Psalmowo 107 - Biblia alo Ŋɔŋlɔ Kɔkɔe La Le Eʋegbe Me 1913

AGBALẼ ATƆ̃LIA. Amesiwo yɔ Yehowa le hiã me, eye wòɖe wo la, ƒe akpedaha dzidzi.

¹ Mida akpe na Yehowa, elabena eƒe dɔme nyo, eye eƒe amenuveve li tegbee!

² Amesiwo Yehowa de la, negblɔ alea, amesiwo wòɖe le xaxa me,

³ eye wòƒo wo nu ƒu tso anyigbawo dzi, tso ɣedzeƒe kple ɣetoɖoƒe, tso anyiehe kple dziehe la!

⁴ Wotre mɔ le gbedzi kple gbedadaƒo, afisi mɔ mele o; eye womekpɔ du, si me woanɔ o.

⁵ Dɔ kple tsikɔ wu wo, nu te woƒe luʋɔ ŋu le wo me.

⁶ Tete wodo ɣli na Yehowa le woƒe hiã me; eɖe wo tso woƒe xaxa me

⁷ hekplɔ wo to mɔtata dzi, ne woayi du, si me woanɔ la me.

⁸ Woawo neda akpe na Yehowa le eƒe amenuveve kple eƒe nukunu, siwo wòwɔ na amegbetɔviwo la ta!

⁹ Elabena ena luʋɔ tsikɔwuwo ɖi kɔ, eye wòtsɔ nu nyui di ƒo na luʋɔ dɔwuiwo.

¹⁰ Wobɔbɔ nɔ viviti kple blukɔ tsiɖitsiɖi me, eye wobɔ pã wo ɖe hiã kple ga me.

¹¹ Elabena wosẽ to ɖe Mawu ƒe nyawo ŋu, eye wodo vlo dziƒoʋitɔ la ƒe adaŋudede,

¹² ale be wòtsɔ hiãkame bɔbɔ woƒe dzi ɖe anyi, womu ya, ke xɔnametɔa ɖeke meli ti.

¹³ Tete woɖo ɣli na Yehowa le woƒe hiã me, eye wòɖe wo tso woƒe xaxa me.

¹⁴ Eɖe wo tso viviti kple blukɔ tsiɖitsiɖi me, eye wòtso woƒe gawo.

¹⁵ Woawo neda akpe na Yehowa le eƒe amenuveve kple eƒe nukunu, siwo wòwɔ na amegbetɔviwo la ta!

¹⁶ Elabena egbã akɔbligbowo, eye wòfli ga yibɔ gametiwo.

¹⁷ Bometsilawo wonye, amesiwo kpe fu le woƒe dzidadawo kple woƒe vodadawo ta.

¹⁸ Nuɖuɖuwo katã nyɔ ŋu na woƒe luʋɔ, ale be woɖo ku ƒe agbo nu.

¹⁹ Tete wodo ɣli na Yehowa le woƒe hiã me, eye wòɖe wo tso woƒe xaxa me.

²⁰ Edo eƒe nya da wòyɔ dɔ wo, eye wòhe wo tso woƒe ʋe la me.

²¹ Woawo neda akpe na Yehowa le eƒe amenuveve kple eƒe nukunu, siwo wòwɔ na amegbetɔviwo la ta;

²² woawo nesa akpedavɔ, eye woatsɔ aseyetsotso axlẽ eƒe dɔwɔwɔwo afia!

²³ Wole ʋuwo me zɔ atsiaƒu dzi, eye wotsa asi le tɔ gãwo dzi.

²⁴ Wokpɔ Yehowa ƒe dɔwɔwɔwo kple eƒe nukunuwo le tɔ gɔme.

²⁵ Eƒo nu, eye ahomya tso hemli eƒe tsotsoewo.

²⁶ Woyi dzi hoo hedze abu me; woƒe luʋɔ lolo gbanaa le xaxa me.

²⁷ Wole totrom le ya nu, eye wole mumum ahe ahamula ene; eye woƒe nunyawo katã mele ɖeke me o.

²⁸ Tete wodo ɣli na Yehowa le woƒe hiã me, eye wòɖe wo tso woƒe xaxawo me.

²⁹ Ena ahom la dze anyi kpoo, eye eƒe tsitsotsoeawo ɖo ho to.

³⁰ Dzi dzɔ wo be, ɖoɖoe zi le wo nu, eye wòkplɔ wo ɖe ʋutɔkɔ ɖe woƒe didi nu.

³¹ Woada akpe na Yehowa le eƒe amenuveve kple eƒe nukunu, siwo wòwɔ na amegbetɔvlwo la ta;

³² woadoe ɖe dzi le dukɔ la ƒe takpekpe me, eye woakafui le ame tsitsiwo ƒe adaŋu me!

³³ Ewɔ tɔsisiwo wòzu gbegbe kple tsidzɔƒewo wozu kuɖinyigba,

³⁴ anyigba wɔnu zu dzeƒee le edzinɔlawo ƒe nu vɔ̃ɖi wɔwɔ ta.

³⁵ Etrɔ gbegbe wòzu tsi ta kple kuɖinyigba wòzu tsidzɔƒe.

³⁶ Etsɔ dɔwuitɔwo ɖo afima, ne woatso du, si me woanɔ;

³⁷ woaƒã nu ɖe agble me, woade weingblewo, eye woaŋe agble me nukuwo.

³⁸ Eyra wo, eye wodzi ɖe dzi ŋutɔ, eye meke woƒe lãwo dzi ɖe o.

³⁹ Wozu ʋee, eye dzɔgbevɔ̃e kple nuxaxa ƒe agba te wo ɖe anyi.

⁴⁰ Etrɔ vlododo kɔ ɖe ame ŋkutɔwo dzi, eye wòna wotra mɔ le gbegbe, afisi mɔa ɖeke mele o.

⁴¹ Ke ekɔ ame dahe ɖe dzi tso hiã me, eye wòwɔ eƒe ƒome abe lãha ene.

⁴² Dzime dzɔdzɔe tɔwo kpɔe, eye dzi dzɔ wo, eye vɔ̃ɖiwɔwɔwo katã miã nu.

⁴³ Amesi nye nunyala la, nelé ŋku ɖe esia ŋu, eye wòadze si Yehowa ƒe amenuveve!