3 Mose 25 - Biblia alo Ŋɔŋlɔ Kɔkɔe La Le Eʋegbe Me 1913

Sabat-ƒe.

¹ Eye Yehowa ƒo nu kple Mose le Sinai-to la dzi bena:

² Ƒo nu kple Israel-viwo, eye nagblɔ na wo bena: Ne mieva anyigba, si matsɔ na mi dzi la, ekema anyigba la nagbɔ ɖe me na Yehowa.

³ Ƒe ade naƒã nu ɖe wò agble me, eye ƒe ade naɖe wò weinkawo ŋu, eye naƒo agblemenuwo nu ƒu.

⁴ Ke le ƒe adrelia me la anyigba la nagbɔ ɖe me na Yehowa, ma ƒã nu ɖe wò agble me o, eye màɖe wò weinkawo ŋu hã o.

⁵ Maŋe nusiwo mie ɖe flu me o, eye màxa weintsetse le weinka, siwo ŋu meɖe o la dzi o; ke boŋ anyigba la nagbɔ ɖe me le ƒe la me.

⁶ Gake miaɖu nuku, siwo miede edzi le anyigba ƒe gbɔɖemeɣi la me la, wò ŋuta, wò kluvi kple wò kosi, wò agbatedɔwɔla kple amedzro, si le gbɔwò,

⁷ wò lã kple gbemelã, si le wò anyigba dzi; agblemenuawo katã nazu nuɖuɖu.

Aseyetsoƒe ŋu nya.

⁸ Eye naxlẽ dzudzɔƒe adre; ƒe adre teƒe adre naxlẽ, ale bena dzudzɔƒe adre la nade ƒe blane vɔ asieke.

⁹ Le ɣleti adrelia ƒe ŋkeke ewolia dzi woaku kpẽ atsae; le avulégbe la dzi woaku kpẽ atsa le miaƒe anyigba blibo la dzi.

¹⁰ Miakɔ ƒe blaatɔ̃lia ŋu, eye miaɖe gbe ƒã ablɔɖe le anyigba la dzi na anyigbadzitɔwo katã; aseyetsoƒe wòanye na mi, eye amesiame nagaxɔ eƒe nuwo, eye amesiame nagagbugbɔ ayi eƒe ƒometɔwo gbe.

¹¹ Ƒe blaatɔ̃lia nanye aseyetsoƒe na mi, miaƒã nu o, eye míaŋe nusiwo mie ɖe flu me o, eye miaxa weintsetse le weinka, siwo ŋu mieɖe o la dzi o.

¹² Aseyetsoƒe wònye, eye eŋu nakɔ na mi; ke miekpɔ mɔ aɖu agblemenuawo.

¹³ Le aseyetsoƒe sia me amesiame nagaxɔ eƒe nuwo.

¹⁴ Ne èdzra nu na nɔviwò, alo nèƒle nu le noviwò si la, ekema migatafa mia nɔewo o.

¹⁵ Aseyetsoƒe la ŋu naƒle nu le nɔviwò si ɖo, eye ƒe alesi nu naŋe nu la, ŋu wòadzrae na wò ɖo.

¹⁶ Ƒe geɖe kple eƒe asi gã, eye ƒe ʋee kple eƒe asi bɔbɔe, elabena nuŋeɣiwo nu wòadzrae na wò ɖo.

¹⁷ Migatafa mia nɔewo o, ke boŋ navɔ̃ wò Mawu la; elabena nyee nye Yehowa, mia Mawu.

¹⁸ Mi wo nye ɖoɖoawo kple nye seawo dzi. Ne mielé ŋku ɖe wo ŋu, eye miewɔ wo dzi la, ekema mianɔ dedie le anyigba la dzi;

¹⁹ anyigba la awɔ nu, eye miakpɔ nu geɖe aɖu, eye mianɔ edzi dedie.

²⁰ Ke ne miagblɔ be: Nuka ɖu ge míala le ƒe adrelia me, elabena miele nu ƒã ge o, eye miele miaƒe agblemenuwo hã ƒo ge ƒu o la,

²¹ mayra ɖe mia dzi le ƒe adelia me ale gbegbe be, miaƒe agblemenuwo nade ƒe etɔ̃ nu.

²² Ne míeƒã nu le ƒe enyilia me la, ekema mianɔ agblemenu xoxoawo ɖum ahade asi na ƒe asiekelia; nu xoxoawo miana ɖu-ɖum hafi agaŋe nu.

²³ Womadzra anyigba wòatsi ame si ɖaa o, elabena tanyee nye anyigba la, eye miawo míenye amedzrowo kple gbɔnye mewo.

Alesi woagbugbɔ ƒle nu dzadzrawo.

²⁴ Eyata woagagbugbɔ anyigba axɔ le miaƒe anyigba blibo la dzi.

²⁵ Ne nɔviwò ɖo ko, eye wòtsɔ eƒe nu dzra, eye eƒe ƒometɔ va, be wòagaxɔ nua la, ekema wòagaxɔ nusi nɔvia tso dzra la.

²⁶ Ke ne exɔla mele ame la si o, gake eya ŋuta kpo nu wòsɔ gbɔ, ale bena woate ŋu axa eƒe nua la,

²⁷ ekema wòabu ƒe alesi nu wòdzra nu la, eye wòaxe fe kpɔtɔe na amesi wòdzra nu la na, eye wòagaxɔ eƒe nu la.

²⁸ Gake ne mekpɔ nu wòde, alesi wòana nu o la, ekema nua natsi eƒlela gbɔ, vaseɖe esime aseyetsoƒe naɖo. Le aseyetsoƒea dzi la nu la ŋu vo, eye wòagaxɔ eƒe nu.

²⁹ Ne amea ɖe dzra aƒea ɖe le ɖu, si ŋu woɖo gli ɖo me la, ekema ekpɔ mɔ agaxɔe vaseɖe ƒe, si me wòdzrae la, ƒe nuwuwu; ƒe ma me ko woate ŋu agaxɔe.

³⁰ Ke ne ƒe ɖeka la de, eye womexɔe o la, ekema aƒe, si le du, si ŋu woɖo gli ɖo me la, nazu eƒlela tɔ ɖikaa hena eƒe dzidzimeviwo, eye womaɖe asi le eŋu le aseyetsoƒe la dzi o.

³¹ Ne womeɖo gli ɖe kɔƒea ɖe ŋu o la, ekema wòabu aƒe kple agbledenyigba katã ɖekae. Woate ŋu agaxɔe, eye woaɖe asi le eŋu le aseyetsoƒe la dzi.

³² Ke Lewitɔwo kpɔ mɔ axɔ aƒe, siwo le woƒe duwo me, le woƒe anyigba dzi la, ɣesiaɣi.

³³ Ke ne Lewitɔa ɖeke mexɔe o la, ekema woaɖe asi le aƒe, si wodzra le woawo ŋutɔ ƒe du me la, ŋuti le aseyetsoƒe la dzi; elabena Lewitɔwo ƒe duwo nye woawo ŋutɔ tɔ le Israel-viwo dome.

³⁴ Ke womadzra gbeɖuƒe, siwo le woƒe duwo ŋu la o; elabena woawo ŋutɔ tɔ wonye ɖikaa.

Wogbe kasaɖiɖi kple anyrawɔwɔ le dɔlawo ŋu.

³⁵ Ne nu vɔ le nɔviwò si, eye wòdo ko la, ekema kpe ɖe eŋu, eye naxɔe abe amedzro alo gbɔwò me ene, bena wòanɔ agbe le gbɔwò.

³⁶ Megabia deme le esi o, eye megaɖi kasae o, bena nɔviwò nanɔ agbe le gbɔwò.

³⁷ Megado ga ne ɖe deme dzi o, eye: ne etsɔ nuɖuɖu ne la, megabia xɔɖedzi o.

³⁸ Nyee nye Yehowa, mia Mawu, si kplɔ mi tso Egipte-nyigba dzi, bena matsɔ Kanaan-nyigba na mi, eye manye miaƒe Mawu.

³⁹ Ne nɔviwò ɖo ko, eye wòtsɔ eɖokui dzra na wò la, ekema megaɖe kluvidɔ asi ne o.

⁴⁰ Nenɔ gbɔwò abe agbatedɔwɔla kple gbɔwò me ene, eye wòasubɔ wò vaseɖe aseyetsoƒe la dzi.

⁴¹ Emegbe woadzo le gbɔwò, eya ŋutɔ kple viawo siaa, eye wòagagbugbɔ va eƒe ƒometɔwo gbɔ, eye woaxɔ fofoawo ƒe domenyinu wo.

⁴² Nye dɔlawo wonye, amesiwo mekplɔ tso Egipte-nyigba dzi; womadzra wo, abe alesi wodzra kluviwo ene o.

⁴³ Megaɖu edzi kple sesẽ o, ke boŋ nayɔ wò Mawu la.

⁴⁴ Ke ne edi be, kluvi kple kosivi nanɔ asiwò la, ekema èkpɔ mɔ aƒle wo tso dukɔ, siwo ƒo xlã mi la dome.

⁴⁵ Miekpɔ mo aƒle amedzro, siwo le mia dome la ƒe viwo kple woƒe dzidzimevi, siwo wodzi ɖe miaƒe anyigba dzi, eye wole mia dome la; woawo azu mia to.

⁴⁶ Woawo anye miaƒe ame, eye mia viwo atso wo anyi domee, miekpɔ mɔ ade kluvidɔ asi na wo ɣesiaɣi. Ke migaɖu mia ŋutɔwo mia nɔvi Israel-viwo dzi kple sesẽ o.

⁴⁷ Ne nu ɖo amedzro alo gbɔwò mea ɖe si, eye nɔviwò ɖo ko hetsɔ eɖokui dzra na amedzro alo gbɔwò me la alo woƒe dzidzimevia ɖe la,

⁴⁸ ne edzra eɖokui la, ekema se li, be woagaxɔe; nɔviawo dometɔ ɖeka kpɔ mɔ agaxɔe.

⁴⁹ Etɔɖia alo etɔɖia ƒe viŋutsu alo eƒe ƒometɔ kekeake kpɔ mɔ axɔe, alo ne eya ŋutɔ kpɔ nu la, ate ŋu axɔ eɖokui.

⁵⁰ Eya kple eƒlela nabu ƒe tso ƒe, si me wòdzra eɖokui nɛ la dzi vaseɖe aseyetsoƒe la dzi, eye eƒlefe la nanɔ ɖe ƒeawo ŋu; wòanɔ egbɔ abe agbatedɔwɔla ene.

⁵¹ Ne ƒe geɖe gasusɔ la, ekema exɔfe, si wòaɖe tso eƒlefe me la, nanɔ ɖe ƒeawo ŋu.

⁵² Ke nenye ƒe ʋea ɖe koe susɔ, ne aseyetsoƒe naɖo la, ekema woabui nɛ; ƒeawo nu exɔfe la nanɔ ɖo.

⁵³ Wòanɔ egbɔ ƒe sia ƒe abe agbatedɔwɔla ene, eye megazi kpi kpɔe be, woaɖu edzi kple sesẽ o.

⁵⁴ Ke ne womexɔe alea o la, ekema woaɖe asi le eya ŋutɔ kple viawo ŋu le aseyetsoƒe la dzi.

⁵⁵ Elabena nye dɔlawo nye Israel-viwo, amesiwo mekplɔ tso Egipte-nyigba dzi. Nyee nye Yehowa, mia Mawu!