Lododowo 12 - Biblia alo Ŋɔŋlɔ Kɔkɔe La Le Eʋegbe Me 1913

Nunyala kple bometsila ƒe ɖokuilele.

¹ Amesi lɔ̃a amehehe la, elɔ̃a sidzedze; ke amesi léa fu mokaname la, gbemelãe.

² Ame nyui ƒe nu nyoa Yehowa ŋu, ke ebua fɔ ayeme la.

³ Nu vɔ̃ɖi wɔwɔ mana amegbetɔ nali ɖi o; ke ame dzɔdzɔe ƒe ke maʋã o.

⁴ Nyɔnu zãzɛ enye fiakuku na srɔ̃a; ke nyɔnu ŋukpenanuwɔla enye ŋuɖui le eƒe ƒuwo me.

⁵ Ame dzɔdzɔewo ƒe tamesusuwo le eteƒe; ke ame vɔ̃ɖiwo ƒe adaŋudedewo nye alakpa.

⁶ Ame vɔ̃ɖiwo ƒe nya ɖea xa ɖe ameʋu ŋu; ke dzi me dzɔdzɔetɔwo ƒe nu ɖea wo.

⁷ Woatutu ame vɔ̃ɖiwo aƒu anyi, eye womaganɔ anyi o; ke ame dzɔdzɔe ƒe aƒe atsi anyi.

⁸ Ame ƒe nunya nue wokafunɛ ɖo, ke wodoa vlo amesi ƒe nya medzea to o.

⁹ Ame tsa, si si subɔla le la, nyo wu amesi le asi tɔm akɔ, gake abolokoe le ewɔm.

¹⁰ Ame dzɔdzɔe sea veve na eƒe lãwo ti; ke dzi kplala li na ame vɔ̃diwo.

¹¹ Amesi de eƒe agble la, akpa abolo fu; ke amesi le nu ƒuƒluwo yome dim la, tagbɔ meli nɛ o.

¹² Nu vlo wɔlawo ƒe aboyonu le ame vɔ̃ɖiwo dzrom; ke ame dzɔdzɔewo ƒe ke adze.

¹³ Nuyiwo ƒe ɖaɖaƒu enye mɔ̃ na vɔ̃ɖitɔ la; ke ame dzɔdzɔe sina le hiã nu.

¹⁴ Amegbetɔ ƒe nu ƒe kutsetse hea nyui vana nɛ taŋtaŋ, eye nusi ame ƒe asi wɔ la, eya gbugbɔna vana nɛ

¹⁵ Bometsila ƒe mɔ dzɔna le eya ŋutɔ ŋku me; ke nunyala doa to aɖaŋuɖoɖo.

¹⁶ Bometsila mesea dzikudodo o; ke amesi ɣlaa eƒe dzu la, nunyalae.

¹⁷ Amesi nu nyateƒe donu le la, gblɔa nusi le eteƒe; ke aʋatsoɖasefo daa alakpa.

¹⁸ Amea, ɖewo ƒe nuƒoƒo le abe yitɔame ene; ke nunyalawo ƒe aɖe daa gbe le ame ŋu.

¹⁹ Nyateƒenuyi anɔ anyi tegbee; ke alakpaɖe anɔ anyi aɖabaƒoƒo ɖeka ko.

²⁰ Alakpa le dzi me na amesiwo ɖo vɔ̃wɔwɔ; ke amesiwo ɖea adaŋu le ŋutifafa ŋu la, hea dzidzɔ vɛ.

²¹ Vɔ̃a ɖeke mekpe ame dzɔdzɔe o; ke ame vɔ̃ɖiwo la, dzɔgbevɔ̃ego wonye.

²² Alakpanuyiwo nye ŋunyɔ na Yehowa; ke amesiwo wɔa nuteƒe ƒe nu nyoa eŋu

²³ Nunyala mekɔa nu le eƒe sidzedze dzi o; ke bometsila ƒe dzi doa boblo eƒe bometsitsi.

²⁴ Veviedola ƒe asi aɖu fia; ke kuviatɔ adzɔ nu.

²⁵ Nuxaxa le dzi me tea ame ɖe anyi; ke xɔlɔ̃nya doa dzidzɔ na ame.

²⁶ Ame dzɔdzɔe tsaa ŋu na eƒe lãnyiƒe; ke ame vɔ̃ɖiwo ƒe mɔ kplɔa wo tranae.

²⁷ Kuviatɔ memea eƒe adelã o; ke veviedodo la nu xɔasi wònye na amegbetɔ.

²⁸ Agbe le dzɔdzɔenyenye ƒe mɔ dzi; ke mɔ dzeɖexɛ kplɔa ame yia ku mee.