Mateo 22 - Biblia alo Ŋɔŋlɔ Kɔkɔe La Le Eʋegbe Me 1913

Lododo le flavia ɖe ƒe srɔ̃ɖeŋkekenyuieɖuɖu ŋuti.

¹ Eye Yesu ɖo ŋu, eye wògaƒo nu na wo lelododowo me gblɔ bena:

² Dziƒofiaɖuƒe la ɖi fiãa ɖe, si wɔ srɔ̃ɖeŋkekenyuie na via,

³ eye wòdɔ eƒe dɔlawo, bena wòayi aɖayɔ amesiwo wokpe la, ava srɔɖeŋkekenyuieɖuƒee; ke womelɔ̃ bena, yewoava o.

⁴ Egadɔ dɔla bubuwo gblɔ bena: Migblɔ na amesiwo wokpe la bena: Kpɔ ɖa, medzra nye nuɖuɖu ɖo; wowu nye nyitsuwo kple lã damiwo, eye nuwo katã sɔ gbe; miva srɔ̃ɖeŋkekenyuieɖuƒe.

⁵ Ke womebui nɛ o, eye wodzo heyi, ame ɖeka yi eƒe abɔ me, eye ame bubu yi eƒe adzɔ do ge.

⁶ Eye mamleawo lé eƒe dɔlawo, wodo vlo wo, eye wowu wo.

⁷ Ke fia la do dɔmedzoe, eye wòdɔ eƒe aʋakɔwo, eye woyi ɖagblẽ nenem hlɔ̃dola mawo, eye wòtɔ dzo woƒe du.

⁸ Tete wògblɔ na eƒe dɔlawo bena: Srɔ̃ɖenuawo sɔ gbe; gake amesiwo wokpe lã, womedze o.

⁹ Eyaŋuti miyi mɔ dzeveewo dzi, eye amesiame, si ke míakpɔ la, miyɔe va srɔ̃ɖeŋkekenyuieɖuƒe.

¹⁰ Eye nenem dɔla mawo do go yi mɔwo dzi, eye woƒo amesiame, si wokpɔ la, nu ƒu, ame vɔ̃ɖiwo kple ame nyuiwo siaa, eye srɔ̃ɖeƒe la yɔ fũ kple kplɔ̃ŋutinɔlawo.

¹¹ Ke esi fia la va kplɔ̃ŋutinɔlawo kpɔ ge ɖa la, ekpɔ amea ɖe le afima, si medo srɔɖewu o;

¹² eye wògblɔ nɛ bena: Xɔ̃nye, aleke wɔ nèva afisia, eye medo srɔ̃ɖewu o mahã? Eye eƒe nu tsi te.

¹³ Tete fia la gblɔ na kplɔ̃ŋutisubɔlawo bena: Mibla afɔwo kple asiwo nɛ, eye mitsɔe ƒu gbe de viviti tsiɖitsiɖi la me, afima avifafa kple aɖukliɖuɖu lanɔ.

¹⁴ Elabena ame geɖewo nye amesiwo woyɔ; ke ame ʋeewo nye amesiwo wotia.

Nudzɔdzɔ na kaisaro.

¹⁵ Tete farisitɔwo yi, eye wode adaŋu alesi woawɔ, ne woatsɔ eya ŋutɔ ƒe nyagbɔgblɔ atre mɔ̃ nɛ alée.

¹⁶ Eye wodɔ woƒe nusrɔ̃lawo kple Herodiahawo ɖo ɖe legba gblɔ bena: Nufiala, míenye bena, nyateƒetɔ nènye, eye nèle Mawu ƒe mɔ fiãm le nyateƒe me, eye amea ɖeke ƒe nya meɖia wò o: elabena mèkpɔa amewo ƒe ŋku me o.

¹⁷ Eyaŋuti gblɔe na mi, nuka nèsusuna mahã? Woɖe mɔ bena, woadzɔ nu na kaisaro loo, womeɖe mɔ o mahã?

¹⁸ Ke esi Yesu dze si woƒe vɔ̃ɖinyenye la, egblɔ bena: Nukaŋuti miele teyem kpɔ? Alakpatɔwo!

¹⁹ Mifia nudzɔsika lam. Eye wotsɔ denario la va fiae.

²⁰ Yesu gblɔ na wo bena: Ameka ƒe nɔnɔme kple ŋɔŋlɔ enye esia mahã?

²¹ Wodo ŋu nɛ bena: Kaisaro tɔe. Tete wògblɔ na wo bena: Ekema mitsɔ nusi enye kaisaro tɔ la, na kaisaro, eye nusi enye Mawu tɔ la, na Mawu.

²² Eye esi wosee la, wotsiyaa, eye wogblẽe ɖi hedzo.

Ame kukuwo ƒe tsitretsitsi.

²³ Le ŋkeke ma dzi la zadukitɔ, siwo gblɔna bena, tsitretsitsi meli o la, va egbɔ, eye wobiae bena:

²⁴ Nufiala, Mose gblɔ bena, ne amea ɖe ku, eye viwo mele esi o la, nɔvia naɖe srɔ̃a, ne wòado ƒome ɖi na nɔvia.

²⁵ Azɔ nɔviŋutsu adre na mia dome, eye gbãtɔ, si ɖe srɔ̃ ta, ku, eye esi ƒomea ɖeke mele esi o la, egblẽ srɔ̃a ɖi na nɔvia;

²⁶ nenema ke evelia kple etɔ̃lia hã wowɔ, vaseɖe adrelia dzi.

²⁷ Wo katã megbe la nyɔnu la hã ku.

²⁸ Azɔ le tsitretsitsi la me ɖee, wo ame adre la dometɔ ka srɔ̃ woazu mahã? Elabena wo katã woɖee kpɔ.

²⁹ Eye Yesu ɖo ŋu gblɔ na wo bena: Mieda ƒu, elabena mienya ŋɔŋlɔawo kple Mawu ƒe ŋusẽ la o.

³⁰ Elabena le tsitretsitsi la me la womeɖea srɔ̃ o, eye womenana woɖea wo hã o; ke boŋ wole abe mawudɔlawo le dziƒo ene.

³¹ Ke le ame kukuwo ƒe tsitretsitsi gome la, ɖe miexlẽ nya, si Mawu gblɔ ɖi na mi bena:

³² „Nye enye Abraham ƒe Mawu, Isak ƒe Mawu kple Yakob ƒe Mawu“ la o mahã? Menye ame kukuwo ƒe Mawu wònye o, ke boŋ ame gbegbewo toe.

³³ Eye esi amehaawo see la, kuvia ɖo wo le eƒe nufiafia la ŋuti.

Se lolotɔ.

³⁴ Ke esi farisitɔwo se bena, ede ga nu na zadukitɔwo la, woƒo wo ɖokui nu ƒu ɖe afi ɖeka.

³⁵ Eye wo dome ame ɖeka, si nye sefiala la, biae hele etem kpo bena:

³⁶ Nufiala, se ka nye vevito le sea me mahã?

³⁷ Eye wògblɔ nɛ bena: „Lɔ̃ Aƒetɔ, wò Mawu, kple wò dzi blibo kple wò luʋɔ blibo kpakple wò tamesusu blibo.“

³⁸ Esia enye se gbãtɔ, si le vevie.

³⁹ Eye evelia, si ɖii la, enye bena: „Lɔ̃ hawòvi abe wò ŋutɔ ɖokuiwò ene.“

⁴⁰ Se blibo la katã kple nyagblɔɖilawo ku ɖe nenem se eve siawo ŋuti.

Kristo enye Dawid vi kple eƒe aƒetɔ.

⁴¹ Ke esi farisitɔwo ƒo ƒu la, Yesu bia wo bena:

⁴² Aleke miebuna le Kristo la ŋutii? Ameka vi wònyea? Woɖo ŋu nɛ bena: Dawid vie.

⁴³ Egblɔ na wo bena: Aleke gɔ̃ wo Dawid yɔe le gbɔgbɔ me be Aƒetɔ, esi wògblɔ bena:

⁴⁴ „Aƒetɔ la gblɔ na nye Aƒetɔ bena: Bɔbɔ nɔ anyi ɖe nye nuɖusi me, vaseɖe esime matsɔ wò ketɔwo aɖe wò afɔ te.“

⁴⁵ Azɔ ne Dawid yɔe be Aƒetɔ la, aleke wɔ wònye via mahã?

⁴⁶ Eye amea ɖeke mete ŋu ɖo nyaa ɖeke ŋu nɛ, alo do dzi gabia nyaa ɖee tso ŋkeke ma dzi heyina o.