5 Mose 18 - Biblia alo Ŋɔŋlɔ Kɔkɔe La Le Eʋegbe Me 1913

Afisi nunɔlawo nakpɔ woƒe nuɖuɖu tsoe.

¹ Lewi-to blibo la, si nye nunɔlawo la, maxɔ gome alo domenyinua ɖeke akpe ɖe Israel ŋu o, ke boŋ woatsɔ Yehowa ƒe dzovɔsa, si nye woƒe domenyinu la, anyro wo ɖokui.

² Womaxɔ domenyinua ɖeke ɖe wo nɔviwo dome o, elabena Yehowa ŋutɔe nye woƒe domenyinu, abe alesi wòdo ŋugbe na wo ene.

³ Nunɔlawo ƒe adzɔ enye si: Ne dukɔ la tsɔ nyi alo alẽ sa akpedavɔ la, ekema woatsɔ abɔ kple glã kpakple dɔgbo na nunɔlawo.

⁴ Natsɔ wò agblemenu, wò wein kple wò ami ŋgɔgbeawo kpakple wò alẽfu, si nètre koko la, ana wo.

⁵ Elabena Yehowa, wò Mawu, da wo tso wò toawo katã me, bena woawo kple wo viwo nasubɔ le Yehowa ƒe ŋkɔ me ɣesiaɣi.

⁶ Ne Lewitɔa ɖe tso Israel blibo la ƒe dua ɖe me, afisi wònye amedzro le, va la, ekpɔ mɔ ayi teƒe, si Yehowa atia la faa, abe alesi wòdi ene,

⁷ eye wòasubɔ le Yehowa, eƒe Mawu, ƒe ŋkɔ me abe nɔvia Lewitɔ bubuawo katã, amesiwo le Yehowa ŋku me afima la ene.

⁸ Eya hã naxɔ adzɔ ma kpli wo, negbe ƒomenu, si amea ɖe dzra la, koe mele eme o.

Woatsri dzosasa kple afakaka.

⁹ Ne èyi anyigba, si Yehowa, wò Mawu, le na wò ge dzi la, ekema megasrɔ̃ dukɔ mawo ƒe ŋunyɔnuwo nawɔ o.

¹⁰ Amea ɖeke megana dowòme, si ana woatɔ dzo viaŋutsu alo vianyɔnu o, eye bokɔnɔ, goloɖola, zidoedola kple dzotɔ,

¹¹ busudoamela, adzetɔ, nukata kple ŋɔliyɔlaa ɖeke meganɔ dowòme o

¹² Amesiame, si le nusia wɔm la, ŋunyɔnu wònye na Yehowa, elabena ŋunyɔnu siawo la Yehowa, wò Mawu, le wo nyã ge le ŋgɔwò ɖo.

¹³ Ku ɖe Yehowa, wò Mawu la ŋu blibo.

¹⁴ Elabena dukɔ, siwo nyã ge nala la, ɖoa to goloɖolawo kple bokɔnɔwo, ke wo la, Yehowa, wò Mawu, meɖe esia ƒe mɔ nɔ wò o.

Nyagblɔɖila vavã la ava.

¹⁵ Yehowa, wò Mawu, le nyagblɔɖila ɖe ɖo ge na wò tso nɔviwòwo dome abe nye ene, ame sia miaɖe toe!

¹⁶ Esi neɖe kuku na Yehowa, wò Mawu, le Xoreb gbɔ le takpegbe la gblɔ bena; nyemate ŋu agase Yehowa, nye Mawu, ƒe gbe o, eye nyemate ŋu agakpɔ dzo gã sia, ne maku o la.

¹⁷ Yehowa gblɔ nam be. Wògblɔe ɖe eteƒe.

¹⁸ Mele nyagblɔɖila ɖe ɖo ge na wo tso wo nɔviwo dome abe wò ene, eye wòagblɔ gbe, siwo katã meɖe asi nɛ la, na wo.

¹⁹ Amesi ke meɖo to nya, siwo wòagblɔ le nye ŋkɔ dzi o la, mabia tso ame la si.

²⁰ Ke ne nyagblɔɖilaa ɖe ɖo eɖokui ɖe dzi, eye wògblɔ nya, siwo nyemegblɔ nɛ o la, le nye ŋkɔ dzi, alo wògblɔ nya le mawu bubuwo ƒe ŋkɔ dzi la, woawu nyagblɔɖila ma.

²¹ Ne abu le wò dzi me bena: Aleke miate ŋu adze si nya, si Yehowa megblɔ o la?

²² Ne nyagblɔɖilaa ɖe gblɔ nya le Yehowa ƒe ŋkɔ dzi, gake nya la meva me o, eye medze edzi o la, ekema menye Yehowae gblɔ nya la o, ke boŋ nyagblɔɖila la ŋutɔe do eɖokui ɖe dzi hegblɔe; eyata megavɔ̃e o.