Psalmowo 118 - Biblia alo Ŋɔŋlɔ Kɔkɔe La Le Eʋegbe Me 1913

Ŋkekenyuieɖuha.

¹ Mida akpe na Yehowa, elabena eƒe dɔme nyo, eye eƒe amenuveve li tegbee!

² Israel negblɔ be: Eƒe amenuveve li tegbee!

³ Aron ƒe aƒe negblɔ be: Eƒe amenuveve li tegbee!

⁴ Amesiwo vɔ̃a Yehowa la, negblɔ be: Eƒe amenuveve li tegbee!

⁵ Meyɔ Yehowa le xaxa me, Yehowa tɔ nam hetsɔm ɖo teƒe keke.

⁶ Yehowa li kplim, nyemavɔ̃ o, nuka amegbetɔ awɔm?

⁷ Yehowa li kplim, enye xɔnametɔ nam, eye makpa nye ketɔwo ɖa kple ŋku.

⁸ Enyo be, woasi Yehowa atso, wu esi woaɖo dzi ɖe amegbetɔwo ŋu.

⁹ Enyo be, woasi Yehowa atso, wu esi woaɖo dzi ɖe amegãwo ŋu.

¹⁰ Dukɔwo katã ƒo kɔ ɖe ŋunye, Yehowa ƒe ŋkɔ dzi metsrɔ̃ wo ɖa le.

¹¹ Woƒo kɔ ɖe ŋunye, ẽ, woƒo kɔ ɖe ŋunye, Yehowa ƒe ŋkɔ dzi matsrɔ̃ wo da le.

¹² Woƒo kɔ ɖe ŋunye abe anyiwo ene, eye wotsi ahe aŋɔkadzo ene, Yehowa ƒe ŋkɔ dzi matsrɔ̃ wo ɖa le.

¹³ Enya tu asim, be madze anyi, ke Yehowa xɔ nam.

¹⁴ Nye ŋusẽ kple nye ha enye Yehowa, eye wònye nye xɔname.

¹⁵ Aseye kple dzidzɔɣli le didim le ame dzɔdzɔewo ƒe agbadɔwo me be: Yehowa ƒe nuɖusi wɔa kalẽ!

¹⁶ Yehowa ƒe nuɖusi ɖea dzi, Yehowa ƒe nuɖusi wɔa kalẽ!

¹⁷ Nyemaku o, ke boŋ mana agbe axlẽ Yehowa ƒe ɖówɔwɔwo afia.

¹⁸ Yehowa he to nam, gake medem asi na ku o.

¹⁹ Miʋu dzɔdzɔenyenyegbowo nam, ne mage ɖe eme ada akpe na Yehowa.

²⁰ Yehowa ƒe agboe nye esia, ame dzɔdzɔewoe age ɖe eme.

²¹ Meda akpe na wò, be nèɖo tom, eye nènye xɔnametɔ nam.

²² Kpe, si xɔtulawo gbe la, eyae trɔ zu dzogoedzikpe.

²³ Yehowa gbɔ esia tso, enye nukunu le míaƒe ŋkuwo me.

²⁴ Esia nye ŋkeke, si Yehowa wɔ, mina míatso aseye, eye míakpɔ dzidzɔ ɖe eŋu!

²⁵ Oo Yehowa, xɔ na mí, Yehowa, na wòadze edzi dzro!

²⁶ Woayra amesi gbɔna le Yehowa ƒe ŋkɔ dzi! Míeyra mi tso Yehowa ƒe me.

²⁷ Yehowa enye Mawu, eye wòklẽ na mí. Mibla ŋkekenyuie vɔsalãwo kple ka de vɔsamlekpui la ƒe dzowo ŋu!

²⁸ Nye Mawu nenye, mada akpe na wò; nye Mawu, mado wò ɖe dzi.

²⁹ Mida akpe na Yehowa, elabena eƒe dɔme nyo, eye eƒe amenuveve li tegbee!