Ɖelawo 3 - Biblia alo Ŋɔŋlɔ Kɔkɔe La Le Eʋegbe Me 1913

Israel subɔ ma wu bubuwo, eye wòge ɖe eƒe futɔwo si me, ke Otniel, Ehud kple Samgar ɖee.

¹ Esiawo nye dukɔ, siwo Yehowa kpɔtɔ ɖi be, wòatsɔ wo ado Israeltɔ, siwo katã mekpɔ Kanaan-ʋa teƒe o la akpɔ;

² ne Israel-viwo ƒe ƒome, siwo mekpɔ aʋa teƒe tsã o la, nadze aʋawɔwɔ

³ Woawo nye. Filistitɔwo ƒe amegã atɔ̃awo, Kanaanitɔwo katã, Zidontɔwo kple Xiwitɔwo, siwo nɔ Libanon-towo dzi tso Baal-Xermon vaseɖe Xamat.

⁴ Wotsi anyi, ne wòatsɔ aɖo Israel akpɔ, be woaɖo to Yehowa ƒe se, siwo wòde na wo fofowo to Mose dzi loo?

⁵ Eye Israel-viwo nɔ Kanaanitɔwo, Xititɔwo, Amoritɔwo, Perizitɔwo, Xiwitɔwo kple Yebusitɔwo dome.

⁶ Woɖe woƒe vinyɔnuwo, eye woawo hã tsɔ woƒe vinyɔnuwo na woƒe viŋutsuwo, eye wosubɔ woƒe mawuwo.

⁷ Eye Israel-viwo wɔ nusi medze Yehowa ŋu o, woŋlɔ Yehowa, woƒe Mawu la be, eye wosubɔ Baalwo kple Aserawo.

⁸ Eyata Yehowa do dɔmedzoe ɖe Israel ŋu, eye wotsɔ wo dzra na Mesopotamia-fia Kusan-Risatayim, eye Israel-viwo subɔ Kusan-Risatayim ƒe enyi sɔŋ.

⁹ Eye Israel-viwo ɖo ɣli yɔ Yehowa, tete Yehowa ɖo xɔnametɔ na Israel-viwo, Otniel, Kaleb ƒe tsɛ, Kenas ƒe vi, eye wòɖe wo.

¹⁰ Yehowa ƒe gbɔgbɔ dze edzi, eye wòdrɔ̃ ʋɔnu na Israel; eho aʋa, eye Yehowa tsɔ Mesopotamia-fia Kusan-Risatayim de asi nɛ, eye eƒe alɔ kpe Kusan-Risatayim dzi.

¹¹ Eye anyigba la dzi fa ƒe blane, vaseɖe esime Otniel, Kenas vi la ku.

¹² Ke esi Israel-viwo gade asi nusi medze Yehowa ŋu o wowɔ me la, Yehowa do ŋusẽ Moab-fia Eglon ɖe Israel-viwo ŋu, elabena wowɔ nusi medze Yehowa ŋu o.

¹³ Eye wòda Amon-viwo kple Amalekitɔwo kpe ɖe eɖokui ŋu, eye woho aʋa va si Israel, eye woxɔ devedu la.

¹⁴ Israel-viwo subɔ Moab-fia Eglon ƒe wuienyi sɔŋ.

¹⁵ Ke esi Israel-viwo do ɣli yɔ Yehowa la, Yehowa ɖo xɔnametɔ na wo, Ehud, ŋutsu miawɔla, si nye Benyamintɔ, Gera ƒe vi. Eye Israel-viwo tsɔ nudzɔdzɔ ɖe esi ɖo ɖe Moab-fia Eglon.

¹⁶ Eye Ehud tu adekpui nuevee, si didi asi ɖeka, eye wòtae ɖe ɖusiklito le eƒe awu ʋlaya te.

¹⁷ Eye wòtsɔ nudzɔdzɔ la ve na Moab-fia Eglon; Eglon enye ame lolo damia ɖe.

¹⁸ Esi wotsa nudzɔdzɔ la na vɔ la, ekplɔ amesiwo tso nudzɔdzɔ vɛ la, yi ɖaɖo ɖa;

¹⁹ ke etrɔ le legba, siwo le Gilgal la gbe va gblɔ bena: Fia, nya ɣaɣlaa ɖe le asinye na wò! Tete wògblɔ be: Ɖoɖoe nezi! Eye amesiwo katã tsi tre ɖe egbɔ la, do go.

²⁰ Eye Ehud yi egbɔ, esime wòle dziƒoxɔ, si me eya ɖeka nɔna xɔa ya la me. Ehud gblɔ ne bena: Mehe Mawu ƒe gbe vɛ na wò! Tete wòtsi tre tso eƒe zikpui la dzi.

²¹ Enumake Ehud do mia ɖa di adekpui la le ɖusiklito heƒo ɖe dɔme nɛ,

²² ale be atia ke hã bu ɖe me, eye ami nye tsyo adekpui la; mete ŋu ɖe adekpui la le dome nɛ o, elabena enu ɖo go ɖe megbe.

²³ Emegbe Ehud do go ɖe akpata me, eye woɖe ga dziƒoxɔ la ƒe ʋɔtru me ɖe enu.

²⁴ Esi wòdo go la, eƒe dolawo va, eye wokpɔ bena, dziƒoxɔ la ƒe ʋɔtruwo le dodo; eyata wobu be, afɔdzi ɖem wòanya le le yaxɔƒe la.

²⁵ Ke esi wolala ʋuu ɖokpoe meʋu ʋɔa o la, wotso safui va ʋu ʋɔ lae, eye kpɔ ɖa, woƒe amegã ku ɖe anyigba.

²⁶ Ke esi wole lalam nenema la, Ehud gbɔ legbawo ŋu, eye wòsi va Seira.

²⁷ Eye esi wògbɔ la, eku kpẽ le Efrayim-to dzi, tete Israel-viwo ɖi tso towo dzi va kpe ta ɖe eŋu, eye eya ŋutɔ dze wo ŋgɔ.

²⁸ Eye wògblɔ na wo bena: Mikplɔm ɖo kaba, elabena Yehowa tso miaƒe futɔ Moabitɔwo de asi na mi! Enumake wodze eyome heva xe Yordan-tsoƒemɔ na Moabitɔwo, eye womena amea ɖeke tso tɔ la o.

²⁹ Eye wowu Moabitɔwo anɔ ame akpe ewo ɣemaɣi, ŋutsu, siwo nye ame kakowo kple aʋamewo, eye ame ɖeka hɔ̃ hã mesi o.

³⁰ Ale Moabitɔwo ge ɖe Israel ƒe asi te ɣemaɣi, eye anyigba dzi la ƒe blanyi sɔŋ.

³¹ Eye Samgar, Anat vi, dze eyome, amesi tsɔ nyikplɔti wu Filistitɔ ame alafa ade, eye eya hã ɖe Israel.