Psalmowo 124 - Biblia alo Ŋɔŋlɔ Kɔkɔe La Le Eʋegbe Me 1913

Mawu li kpli mi le hiãwo me.

¹ Dawid ƒe mɔzɔha. Israel negblɔ be: Ɖe menye Yehowa ye le mía dzi o,

² esime amegbetɔwo tso ɖe mía ŋu, ɖe menye Yehowa ye le mía dzi o la,

³ anye ne womi mi agbagbe, esime woƒe dɔmedzoe bi ɖe mía ŋu;

⁴ anye ne tɔ ɖe mí, eye tɔsisi si to míaƒe luʋɔ dzi;

⁵ anye ne tɔ dzeagbowo si to míaƒe luʋɔ dzi.

⁶ Woakafu Yehowa, be metsɔ mí wɔ adelã na woƒe aɖuwo o.

⁷ Míaƒe luʋɔ le abe xevi, si le mɔtrela ƒe mɔ̃ka me la ene; mɔ̃ka la lã, eye míawo míesi.

⁸ Míaƒe xɔname le Yehowa, dzikple anyigbawɔla, ƒe ŋkɔ me.