Lododowo 31 - Biblia alo Ŋɔŋlɔ Kɔkɔe La Le Eʋegbe Me 1913

Dadaa ɖe ƒe mɔnufiafia fiaa ɖe.

¹ Fia Lemuel ƒe nyawo nye esi, nya, siwo dadaa ku ɖe to me nɛ:

² Oo vinye, oo nye dɔmevi, oo nye adzɔgbeɖeɖe ƒe vi!

³ Megatsɔ wò ŋusẽ na nyɔnuwo o kple wò zɔzɔme na nyɔnu fiagblèlawo o!

⁴ Lemuel, menye fiawo ƒe dɔ o, wein nono menye fiawo ƒe dɔ o, eye aha muame menye amegãwo ƒe dɔ o!

⁵ Ne magano aha aŋlɔ se la be, eye wòatrɔ gbo nya na hiãtɔwo katã o!

⁶ Ke boŋ mitsɔ aha muame na amesiwo do tsɔtsrɔ̃ ƒe etua nu kple wein na nuxala,

⁷ ne wòanoe, eye wòaŋlɔ eƒe ahedada be, eye eƒe ŋku nadzo le hiãkame dzi!

⁸ Ke wò nu de aɖetututɔwo nu kple ɖe dzɔgbevɔ̃etɔwo katã ƒe nye nu!

⁹ Ke wò nu natso efia ɖe eteƒe, eye nadrɔ̃ ʋɔnu na hiãtɔwo kple ame dahewo!

Nyɔnu nu dzeame wɔla ƒe kafukafu.

¹⁰ Amekae akpɔ nyɔnu zazɛ̃? Eƒe asime sẽ wu adzagba tɔ.

¹¹ Srɔ̃a ɖoa dzi ɖe eŋu, eye nuwo kpɔkpɔ mavee o.

¹² Ewɔa nyuie nɛ, eye menye vɔ̃ o, le eƒe agbe me ŋkekewo katã me.

¹³ Edia ɖetifu kple anazi, eye eƒe asiwo wɔa ɖɔ kple dzidzɔ.

¹⁴ Ele abe esiʋu ene, eye wòhea nuɖuɖu tso didiƒe vɛ.

¹⁵ Ne ŋu mekpɔ ke haɖe o la, efɔna, eye wònaa nuɖuɖu eƒemetɔwo kple eƒe dɔlanyɔnuwo tɔ gome wo.

¹⁶ Ebua la me le agble ŋu, eye wòƒlenɛ ka; eƒe asi ƒe kutsetse wòtsɔna ɖea weingblee.

¹⁷ Etsɔa ŋusẽ blaa ali dzii, eye wòdoa ŋusẽ eƒe alɔwo.

¹⁸ Edzea sii be, yeƒe asitsatsa nyo; eƒe akaɖi metsina le zã mee.

¹⁹ Edoa asi ɖa léa afi, si ŋu wodoa ɖetifu ɖo, eye eƒe asibiɖewo léa keke.

²⁰ Edoa eƒe asi ɖe hiãtɔwo, eye wòkea eƒe abɔ me na ame dahewo.

²¹ Mevɔna ɖe eƒe aƒe nu le vuvɔ ta o, elabena wotsyɔ kuntru dzi na eƒe aƒemetɔwo.

²² Elɔ̃a kuntruwo na eɖokui, aklala kple aɖahɛ nye eƒe avɔtata.

²³ Wonyaa srɔ̃a, ne eya kple anyigba dzi ame tsitsiwo wole ʋɔnuɖrɔ̃ƒe.

²⁴ Etɔa awutewui hedzrana, eye asitsalawo xɔa alidziblanuwo tsoa egbɔe.

²⁵ Ŋusẽ kple atsyɔ̃ nye eƒe ava, eye ŋkeke ɖia kokoe nɛ.

²⁶ Ekea eƒe nu kple nunya, eye nufiame fafɛwo le eƒe aɖe dzi.

²⁷ Eléa ŋku de nuwɔwɔwo ŋu le eƒe me, eye meɖua kuviabolo o.

²⁸ Viaŋutsuwo tsona heyranɛ; srɔ̃a kafunɛ be:

²⁹ „Nyɔnu zazɛ̃ geɖewo li; ke wòa èƒo wo katã ta!“

³⁰ Nyonyo le alakpae, eye tugbedzedze la, yae; nyɔnu, si vɔ̃a Yehowa le, ele be, woakafui.

³¹ Mitsɔ eƒe esi ƒe kutsetse nɛ, eye eƒe dɔwɔwɔwo akafui le dua me!