Hezekiel 30 - Biblia alo Ŋɔŋlɔ Kɔkɔe La Le Eʋegbe Me 1913

Nebukadnezar aŋe Egipte ƒe ŋusẽ nu, eye Mawu ado ŋusẽ Nebukadnezar.

¹ Eye Yehowa ƒe gbe va nam bena:

² Amevi, gblɔ nya ɖi gblɔ bena: Ale Aƒetɔ Yehowa gblɔ esi: Mixa nu be: Baba na ŋkeke la!

³ Elabena ŋkeke la gogo, Yehowa ƒe ŋkeke la tu aƒe, blukɔdogbe anye dukɔwo ƒe azã la.

⁴ Yi age ɖe Egipte, eye ŋɔdzi alé Kus, nenye be, amewo tsi aʋa le Egipte, wolɔ eƒe kesinɔnuwo dzoe, eye wogbã eƒe agunuwo.

⁵ Kus, Put, Lud kple dukɔ tsakatsakawo katã, Lub kple dzoɖuxɔlɔ̃wo ƒe viwo atsi yi nu akpe ɖe wo ŋu.

⁶ Ale Yehowa gblɔ esi; Egipte ƒe ziɔɖeŋu amũ, eye eƒe ŋusẽ ƒe adegbeƒoƒo ayi to; woatsi yi nu tso Migdol vaseɖe Siene, Aƒetɔ Yehowa ye gblɔe.

⁷ Woatsi gbegbe le anyigba, siwo wogblẽ la dome, eye eƒe duwo anɔ du gbagbãwo dome.

⁸ Eye wòadze sii be, nyee nye Yehowa, ne medo dzo ɖe Egipte, eye megbã eƒe xɔnametɔwo katã nyanyanya.

⁹ Gbemagbe la ame dɔdɔwo atso gbɔnye aɖo ʋuwo, ne woaɖado vɔ̃ɖi na Kus, si li bɔkɔɔ la, eye ŋɔdzi alé wo le Egipte ƒe ŋkeke la ta; elabena kpɔ ɖa, ele vava ge.

¹⁰ Ale Aƒetɔ Yehowa gblɔ esi: Matsi Egipte ƒe hoowɔwɔ nu to Babel-fia Nebukadnezar dzi.

¹¹ Woakplɔ eya kple eƒe dukɔ, si nye dukɔ sẽŋuta la vɛ, ne woagblẽ anyigba la, woadi woƒe yiwo ɖe Egipte ŋu, eye woatsɔ ame tsiaʋawo ayɔ anyigba dzi fũ.

¹² Mana tɔsisiwo naƒu kplakplakpla; matsɔ anyigba la adzra na ame vɔ̃ɖiwo, eye mana ame tutɔwo nagblẽ anyigba la kple edzi nuwo. Nye Yehowa ye ƒo nu!

¹³ Ale Aƒetɔ Yehowa gblɔ esi: Matsrɔ̃ legbawo, eye mana trɔ̃wo nu natso le Nof, amegãa ɖeke maganɔ Egipte-nyigba nu azɔ o, eye makaka ŋɔdzi ɖe Egipte-nyigba dzi.

¹⁴ Matsrɔ̃ Patros, matɔ dzo Zoan, eye mahe to na No;

¹⁵ matrɔ nye dziku akɔ ɖe Sin, si nye Egipte ƒe mɔ̃ sesẽ la dzi, eye matsi hoowɔwɔ nu le No.

¹⁶ Matɔ dzo Egipte: Sin alé ku ŋɔdzitɔe, woagbã No, eye woaxaxa Nof ɖo le ŋdɔkutsu dzatsɛ.

¹⁷ On kple Pibeset ƒe ɖekakpuiwo atsi yi nu, eye nyɔnuwo ayi aboyo me.

¹⁸ Ŋkeke ado viviti le Taxpanxes, ne meŋe Egipte ƒe atikplɔ, eye mena eƒe ŋusẽ ƒe adegbeƒoƒo nu tso; blukɔ atsyɔ eya ŋutɔ, eye woade aboyo eƒe duwo.

¹⁹ Eye mahe to na Egipte, ne wòadze sii be, nyee nye Yehowa.

²⁰ Le ƒe wuiɖekɛlia me, le dzinu gbãtɔ ƒe ŋkeke adrelia dzi la Yehowa ƒe gbe va nam bena:

²¹ Amevi, meŋe alɔ na Egipte-fia Farao, womablae, ne wòahaya o, eye womablae, ne ŋusẽ naɖo eŋu, ne wòalé yi o.

²² Eyata ale Aƒetɔ Yehowa gblɔ esi: Kpɔ ɖa, maƒo ɖe Egipte-fia Farao dzi, eye míaŋe eƒe alɔwo, nyuitɔ kple ŋeŋea, eye mana yi nage le esi.

²³ Makaka Egiptetɔwo ɖe dukɔwo dome, eye mahlẽ wo ɖe anyigbawo dzi.

²⁴ Maɖo ŋusẽ Babel-fia ƒe alo, eye matso nye yi ade asi nɛ; maŋe Farao ƒe alo, eye wòano ŋeŋem le eƒe ŋku me, abe alesi ame tsiaʋa ŋenae ene.

²⁵ Mado ŋusẽ Babel-fia ƒe alɔ, ke Farao ƒe alɔ aɖiɖi ɖe anyi, ne wòadze sii be, nyee nye Yehowa, ne metsɔ nye yi de asi na Babel-fia, be wòado ɖe Egipte-nyigba dzi.

²⁶ Makaka Egiptetɔwo ɖe dukɔwo dome, eye mahlẽ wo ɖe anyigbawo dzi, ne woadze sii be, nyee nye Yehowa.