ŋusẽ gblẽm ɖi, eye nye ŋkuwo ƒe kekeli hã megale gbɔnye o.

¹² Nye ame lɔlɔ̃wo kple xɔ̃nyewo ƒo asa nam le nye fuwɔame la ta, eye nye ƒometɔwo tsi tre ɖe adzɔge.

¹³ Amesiwo le nye agbe yome dim la, tre mɔ̃ nam, amesiwo le nye dzɔgbevɔ̃e dim la, le nu ƒom le gbegblẽ ŋu, eye wole alakpadada ŋu bum ŋkekeawo katã.

¹⁴ Mele abe tokunɔ ene, nyemesea nu o, eye mele abe aɖetututɔ, si mekea eƒe nu o la ene.

¹⁵ Mele abe ŋutsu, si mesea nu o, eye nyakpenyaa ɖeke mele eƒe nu me o la ene.

¹⁶ Elabena wò Yehowa, sinu kpɔm mele, àtɔ nam, Aƒetɔ, nye Mawu!

¹⁷ Elabena mele gbɔgblɔm be, womegakpɔ dzidzɔ ɖe ŋunye o; eye esi ke ɖe le nye afɔ te la, wole adegbe ƒom ɖe ŋunye.

¹⁸ Nye anyidzedze gbɔ megɔdidi o, eye nye vevesesewo le ŋkunye me ɖaa.

¹⁹ Elabena meɖe nye vodadawo fia, eye metsi dzi le nye nuvɔ̃wo ta.

²⁰ Ke nye futɔwo le agbe, eye ŋusẽ le wo ŋu; amesiwo lé fum yakatsyɔ la, sɔ gbɔ.

²¹ Amesiwo tsɔ vɔ̃ ɖo nyuie teƒe nam la, lém ɖe ke me, le esi meti nyuie yome ta.

²² Yehowa, megagblẽm ɖi o, nye Mawu, meganɔ adzɔge tso gbɔnye o!

²³ Aƒetɔ, nye xɔname, netsɔ nakpe ɖe ŋunye!