Hezekiel 35 - Biblia alo Ŋɔŋlɔ Kɔkɔe La Le Eʋegbe Me 1913

Nyagblɔɖi le Edom ŋuti.

¹ Eye Yehowa ƒe gbe va nam bena:

² Amevi, trɔ mo de Seir-to la, eye nagblɔ nya ɖi ɖe eŋu

³ gblɔ nɛ bena: Ale Aƒetɔ Yehowa gblɔ esi: Seir-to, mele ƒoƒo ge ɖe dziwò, mado nye asi ɖa ɖe ŋuwo, eye matsɔ wò awɔ gbegbe kple aƒedoe.

⁴ Mado aƒe do wò duwo, eye wò ŋutɔ azu gbegbe, ne nadze sii be, nyee nye Yehowa.

⁵ Esi nèlé fu ame ɖikaɖika, eye nètsɔ Israel-viwo de asi na yi ie dzɔgbevɔ̃eɣi kple vodadawo ƒe nuwuwu la,

⁶ eyata ale Aƒetɔ Yehowa gblɔ esi: Meta ɖokuinye ƒe agbe: Ne nyematsɔ wò awɔ ʋui, eye ʋu nati yowòme o fi! Ʋuhlɔ̃e nèdo, eyata ʋu ati yowòme!

⁷ Matsɔ Seir-to la awɔ aƒedo kple gbegbee, eye matsrɔ̃ amesiwo vana kple amesiwo dzona la ɖa le edzi.

⁸ Matsɔ wò ame tsiaʋawo ayɔ wò towo dzii, eye amesiwo woda yii la, atsi wò togbɛwo dzi, wò baliwo me kple wò gbadzaƒewo katã.

⁹ Matsɔ wò awɔ gbegbee ɖikaa, eye wò duwo atsi anyi aƒedoe, ne miadze sii be, nyee nye Yehowa.

¹⁰ Esi nèle gbɔgblɔm be, dukɔ eve mawo kple anyigba eve mawo anye ye tɔ, eye yewoe axɔe wòanye yewo tɔ, evɔ wònye Yehowa nɔ afima kpɔ hafi la,

¹¹ eyata ale Aƒetɔ Yehowa gblɔ esi: Metà ɖokuinye ƒe agbe: Mawɔ nu kpli wò ɖe wò dɔmedzoe kple wò ŋuʋaʋã nu, abe alesi nele fu wo wɔ ene, eye maɖe ɖokuinye afia le wo dome, ne medrɔ̃ ʋɔnu wò.

¹² Eye nadze sii be, nye Yehowa mese wò ɖiŋudonya, siwo katã negblɔ ɖe Israel ƒe towo ŋu bena: „Wòzu gbegbe, miawoe wotsɔe na, be miaɖu.“

¹³ Mietsɔ miaƒe nuwo ƒo adegbe ɖe ŋunye, eye miedudu nya ƒo ɖi bababa ɖe ŋunye mese.

¹⁴ Ale Aƒetɔ Yehowa gblɔ esi: Matsɔ wò awɔ gbegbee, ne dzi nadzo anyigba blibo la.

¹⁵ Alesi nekpɔ dzidzɔ ɖe Israel ƒe aƒe la ƒe anyigba ŋu be, ezu gbegbe la, nenema ke mawo wòe; Seir-to kple Edom blibo la azu gbegbe, ne wòadze sii be, nyee nye Yehowa.