Hezekiel 47 - Biblia alo Ŋɔŋlɔ Kɔkɔe La Le Eʋegbe Me 1913

Tsi, si do go tso gbedoxɔ la me.

¹ Eye wòkplɔm gbugbɔ yi xɔ la nu, eye kpɔ ɖa, tsi le dzidzim le xɔ la ƒe kpui te ɖo ta ɣedzeƒe gome; elabena xɔ la trɔ ŋgɔ dze ɣedzeƒe gome; eye tsi la si to xɔ la ƒe ɖusikpa dzi ɖo ta vɔsamlekpui la ƒe dzigbe gome.

² Emegbe wòkplɔm to anyiehegbo nu, eye megado mo va agbo kɔtoetɔ, si dze ŋgɔ ɣedzeƒe gome la nu; eye kpɔ ɖa, tsi la le dzidzim le ɖusikpa dzi.

³ Eye ŋutsu la do ɖo ta ɣedzeƒe gome helé dzidzeka ɖe asi; edzidze abɔklugui akpe ɖeka, eye wòkplɔm to tsi la me, tsi la va se afɔkɔe.

⁴ Edzidze abɔklugui akpe ɖeka, eye wòkplɔm to tsi la me, tsi la va se klotevi nu; eye wògadzidze abɔklugui akpe ɖeka hekplɔm to tsi la me, tsi la va se ali.

⁵ Emegbe wògadzidze abɔklugui akpe ɖeka, tɔsisi wònye, nyemete ŋu tsoe o, elabena tsi la goglo, ale be ɖeko woate ŋu aƒui, tɔsisi, si womate ŋu atso o la, wònye.

⁶ Eye wògblɔ nam bena: Amevi, èkpɔea? Tete wòkplɔm gbugbɔ to tɔsisi la ŋu.

⁷ Eye esi metrɔ la, kpɔ ɖa, ati geɖewo mie ɖe tɔsisi la ƒe goawo kple eve dzi fũ.

⁸ Tete wògblɔ nam bena: Tsi sia si to ɣedzeƒe nutowo me, esi to tagba heɖade nu atsiaƒu, si nye Dzeƒu la me, eye eƒe tsi atrɔ zu tsi nyui.

⁹ Afisiafi, si to la de la, nu gbagbe, siwo katã ʋãna, agba agbe, eye tɔmelãwo asɔ gbɔ fũ; afisiafi, si to la va la, tsi la atrɔ zu tsi nyui, eye nusianu, si gbɔ tɔ la de la, agbɔ agbe.

¹⁰ Ɖɔkplɔlawo anɔ eto tso En-Gedi vaseɖe En-Eglayim, eye ɖɔkplɔƒe wòazu; eme lãwo asa gbɔ kpaŋkpaŋ abe atsiaƒu gã me lãwo ene.

¹¹ Ke eƒe siiwo kple tawo matrɔ o, ke boŋ dze anɔ wo me.

¹² Ati tseku vovovowo amie ɖe tɔsisi la ƒe goawo kple eve dzi, woƒe aŋgbawo mayrɔ o, eye woƒe tsetsewo nu matso o; woatse ku yeye ɣleti sia ɣleti, elabena kɔkɔeƒe la woƒe tsi dzo tso; woƒe tsetse anye nuɖuɖu, eye woƒe aŋgbawo anye dɔyɔgbe.

Anyigba la ƒe liƒowo.

¹³ Ale Aƒetɔ Yehowa gblɔ esi: Liƒo, siwo me miamã anyigba la ɖo ɖe Israel ƒe to wuieveawo nu la enye si: Yosef nexɔ gome eve.

¹⁴ Amesiame nexɔe abe nɔvia ene, elabena mekɔ nye asi dzi ka atam be, matsɔe na mia fofowo, eye anyigba sia nanye miaƒe domenyinu.

¹⁵ Anyigba la ƒe liƒo le anyiehe gome ènye si: Tso atsiaƒu gã la nu to Xetlon vaseɖe Zedad,

¹⁶ Xamat, Berota, Sibrayim, si le Damasko ƒe liƒo kple Xamat ƒe liƒo dome, Xazer-Enon, si le Xauran ƒe liƒo dzi.

¹⁷ Ale liƒo la natso atsiaƒu nu vaseɖe Xazer-Enon le Damasko ƒe liƒo dzi, eye wòato anyiehe gome vaseɖe Xamat ƒe liƒo dzi; esia nye anyieheliƒo.

¹⁸ Ɣedzeƒe gome enye si: Yordan nanye liƒo le Xauran kple Damasko, Gilead kple Israel-nyigba dome; midzidzee tso liƒo kemea ŋu vaseɖe atsiaƒu la nu le ɣedzeƒe gome; esia nye ɣedzeƒekpa.

¹⁹ Dzieheliƒo natso Tamar vaseɖe dzrewɔtsi la nu le Kades, eye wòato tɔʋu la ŋu vaseɖe atsiaƒu gã la nu; esia nye dzieheliƒo.

²⁰ Atsiaƒu gã la nanye liƒo le ɣetoɖoƒe gome tso liƒo sia gbɔ vaseɖe Xamat kasa; esia nye ɣetoɖoƒeliƒo.

²¹ Eye mimã anyigba sia ɖe mia nɔeawo dome ɖe Israel ƒe toawo nu.

²² Ne miedzidze nu ɖe edzi, be wòanye miaƒe domenyinu la, mibu amedzro, siwo le mia dome, eye wodzi viwo ɖe mia dome la abe Israel-viwo ƒe aƒeviwo ene; woaxɔ domenyinu kpe ɖe mia ŋu ɖe Israel ƒe toawo dome.

²³ Eye to, si me amedzroa le la, afimae miana eƒe domenyinu: ɖo, Aƒetɔ Yehowa ye gblɔe!