Psalmowo 19 - Biblia alo Ŋɔŋlɔ Kɔkɔe La Le Eʋegbe Me 1913

Mawu ƒe ŋutikɔkɔe te eƒe dɔwɔwɔ kple nya me.

¹ Dawid ƒe ha na henɔ la.

² Dziƒowo le Mawu ƒe bubu xlẽm fia, eye dziŋgɔli le gbe ƒã ɖem eƒe asinuɖɔwɔwɔ.

³ Ŋkeke dea gbe asi na ŋkeke, eye zã toa nya na zã.

⁴ Gbe kple nuƒoƒoa ɖeke meli, si ƒe ɖiɖi womesena o.

⁵ Woƒe dzidzeka de anyigba blibo la dzi, eye woƒe nuƒoƒo de xexeame ƒe mlɔenu ke; etsɔ wo wɔ agbadɔ na ɣe.

⁶ Ɣe doa go tsoa eƒe xɔ me abe ŋugbetɔsrɔ̃ ene, ekpɔa dzidzɔ abe kalẽtɔ ene, be yealé eƒe mɔ.

⁷ Edzena ɖe dziƒo ƒe mlɔenu, eye wòtrɔna va eƒe mlɔenu, naneke meɣlana ɖe eƒe dzoxɔxɔ o.

⁸ Yehowa ƒe se de blibo, enana luʋɔ gbɔna ɖe eme; Yehowa ƒe ɖaseɖiɖi le eteƒe, enana bometsilawo dzaa nunya.

⁹ Yehowa ƒe ɖoɖowo dzɔ, wodoa dzidzɔ na dzi; Yehowa ƒe sewo dza, wonana ŋku dzi kɔna.

¹⁰ Yehowa vɔvɔ̃ dza, eye wònɔa anyi daa; Yehowa ƒe afiatsotsowo le eteƒe, wo katã wodzɔ.

¹¹ Wovena wu sika kple sika nyuitɔ geɖe, eye wovivina wu anyitsi kple anyiɖaɖa.

¹² Woawo wotsɔ fia mɔnu wò dɔla hã; fetu gã le wo me lelé ɖe asi me.

¹³ Ameka adze si dzidadawo? Tso nam le dzidada ɣaɣlawo me!

¹⁴ Dzra wò dɔla ɖo tso dadalawo si me, ne womagaɖu aƒetɔ ɖe nanye o! Ekema fɔɖiɖi mana ŋunye o, eye madza tso vodada gãwo me.

¹⁵ Nye numenyawo kple nye dzimesusuwo nedze ŋuwò, Yehowa, nye agakpe kple nye xɔnametɔ!