2 Kronika 17 - Biblia alo Ŋɔŋlɔ Kɔkɔe La Le Eʋegbe Me 1913

Yosafat ƒe dziɖuɖu nyui.

¹ Eye via Yosafat zu fia ɖe eteƒe, eye wòglã eɖokui ɖe Israel ŋu.

² Eɖe asrafowo ɖo Yuda-du sesẽwo katã me, eye wòɖe amewo ɖo Yuda-nyigba dzi kple Efrayim-du, siwo fofoa Asa xɔ la me.

³ Eye Yehowa nɔ kple Yosafat, elabena ezɔ fofoa Dawid ƒe mɔ tsãtɔwo dzi, eye mebia Baal ta se o;

⁴ ke boŋ ebia fofoa ƒe Mawu la ta se, ezɔ le eƒe sewo nu, eye mewɔ Israel ƒe nuwɔwɔ o.

⁵ Eyata Yehowa li ke fiaɖuƒe la ɖe esi me, eye Yuda blibo la tsɔ nunanawo na Yosafat, ale be kesinɔnu kple bubu siaa su esi.

⁶ Eye esi dzi ɖo eƒo le Yehowa ƒe mɔwo dzi la, eɖe nuxeƒewo kple Aserawo ɖa le Yuda.

⁷ Le eƒe fiaɖuɖu ƒe ƒe etɔ̃lia me la edɔ eƒe amegãwo: Ben-Xayil, Obadya, Zaxarya, Netaneel kple Mixaya ɖa, ne woaɖafia nu le Yuda-duwo me;

⁸ eye Semaya, Netanya, Zebadya, Asahel, Semiramot, Yonatan, Adoniya, Tobiya kple Tob-Adoniya, amesiwo nye Lewi-viwo kpakple nunɔla Elisama kple Yoram kpe ɖe wo ŋu.

⁹ Wotso Yehowa ƒe segbalẽ la ɖe asi, eye wofia nu le Yuda, wotsa le Yuda-duwo katã me, eye wofia nu dukɔ la.

¹⁰ Tete Yehowa ƒe ŋɔdzi dze anyigba dzi fiaɖuƒe, siwo katã ƒo xlã Yuda godoo la dzi, ale be womewɔ aʋaa ɖeke kple Yosafat o.

¹¹ Filistitɔwo dometɔa ɖewo tso nunanawo kple klosalo geɖe vɛ na Yosafat, eye Arabiatɔwo hã tsɔ agbo akpe adre kple alafa adre kpakple gbɔ̃tsu akpe adre kple alafa adre vɛ ne.

¹² Eye Yosafat le gã zum ɖe dzi ɖaa ŋutɔ, etu mɔwo, eye wòtso nudzraɖoƒeduwo ɖe Yuda.

¹³ Edzra nuɖuɖu geɖe ɖo ɖe Yuda-duwo me, eye ŋutsu aʋawɔla kalẽtɔwo le esi le Yerusalem.

¹⁴ Woƒe amesiwo wotia xlẽ la, wonye esi le woƒe aƒekɔwo nu: Ame akpewo ƒe tatɔ, siwo tso Yuda, wonye: Amegã Adna, ŋutsu kalẽtɔ akpe alafa etɔ̃ te eŋu;

¹⁵ amesi kpe ɖe eŋu, enye amegã Yoxanan, ame akpe alafa eve blanyi le eŋu;

¹⁶ eye amesi kpe ɖe eŋu, enye Amasya, Zixri vi, amesi tso eɖokui na Yehowa faa, ŋutsu kalẽto akpe alafa eve le eŋu.

¹⁷ Esiwo tso Benyamin, wonye: Ŋutsu kalẽtɔ Elyada, ame akpe alafa eve le eŋu, amesiwo kplaa dati kple akpoxɔnu;

¹⁸ amesi kpe ɖe eŋu, enye Yozabad, ame akpe alafa ɖeka kple blanyi le eŋu, amesiwo bla akpa ɖe aʋawɔwɔ ŋu.

¹⁹ Amesiawoe subɔa fia la hekpe ɖe amesiwo fia la ɖo du sesẽwo me le Yuda blibo la ŋuti.