Lododowo 20 - Biblia alo Ŋɔŋlɔ Kɔkɔe La Le Eʋegbe Me 1913

Le nutsududu kple gidigidiwɔwɔ ŋuti.

¹ Fewuɖula enye wein, eye zidola enye aha muame, amesi wòmu la, madze nunya o.

² Ŋɔdzi, si le fia ŋu la, le abe dzata ƒe gbetete ene, amesi do adãe la, eto vo ɖe eya ŋutɔ ƒe agbe ŋu.

³ Bubu wònye na ame, ne wòƒo asa na dzre, ke amesiwo katã dea dzre aƒe la, bometsilawo wonye.

⁴ Kuviatɔ be, yemade agble le kele me o, eyata wòdia nu le nuŋeɣi doa kpoe.

⁵ Ŋutsu ƒe tameɖoɖo ɖe dzi me le abe tɔ goglo ene, ke nugɔmesela ɖunɛ.

⁶ Ame geɖewo doa go amesi kɔa mo ɖe wo; ke amesi ŋu woaɖo dzi ɖo la, afika woakpɔe le?

⁷ Ame dzɔdzɔe, si ƒe zɔzɔme ŋu fɔɖiɖi mele o la, eme anyo na viawo le emegbe.

⁸ Fia, si bɔbɔ nɔ ʋɔnudrɔ̃zikpui dzi la, ƒe ŋku dea vovo vɔ̃ɖiwɔwɔwo katã me.

⁹ Amekae ate ŋu agblɔ be: Melólo nye dzi wòkɔ, eye medza tso nye nuvɔ̃wo me?

¹⁰ Nudakpe eve ƒomevl kple nudotree eve ƒomevi la, ŋunyɔ woa kple eve la siaa wonye bia Yehowa.

¹¹ Ŋutsuvi ƒe nɔnɔme wotsɔna dzea sii be, eƒe nuwɔwɔ adza, eye wòato mɔ ɖeka loo.

¹² To senu kple ŋku kpɔnu la, Yehowa ye wɔ woa kple eve la siaa.

¹³ Megaɖikpi lɔ̃ alɔ̃dɔdɔ akpa, ne nada ahe o; wò ŋku netsi te, ekema abolo abɔ ɖe asiwò.

¹⁴ Nuƒlela be: „nua menyo o, menyo o;“ yi ke ne edzo la, ekafua eɖokui.

¹⁵ Sika kple adzagba geɖewo li; ke sidzedze ƒe nuyiwo la, nu veviwo wonye.

¹⁶ Ɖe avɔ le eŋu, elabena eƒu asi akɔ ɖe ame bubu nu, eye natsɔe aɖo awɔba ɖe ame tutɔ ta!

¹⁷ Alakpabolo vivi na ŋutsu la, ke emegbe kpekui anɔ nu me nɛ.

¹⁸ Tameɖoɖowo vaa eme, ne adaŋudede kpe ɖe eŋu; eyata tsa tamebubuwɔ aʋae.

¹⁹ Amesi nye sakplitɔ le yiyim la, nua go nya ɣaɣla; eyata megaɖe ha kple nu kpoli ƒola o.

²⁰ Amesi ado ɖiŋu na fofoa kple dada la, eƒe akaɖi atsi le blukɔ tsiɖitsiɖi me.

²¹ Domenyinu, si ŋu wotsi hohoho ɖo la, yayra manɔ me o.

²² Megegblɔ ha „maɖo vɔ teƒe“ o; dzɔ Yehowa sinu, eye wòakpe ɖe ŋuwò.

²³ Nudakpe eve ƒomevi enye ŋunyɔ na Yehowa: nuɖanu amehatɔ menyo o.

²⁴ Ŋutsu ƒe afɔɖeɖe tso Yehowa gbɔ, eye ɖe amegbetɔ se eƒe mɔ gɔmea?

²⁵ Mɔ̃ wònye na amegbetɔ, ne nya ge le enu be: „nua ŋu kɔ!“ emegbe hafi wòayi tame bu ge le adzɔgbeɖeɖe la ŋu.

²⁶ Fia nyanu ɖea vovo ame vɔ̃ɖiwo me, emegbe wònana wona luƒotasiaɖam toa wo dzii.

²⁷ Yehowa ƒe akaɖi enye amegbetɔ ƒe gbɔgbɔ, edzroa dɔme ƒe gogloaƒewo.

²⁸ Lɔlɔ̃ kple nyateƒe kpɔa fia ta, eye lɔlɔ̃ lẽa eƒe fiazikpui ɖe te.

²⁹ Ɖekakpuiwo ƒe atsyɔ̃ enye woƒe ŋusẽ, eye ta ɣi enye amegã ɖeɖiwo ƒe bubu.

³⁰ Ameƒoka ƒe abidede eme ŋu nyãa vɔ̃ ɖa, nenema enye ƒoƒo, si dea la me ke na ame hã.