Hezekiel 11 - Biblia alo Ŋɔŋlɔ Kɔkɔe La Le Eʋegbe Me 1913

Wohe to na Yuda ƒo amegãwo, eye wofa akɔ na aboyo me nɔlawo.

¹ Tete gbɔgbɔ la kɔm yi Yehowa ƒe aƒe ƒe ɣedzeƒe-gbo, si ɖo ta ɣedzeƒe gome la nu; kpɔ ɖa, ŋutsu blave vɔ atɔ̃ le agbo la nu, eye mekpɔ Yaazanya, Azur vi, kple Pelatya, Benaya vi, amesiwo nye dukɔ la ƒe amegãwo le wo dome.

² Eye wògblɔ nam bena: Amevi, ŋutsu siawo nye amesiwo le tame gbegblẽ ɖom, eye wole adaŋu vɔ̃ɖi ɖem le du sia me,

³ woawoe le gbɔgblɔm be: Xɔtutu gbɔ metsɔ o; du la nye kutu, eye míawoe nye lã.

⁴ Eyata gblɔ nya ɖi ɖe wo ŋu, amevi, gblɔ nya ɖi!

⁵ Tete Yehowa ƒe gbɔgbɔ va dzinye, eye wògblɔ nam bena: Gblɔ be: Ale Yehowa gblɔ esi: Israel ƒe aƒe, ale mieƒo nu enye si, eye nusi do tso dzi me na mi la, menyae.

⁶ Miedzi miaƒe ame kukuwo ɖe dzi le du sia me, eye mietsɔ ame kukuwo yɔ eƒe kpɔdomee taŋ.

⁷ Eyata ale Aƒetɔ Yehowa gblɔ esi: Miaƒe ame kuku, siwo mietsɔ da ɖe dua me la, woawoe nye lã, eye eyamae nye kutu; ke miawo la, woakplɔ mi adzoe le eme.

⁸ Yi vɔ̃m miele, ke yie mahe va mia dzi, Aƒetɔ Yehowa ye gblɔe!

⁹ Makplɔ mi adzoe le eme, matsɔ mi ade asi na ame tutɔwo, eye madrɔ̃ ʋɔnu mi.

¹⁰ Míatsi yi nu, eye madrɔ̃ ʋɔnu mi le Israel ƒe liƒo dzi, ne miadze sii be, nyee nye Yehowa.

¹¹ Dua manye kutu na mi, eye miawo mianye lã anɔ eme o, ke boŋ madrɔ̃ ʋɔnu mi le Israel ƒe liƒo dzi,

¹² ne miadze sii be, nyee nye Yehowa; elabena miezɔ ɖe nye ɖoɖowo nu o, eye miewɔ nu ɖe nye sewo nu o, ke boŋ miewɔ nu ɖe dukɔ, siwo ƒo xlã mi godoo la ƒe sewo nu.

¹³ Eye wòva me, esi mele nya gblɔm ɖi la, kasia Pelatya, Benaya vi la ku; tete matsyɔ mo anyi hedo ɣli sesĩe gblɔ bena: Alele, Aƒetɔ Yehowa, Israel ƒe ame mamleawo nèbe, yeatsrɔ̃a?

¹⁴ Tete Yehowa ƒe gbe va nam bena:

¹⁵ Amevi, nɔviwòwo, nɔviwò aboyomeawo kple Israel ƒe aƒe blibo la, wonye amesiwo ŋu Yerusalemtɔwo le gbɔgblɔm le be: Woamawo le adzɔge tso Yehowa gbɔ, míawoe wotsɔ anyigba la na, be wòanye mía tɔ.

¹⁶ Eyata gblɔ be: Ale Aƒetɔ Yehowa gblɔ esi: Meɖo mi ɖe dukɔwo dome ʋĩ, eye mekaka mi ɖe anyigbawo dzi, eye menye kɔkɔeƒe na mi vie le anyigba, siwo dzi mieyi.

¹⁷ Eyata gblɔ be: Ale Aƒetɔ Yehowa gblɔ esi: Maƒo mia nu ƒu tso dukɔwo dome, eye maƒo mia nu ƒu tso anyigba, siwo dzi miekaka ɖo la dzi ahatsɔ Israel-nyigba na mi.

¹⁸ Woayi afima, eye woaɖe eƒe legbawo katã kple eƒe ŋunyɔnuwo katã ɖa le edzi.

¹⁹ Mana dzi bubu wo, eye maɖe gbɔgbɔ yeye wo me, maɖe kpedzi le dɔ me na wo, eye mana lãkusidzi wo,

²⁰ ne woazɔ ɖe nye ɖoɖowo nu, eye woalé nye sewo me ɖe asi ahawɔ wo dzi, woanye dukɔ nam, eye manye Mawu na wo.

²¹ Ke amesiwo ƒe dzi dze woƒe legbawo kple woƒe ŋunyɔnuwo yome la, mahe woƒe zɔzɔme ava woƒe ta dzi, Aƒetɔ Yehowa ye gblɔe!

²² Tete Kerubiawo ƒo aʋala, eye tasiaɖamfɔawo kpe ɖe wo ŋu, eye Israel ƒe Mawu la ƒe ŋutikɔkɔe le wo ta me.

²³ Eye Yehowa ƒe ŋutikɔkɔe kɔ eɖokui dzi tso dua me heva no to, si le dua ƒe ɣedzeƒe la dzi.

²⁴ Eye gbɔgbɔ la kɔm le ŋutega me ɖada ɖe aboyomeawo gbɔ le Kaldea-nyigba dzi to Mawu ƒe gbɔgbɔ la me, eye ŋutega, si mekpɔ la, dzo le gbɔnye.

²⁵ Eye megblɔ Yehowa ƒe nya, siwo katã wòɖe fiãm la, na aboyomeawo.