2 Mose 4 - Biblia alo Ŋɔŋlɔ Kɔkɔe La Le Eʋegbe Me 1913

Mawu ɖo mɔ Mose kple nukunu.

¹ Mose do ŋu gblɔ bena: Ne womexɔ nye nya dzi se o, eye womeɖo to nye gbe o, ke boŋ wogblɔ bena: Yehowa mede eɖokui fia wò o ɖe?

² Yehowa gblɔ nɛ bena: Nukae ma le asiwò? Eɖo ŋu bena: Atizɔtie.

³ Tete wògblɔ bena: Tsoe ƒu gbe ɖe anyigba! Esi wòtsɔe ƒu gbe ɖe anyigba la, etrɔ zu da, eye Mose si le enu.

⁴ Yehowa gblɔ na Mose bena: Do wò asi ɖa nalé eƒe asike! Eye wodo eƒe asi ɖa lee; tete wògatrɔ zu atizɔti de esi.

⁵ Ekema woaxɔe ase bena, Yehowa, wo fofowo ƒe Mawu, Abraham ƒe Mawu, Isak ƒe Mawu kple Yakob fe Mawu lae de eɖokui fia wò.

⁶ Eye Yehowa gagblɔ nɛ bena: Tsa wò asi ƒo ɖe wò axatome! Eye wòtsɔ eƒe asi ƒo de eƒe axatome. Esi wògaɖee ɖa la, anyi ƒo ɖe eƒe asi ŋuti fu tii.

⁷ Eye wògblɔ bena: Gagbugbɔ wò asi ƒo de wò axatome! Eye esi wògagbugbɔ eƒe asi ƒo de axatome, eye wògaɖee da la, kpɔ ɖa, eƒe asi gazu abe eƒe ŋutilã susɔea ene.

⁸ Ne womexɔ wò nya dzi se o, eye womebu dzesi gbãtɔ o la, ekema woaxɔ dzesi evelia dzi ase.

⁹ Ke ne womexɔ dzesi eve siawo hã dzi se o, eye womese wo gbe o la, ekema naku tsi le Nil-tɔsisi me akɔ de anyigba, eye tsi, si nèku le Nil-tɔsisia me la, atrɔ zu ʋu ɖe anyigba.

¹⁰ Tete Mose gblɔ na Yehowa bena: Taflatse, Aƒetɔ, nyemenya nuƒoƒo o, eye esia metso etsɔ kple nyitsɔ alo tso esime nède asi nuƒoƒo me kple wò dɔla o, elabena nye aɖe metrɔna ɖe nya ŋuti o.

¹¹ Yehowa ɖo ŋu nɛ bena: Ameka wo nu na ame? Ameka wo aɖetututɔ alo tokunɔ alo nukpɔla alo ŋkuagbãtɔ? Alo menye nye Yehowa oa?

¹² Heyi ko, makpe ɖe ŋuwò naƒo nu, eye mafia nusi nagblɔ la wò.

¹³ Eye wògblɔ bena: Taflatse, Aƒetɔ, ɖi amea ɖe do boŋ.

¹⁴ Tete Yehowa, do dɔmedzoe ɖe Mose ŋu gblɔ bena: Alo nyemenyae bena, nɔ viwò Aron, Lewitɔ la, nya nuƒoƒo nyuie oa? Kpɔ ɖa, egbɔna kpe; wò ge, eye ne ekpɔ wò la, dzi adzoe ŋutɔ.

¹⁵ Ekema naƒo nu kplii, eye natsɔ nyawo ade enu, eye nye la makpe ɖe mia ŋu miaƒo nu, eye mafia nusi miawɔ la mi.

¹⁶ Eya naƒo nu kple dukɔ la ɖe tewòƒe, eye wòanye wò nu; ke wò la nanɔ Mawu teƒe nɛ.

¹⁷ Eye natsɔ atizɔti sia ɖe asi, eya natsɔ awɔ dzesiawoe!

Mose gatrɔ yi Egipte.

¹⁸ Eye Mose trɔ gbã va toa Yetro gbɔ, eye wògblɔ nɛ bena: Mele didim be, magbugbɔ aɖakpɔ nɔvinyewo ɖa le Egipte be, wogale agbe mahã? Yetro ɖo ŋu; na Mose bena. Heyi faa!

¹⁹ Eye Yehowa gblɔ na Mose le Midian bena: Tso, gbugbɔ yi ɖe Egipte, elabena amesiwo katã le didim be, yewoatsrɔ̃ wò agbe la, woku.

²⁰ Tete Mose tsɔ srɔ̃a kple viawo ɖo tedzi dzi, eye wòdze mɔ heyi Egipte-nyigba dzi; eye Mose tso Mawu ƒe atikplɔ la ɖe asi.

²¹ Eye Yehowa gblɔ na Mose bena: Ne ede Egipte la, ekema naɖo ŋku nukunu, siwo katã mede asi na wò la dzi awɔ le Farao ƒe ŋku me; ke nye la mana eƒe dzime nasẽ, bena maɖe asi le dukɔ la ŋu wòayi o.

²² Gblɔ na Farao bena: Ale Yehowa gblɔ esi: Israel la nye ŋgɔgbevie!

²³ Eyata mele gbɔgblɔm na wò bena: Ɖe asi le vinye ŋuti, ne wòava subɔm, ke ne ègbe asiɖeɖe le eŋu la, ekema mawu wò ŋgɔgbevi!

²⁴ Le ma dzi, esi wova ɖo dzeƒe la, Yehowa va, eye wòdi be, yeawui.

²⁵ Tete Zipora tsɔ kpe ɖaɖɛa ɖe lã viaŋutsu ƒe aʋanuyi ɖa, eye wòtsɔe da ɖe eƒe afɔ nu gblɔ bena: Ʋuŋugbetɔsrɔ̃ nènye nam.

²⁶ Tete wòɖe asi le eŋu. Gbemagbe wògblɔ bena ʋuŋugbetɔsrɔ̃ le aʋatsotso la ta.

²⁷ Eye Yehowa gblɔ na Aron bena: Yi ɖakpe Mose le gbea dzi! Tete wòyi ɖakpee le Mawu ƒe to la gbɔ, eye wògbugbɔ nu nɛ.

²⁸ Eye Mose gblɔ Yehowa ƒe nya, siwo katã ta wòdɔe ɖo kple dzesi, siwo katã wòde esi la nɛ.

²⁹ Esia megbe Mose kple Aron woyi, eye woyɔ Israel-viwo ƒe ame tsitsiwo katã ƒo ƒu.

³⁰ Eye Aron gblɔ nya, siwo katã Yehowa de asi na Mose la; ke eya wo dzesiawo le dukɔ la ƒe ŋku me.

³¹ Esi dukɔ la se bena: Yehowa ɖo ŋku Israel-viwo dzi, eye wòkpɔ woƒe teteɖanyi la, woxɔe se, eye wode ta agu hedo gbe ɖa.