Psalmowo 37 - Biblia alo Ŋɔŋlɔ Kɔkɔe La Le Eʋegbe Me 1913

Mawumavɔ̃lawo ƒe dzɔgbenyuie nagaɖia nu na wò o.

¹ Dawid tɔ. Ɖzi megaku wò le nu vlo wɔlawo ŋu o, eye megaʋã ŋu ɖe amesiwo wɔ nu tovo la ŋu o!

² Elabena woasi wo xoxoxo abe gbe ene, eye woayrɔ abe aŋgba ene.

³ Ɖo ŋu ɖe Yehowa ŋu, eye nawɔ nyuie! Nɔ anyigba dzi, eye naɖi anukware!

⁴ Yehowa ƒe nu nenyo ŋuwò, eye wòana nusi wò dzi di la wò.

⁵ Tsɔ wò mɔwo gblẽ ɖe Yehowa dzi, eye naɖo ŋu ɖe eŋu, ekema awɔe ade goe.

⁶ Ahe wò dzɔdzɔenyenye ɖe go abe kekeli ene, kple wò nya dzɔdzɔe ɖe go abe ŋɖɔkutsu ene.

⁷ Zi kpi na Yehowa kpoo, eye nakpɔ esinu! Dzi megaku wò ɖe amesi ƒe mɔwo dzea dzi nɛ, kple ŋutsu, si nye ayetɔ la ŋu o!

⁸ Wò dɔmedzoe nu nefa, eye nadzudzɔ dzikudodo; dzi megaku wò o, elabena nu vɔ̃ɖi ko nayi wɔwɔ ge!

⁹ Elabena woatsrɔ̃ ame vlowo, ke amesiwo kpɔa mɔ na Yehowa la, woanyi anyigba la dome.

¹⁰ Ekpɔtɔ vie ko ame vɔ̃ɖi la maganɔ anyi o, eye ne èɖe ŋku ɖe eleƒe la, màgakpɔe o.

¹¹ Ke eme ɖihiãwo enyi anyigba la dome, eye dzi adzɔ wo ɖe ŋutifafa gbogbo la ŋuti.

¹² Ame vɔ̃ɖi ɖoa vɔ̃ ɖe ame dzɔdzɔe la ŋu, eye wòɖua aɖukli ɖe eŋu.

¹³ Aƒetɔ la le ekom, elabena ekpɔ be, eƒe ŋkeke li gbɔna.

¹⁴ Ame vɔ̃ɖiwo di yi, eye wova woƒe da me, ne woaxlã hiãtɔwo kple ame dahewo ɖe anyi, eye woawu amesiwo ƒe zɔzɔme to mɔ ɖeka la.

¹⁵ Ke woƒe yi aƒo ɖe woawo ŋutɔ ƒe dzi, eye woƒe da aŋe.

¹⁶ Nu ʋee, si le ame dzɔdzɔewo si la, nyo wu ame vɔ̃ɖi geɖewo ƒe nu gbogboawo.

¹⁷ Elabena ame vɔ̃ɖiwo ƒe alɔ aŋe, ke Yehowa léa ame dzɔdzɔewo ɖe le.

¹⁸ Elabena Yehowa nya ame maɖifɔwo ƒe ŋkeke, eye woƒe domenyinu anɔ anyi tegbee.

¹⁹ Ŋu makpa wo le ŋkeke vɔ̃wo dzi o, eye woaɖi ƒo le dɔŋɔli.

²⁰ Elabena ame vɔ̃ɖiwo atsrɔ̃, eye Yehowa ƒe ketɔwo nu ayi abe lãnyiƒe ƒe atsyɔ̃ɖoɖo ene; wo nu ayi abe dzudzɔ ene.

²¹ Ame vɔ̃ɖi la doa nugbana, eye mexenɛ o; ke ame dzɔdzɔe la vea ame nu, eye wonae nu ame.

²² Elabena amesiwo wòyra la, woanyi anyigba la dome, ke woatsrɔ̃ amesiwo wòƒo fi de la.

²³ Yehowa lia ke ŋutsu ƒe afɔɖeɖe, nenye be, eƒe mɔwo dze eŋu.

²⁴ Ne edze anyi la, made baba ɖe anyi o, elabena Yehowa léa eƒe asi ɖe te.

²⁵ Meno ɖevime tsã, eye azɔ metsi, ke nyemekpɔ be, wogblẽ eme dzɔdzɔe ɖi, eye viawo ɖo abologbe kpɔ o.

²⁶ Evea ame nu ɣesiaɣi, eye wòdoa nugbana, eye viawo zua yayra.

²⁷ Tsri vɔ̃, eye nawɔ nyui, ekema ànɔ anyi tegbee.

²⁸ Elabena Yehowa laa nya dzɔdzɔe, eye megblẽa eƒe mawumemewo ɖi o; akpɔ wo ta tegbee, ke woatsrɔ̃ ame vɔ̃ɖiwo ƒe viwo.

²⁹ Ame dzɔdzɔewo anyi anyigba la dome, eye woanɔ edzi tegbee.

³⁰ Nunya le ame dzɔdzɔe la nu, eye eƒe aɖe gblɔa nya dzɔdzɔe.

³¹ Eƒe Mawu ƒe se la le eƒe dzi me, eye eƒe afɔɖeɖe meʋãna o.

³² Ame vɔ̃ɖi la ɖe xa di na ame dzɔdzɔe la, eye wòdi be, yeawui.

³³ Ke Yehowa megblẽe ɖe esi me o, eye ne wodrɔ̃ ʋɔnui la, mebua fɔe o.

³⁴ Kpɔ mɔ na Yehowa, eye nalé ŋku ɖe eƒe mɔwo ŋu, ekema ado wò ɖe dzi, ne nanyi anyigba la dome, eye ne woatsrɔ̃ ame vɔ̃ɖiwo la, àkpɔ eteƒe.

³⁵ Mekpɔ ame vɔ̃ɖia ɖe le ɖadzra ɖam, eye wòvu eɖokui ɖranyi abe ati dodo, si vu ke la ene.

³⁶ Mete eŋu yi, eye kpɔ ɖa, megali o; medii, eye nyemekpɔe o.

³⁷ Lé ŋku ɖe eme maɖifɔ la ŋu, eye nakpɔ ame dzɔdzɔe la ɖa, elabena dzidzimeviwo le ŋutifafame la si.

³⁸ Woatsrɔ̃ dzidalawo katã, eye woatsrɔ̃ ame vɔ̃ɖiwo ƒe dzidzimeviwo.

³⁹ Ke dzɔdzɔewo ƒe xɔname tso Yehowa gbɔ, eya nye sitsoƒe na wo le hiãɣi me.

⁴⁰ Yehowa dea wo dzi, eye wòɖea wo, eɖea wo tso ame vɔ̃ɖiwo si me, eye wòxɔna na wo, elabena wosinɛ tsona.