2 Samuel 22 - Biblia alo Ŋɔŋlɔ Kɔkɔe La Le Eʋegbe Me 1913

Dawid dzi kafukafuha le esi Yehowa ɖee tso futɔwo si me ŋuti.

¹ Tete Dawid gblɔ ha sia ƒe nyawo na Yehowa le gbesigbe Yehowa ɖee tso eƒe futɔwo katã kple Saul si me,

² eye wògblɔ be: Yehowa enye nye agakpe, nye mɔ̃ kple nye ɖela.

³ Mawu enye nye ɣaɣlaƒe, amesi gbɔ mebe ɖo nye akpoxɔnu kple nye xoxo ƒe lãdzo, nye mɔ̃ sesẽ kple nye sitsoƒe kpakple nye xɔla, amesi ɖem tso ŋutasẽlawo si me.

⁴ Meyɔ Yehowa, amesi dze bubu, eye medo tso nye futɔwo si me.

⁵ Elabena ku ƒe tsitsotsoewo ɖe to ɖem eve gbegblẽ ƒe tɔsisiwo do ŋɔdzi nam.

⁶ Tsiẽƒe ƒe kawo ƒo xlãm eve ku ƒe adoboliwo ɖem

⁷ Meyɔ Yehowa le nye xaxa me eye meɖo ɣli na nye Mawu, ese nye gbe tso eƒe fiasã me, eye nye kokoƒoƒo de eƒe to me.

⁸ Anyigba ʋã, eye wòʋuʋu, eye dziƒo ƒe anyinɔwo dzo kpekpekpe: woʋã elabena edo dɔmedzoe.

⁹ Dzudzɔ de dzi tso eƒe ŋɔti me, dzo tso eƒe nu me fiã nu, eye aka lé dzo tso egbɔ.

¹⁰ Eviã dziƒo heɖi ɖe anyi, eye alilikpo dodo le eƒe afɔ te.

¹¹ Ena Kerubi dzi hedzo, eye woɖo agba ɖe ya ƒe aʋalawo dzi.

¹² Ewo viviti no me abe agbadɔ ene, eye tsiɖɔɖɔ tso alilikpo dodo me.

¹³ Dzoka xɔxɔwo do tso keklẽ me le eŋgɔ.

¹⁴ Yehowa ɖe gbe tso dziƒo, eye dziƒoʋitɔ la na eƒe gbe ɖi.

¹⁵ Eda aŋutrɔ wòkaka wo hlẽ, eye wòɖo dzikedzo ɖa wòtafa wo.

¹⁶ Tete atsiaƒu gɔme dze, eye anyigba ƒe anyinɔwo tsi go to Yehowa ƒe ŋɔdzidodo kple eƒe ŋɔti me gbɔgbɔ me.

¹⁷ Edo alɔ ɖa tso dzi lém, eye wòhem tso tɔ gãwo me

¹⁸ Eɖem tso nye futɔ sesẽ la kple nye ketɔwo si me, elabena wosesẽ wum.

¹⁹ Wodze dzinye le gbesigbe meɖo dzɔgbevɔ̃e me, ke Yehowa enye nye ziɔɖeŋu.

²⁰ Ekplɔm va dogba dzi, eye wòɖem, elabena nye nu nyo eŋu.

²¹ Yehowa wɔ nam ɖe nye dzɔdzɔenyenye nu, eye wòɖo teƒe nam le esi nye asi dza ta.

²² Elabena melé ŋku ɖe Yehowa ƒe mɔwo ŋu, eye nyemewɔ nu vloa ɖeke ɖe nye Mawu ŋu o.

²³ Elabena eƒe sewo katã le ŋkunye me, eye nyemeɖe eƒe ɖoɖowo ɖa le gbɔnye o.

²⁴ Mede blibo le eƒe ŋku me, eye mekpɔ ɖokuinye dzi le nye vodada ŋuti.

²⁵ Eyata Yehowa ɖo eteƒe nam le nye dzɔdzɔenyenye ta, le esi nye asi dza le eŋku me ta.

²⁶ Wò dɔme nyona ɖe dɔmenyotɔ ŋu, eye èdea blibo le amesi dea blibo la gbɔ.

²⁷ Edzana le amesi dzana gbɔ, ke èvlona ɖe amesi vlona ŋu.

²⁸ Exɔna na dukɔ, si wolena ɖe anyi, eye wò ŋku nɔa dadalawo ŋu, be nabɔbɔ wo ɖe anyi.

²⁹ Elabena wò Yehowa ènye nye akaɖi, eye Yehowa na nye viviti me kɔ.

³⁰ Elabena dziwò metona nyaa avuzi le amehawo dzi, eye nye Mawu dzi metona tia kpo flɔ gli.

³¹ Mawu ƒe mɔ de blibo, Yehowa ƒe nya me kɔ, akpoxɔnu wònye na amesiwo katã sii tso.

³² Elabena ameka nye mawu kpe ɖe Yehowa ŋu? Eye ameka nye agakpe kpe ɖe mía Mawu la ŋu?

³³ Mawu enye nye mɔ̃ sesẽ, eye wòna nye mɔ zu gbadzaa.

³⁴ Ewɔ nye afɔ abe zinɔwo tɔ ene, eye wòɖom togbɛwo dzi.

³⁵ Efia aʋawɔwɔ nye asiwò, ale be nye alɔwo vu akɔblidati me.

³⁶ Etsɔ wò xɔxɔ ƒe akpoxɔnu la nam, eye wò gbesese wɔm mezu gã.

³⁷ Ena nye afɔɖeɖe keke le tenye, eye nye afɔkɔewo mebotsona o.

³⁸ Meɖe nye futɔwo ɖe nu, eye mewu wo, eye nyemetrɔ o, vaseɖe esime metsrɔ̃ wo vɔ.

³⁹ Metsrɔ̃ wo, eye meto wo nyanyanya, ale be womegafɔ o, eye wodze anyi ɖe nye afɔ te.

⁴⁰ Etsɔ ŋusẽ bla ali dzi nam ɖe aʋawɔwɔ ŋu, eye nèbɔbɔ nye futɔwo ɖe tenye.

⁴¹ Ena nye futɔwo trɔ ʋume dem, eye metsrɔ̃ nye futɔwo gbidigbidi.

⁴² Wodo ɣli na Yehowa, ke xɔnametɔa ɖeke meli o, eye meɖo ŋu na wo o.

⁴³ Metu wo abe anyigba ʋuʋudedi ene, eye metu afɔ wodzi hefanya wo abe kpɔdomeeba ene.

⁴⁴ Eɖem tso nye dukɔ ƒe dzrewɔwɔwo me, èdzram ɖo hetsɔm ɖo dukɔwo ƒe lae, eye dukɔ, si nyemenya o la, subɔm.

⁴⁵ Amedzroviwo vivi nu me nam; tonu ko wose, eye woɖo to nye gbe.

⁴⁶ Dzidzi ƒo amedzroviawo, eye woƒe lãme tu, wodo tso woƒe mɔwo me.

⁴⁷ Yehowa le agbe; woakafu nye agakpe, eye wòado Mawu, nye xoxo ƒe agakpe la, ɖe dzi.

⁴⁸ Mawu, amesi bia hlɔ̃ nam, eye wòtsɔ dukɔwo ɖe tenye.

⁴⁹ Ekplɔm tso nye futɔwo dome, eye wòtsɔm ɖo nye futɔwo dzi, eye wòɖem tso ŋutasẽla si me.

⁵⁰ Eyata mele kafuwòm, Yehowa, le dukɔwo dome, eye mele kafukafuha dzim na wò ŋkɔ.

⁵¹ Eɖe xɔxɔ gã fia eƒe fia, eye wòve Dawid, eƒe amesiamina la, kple eƒe dzidzimeviwo nu tegbee.