Psalmowo 26 - Biblia alo Ŋɔŋlɔ Kɔkɔe La Le Eʋegbe Me 1913

Kukuɖeɖe ɖe fɔmaɖimaɖi ta.

¹ Dawid tɔ. Tso afia nam, Yehowa, elabena fɔɖiɖi mele nye zɔzɔme ŋu o, eye meɖo ŋu ɖe Yehowa ŋu, nyemeʋã o!

² Yehowa, dom kpɔ, eye nadzro menye kpɔ, lólo nye ayikuwo kple nye dzi!

³ Elabena wò amenuveve le ŋkunye me, eye mezɔ le wò nyateƒe me.

⁴ Nyemebɔbɔ nɔ ame tovowo gbɔ o, eye nyemede afɔ gbedegblemimewo ƒe ha me o.

⁵ Melé fu ame vlowo ƒe takpekpe, eye mía kple ame vɔ̃ɖiwo míebɔbɔ nɔa ɖu o.

⁶ Meklɔ nye asi fɔmaɖitɔe, eye maƒo xlã wò vɔsamlekpui, Yehowa,

⁷ ahana kafukafuha naɖi, eye maxlẽ wò nukunuwo katã afia.

⁸ Yehowa, melɔ̃ wò aƒe nɔƒe kple teƒe, si wò bubu le.

⁹ Megade nye luʋɔ ɖa kpe ɖe nuvɔ̃wɔlawo ŋu o, kple nye agbe ɖa kpeɖe hlɔ̃mewo ŋu o;

¹⁰ amesiwo ŋukpenanuwo le asi ŋu na, eye zãnunana yɔ ɖusi na.

¹¹ Ke nyea mazɔ fɔmaɖitɔe; ɖem, eye nave nunye!

¹² Nye afɔ tsi tre ɖe teƒe gbadzaa. Makafu Yehowa le takpekpewo me.