Hezekiel 3 - Biblia alo Ŋɔŋlɔ Kɔkɔe La Le Eʋegbe Me 1913

Mawu tsɔ agbalẽ na nyagblɔɖila la, bena woaɖu.

¹ Eye wògblɔ nam bena: Amevi, ɖu nusi kpam nèle la! Ɖu agbalẽ sia, eye yi naɖaƒo nu kple Israel ƒe aƒe la.

² Tete meke nu, eye wotso agbalẽ la nam, be maɖu,

³ hegblɔ nam bena: Amevi, tso agbalẽ, si metsɔ na wò la, ɖi ƒoe, eye natsɔe ayɔ wò dɔgboe! Eye meɖui, wòviví le nu me nam abe anyitsi ene.

⁴ Tete wògblɔ nam bena: Amevi, yi Israel ƒe aƒe la gbɔ nagblɔ nye nyawo na wo.

⁵ Elabena menye dukɔ fiafialawo kple kɔkɔlawo gbɔ wole dɔwòm ɖo o, ke boŋ Israel ƒe aƒe la gbɔe;

⁶ eye menye dukɔ geɖe, siwo nye fiafialawo kple kɔkɔlawo, amesiwo ƒe gbe mèsena o la gbɔe mele dɔwòm ɖo o; eye ɖe wònye woawo gbɔe medɔ wò ɖo la, anye ne woaɖo to wò.

⁷ Ke Israel ƒe aƒe la mele to ɖo ge wò o, le esi wogbe toɖoɖom ta; elabena ŋgonu kplala kple dzi kuatri li na Israel ƒe aƒe blibo la.

⁸ Kpɔ ɖa, mana wò ŋku me nasẽ abe woƒe ŋku me ene, eye wò ŋgonu nanɔ kplala abe woƒe ŋgonu ene!

⁹ Mawɔ wò ŋku me wòase abe lotamekpe ene, eye wòalia wu ahliha; megavɔ̃ wo o, eye womegatso dzika ƒo na wò o, elabena ƒome sẽto wonye.

¹⁰ Eye wògblɔ nam bena: Amevi, lé nya, siwo katã gblɔ ge mala na wò la, ɖe wò dzi me, eye nase wo kple wò to.

¹¹ Yi aboyome, siwo nye mia ɖeviwo la gbɔ, eye naƒo nu kpli wo agblɔ na wo bena: „Ale Aƒetɔ Yehowa gblɔ esi“; wosee o, womeɖasee o!

Gbɔgbɔ la ko Xezekiel dzoe.

¹² Tete gbɔgbɔ la kɔnu eye mese hoowɔwɔ abe anyigbaʋuʋu gãa ɖe ene le megbenye, esime Yehowa ƒe ŋutikɔkɔe ho le eteƒe,

¹³ kple nu gbagbeawo ƒe aʋala, siwo le wo nɔewo kam ƒe ɖiɖi hekpe ɖe tasiaɖamfɔawo ƒe ɖiɖi kpakple anyigbaʋuʋu gãa ɖe ŋu.

¹⁴ Tete gbɔgbɔ la kɔm dzoe, eye melé nye mɔ tsɔ, dzi kum vevie, eye Yehowa ƒe asi nu sẽ ɖe dzinye.

¹⁵ Eye meva Tel-Abib le aboyome, siwo le Kebar-tɔsisi nu la gbɔ, eye menɔ wo dome le afima ŋkeke adre nu maƒomaƒoe.

Woɖo Xezekiel Israel ƒe aƒe ŋudzɔlae.

¹⁶ Eye le ŋkeke adre megbe la Yehowa ƒe gbe va nam bena:

¹⁷ Amevi, metsɔ wò ɖo dzɔla na Israel ƒe aƒe la be, ne èse nyaa ɖe tso nunye me la, naxlɔ̃ nu wo nam.

¹⁸ Ne megblɔ na ame vɔ̃ɖi be: „Ele kuku ge,“ eye mexlɔ̃ nui heƒo nu kplii be, ame vɔ̃ɖi la nakpɔ eɖokui dzi ɖe eƒe mo vɔ̃ɖiwo ŋu, ne woatsi agbe o la, ekema ame vɔ̃ɖi la aku le eƒe vodadawo ta; ke asiwò me mabia eƒe ʋu le.

¹⁹ Ke ne èxlɔ̃ nu ame vɔ̃ɖi, la, eye wogbe asiɖeɖe le eƒe vɔ̃ɖinyenye kple eƒe mɔ vɔwo ŋu la, ekema aku le eƒe vodadawo ta; ke wò la eɖe wò agbe.

²⁰ Ne ame dzɔdzɔe ɖe asi le eƒe nu dzɔdzɔe wɔwɔ ŋu hewɔ nu vɔ̃ɖi la, ekema maɖo nu nɛ, wòakli aku. Elabena esi mèxlɔ̃ nui o la, eyata woku le eƒe nuvɔ̃wo ta ɖo, eye womagaɖo ŋu eƒe nu dzɔdzɔe, siwo wòwɔ la o; ke asiwò me mabia eƒe ʋu le.

²¹ Ke ne èxlɔ̃ nu ame dzɔdzɔe la be, megawɔ nuvɔ̃ o, eye ame dzɔdzɔe la mewo nuvɔ̃ o, ke boŋ wòna woxlɔ̃ nui la, ekema atsi agbe; eye wò la eɖe wò agbe.

Nyagblɔɖila la gakpɔ Mawu ƒe ŋutikɔkɔe.

²² Eye Yehowa ƒe asi va dzinye le afima wògblɔ nam bena: Tso nayi bali la me, ne maƒo nu kpli wò le afima!

²³ Tete metso heyi bali la me, eye kpɔ ɖa, Yehowa ƒe ŋutikɔkɔe le tsitre ɖe afima abe ŋutikɔkɔe, si mekpɔ le Kebar-tɔsisi la nu ene, eye metsyɔ mo anyi.

²⁴ Eye gbagba la ɖo menye hefɔm ɖe te ɖe nye afɔwo dzi, eye wòƒo nu kplim gblɔ nam bena: Yi naɖatu ʋɔ ɖe ɖokuiwò nu le aƒewò me.

²⁵ Wò amevi, kpo ɖa, wole ka tsa ge aɖo ŋuwò ahabla wò, be magaɖo ayi wo dome o.

²⁶ Eye mana wò aɖe nalé ɖe aŋɔ me na wò kaɖii, ne wò aɖe natu, be magagblɔ tohenya na wo o; elabena ƒome sẽto wonye.

²⁷ Ke ne maƒo nu kpli wò la, maʋu nu na wò, eye nagblɔ na wo bena: „Ale Aƒetɔ Yehowa gblɔ esi.“ Amesi see la, nesee; amesi gbe la, negbe; elabena ƒome sẽto wonye.