1 Mose 50 - Biblia alo Ŋɔŋlɔ Kɔkɔe La Le Eʋegbe Me 1913

Woɖi Yakob ɖe Hebron.

¹ Tete Yosef dze fofoa dzi, fa avi ɖe edzi, eye wòɖuɖɔ nu nɛ.

² Emegbe Yosef de se na eƒe dɔla, siwo nye atikewɔlawo, bena woasi atike na fofoa. Tete atikewɔlawo si atike na Israel.

³ Esi ŋkeke blane, si wosia atike na ame kuku, de vɔ la, Egiptetɔwo fa nɛ ŋkeke blaadre sɔŋ.

⁴ Ke esi konyifaɣiawo va yi vɔ la, Yosef gblɔ na Farao ŋuti mewo bena: Meɖe kuku, ne miave nunye la, ekema migblɔ na Farao bena:

⁵ Fofonye na meka atam ne bena, ne yeku la, ekema maɖi ye ɖe yɔdo, si yeɖe ɖe Kanaan-nyigba dzi la me. Eyata meɖe kuku, mayi aɖaɖi fofonye, emegbe magatrɔ agbɔ.

⁶ Farao ɖo ŋu nɛ bena; Yi naɖaɖi fofowò, abe alesi nèka atam nɛ ene!

⁷ Tete Yosef dze mɔ, be wòaɖaɖi fofoa. Eye Farao ƒe subɔlawo katã kple eŋuti mewo kpakple Egipte-nyigba dzi megãwo katã yi kplii.

⁸ Eye Yosef ƒemetɔwo katã, nɔviawo, kple fofoa ƒemetɔwo katã yi kplii; negbe wo viwo, woƒe alẽwo kple nyiwo ko wogblẽ ɖe Gosen-nyigba la dzi.

⁹ Eye tasiaɖamwo kple sɔɖolawo kplɔe yii ale bena, wonye ameha gãa ɖe.

¹⁰ Esi wova ɖo Gorenhatad, si le Yordan godo la, wofa konyi ŋutɔŋutɔ le afima, eye wowɔ yɔƒe na wo fofoa ŋkeke adre.

¹¹ Esi Kanaantɔ, siwo nye anyigba dzi nɔlawo, kpɔ yɔƒewɔwɔ la le Gorenhatad la, wogblɔ bena: Afisia Egiptetɔwo wɔ yɔƒe gãa ɖe le. Eyata woyɔa teƒe ma bena Abel-Mizraim, si le Yordan godo.

¹² Eye viaŋutsuwo wo nɛ, abe alesi wòde se na wo ene.

¹³ Eye viawo tsoe yi Kanaan, eye woɖii ɖe kpeto, si le Maxpela gble me, le Mamre kasa la me; agble, si Abraham ƒle le Efron Xititɔa si, be wòanye ameɖiƒe nɛ.

¹⁴ Esi wòɖi fofoa va la, Yosef kple nɔviawo kple amesiwo katã kpe ɖe eŋu woɖaɖi fofoa la, wogatrɔ va Egipte.

Yosef de dzi ƒo na nɔviwo; eƒe ku.

¹⁵ Le wo fofo ƒe ku megbe la Yosef nɔviwo le vɔvɔ̃m gblɔ bena: Ɖewohĩ Yosef alé fu mi, eye wòaɖo vɔ̃, siwo katã miewɔ ɖe eŋu la, teƒe na mí.

¹⁶ Eye wodɔ ame ɖo ɖe Yosef gbɔ gblɔ bena: Hafi fofowò naku la, ede se gblɔ bena:

¹⁷ Ale miagblɔ na Yosef enye si: Meɖe kuku, tsɔ nɔviwòwo ƒe nuvɔ̃ kple woƒe vodada ke wo; elabena wowɔ vɔ ɖe ŋuwò. Eyata míeɖe kuku, tsɔ míaƒe nuvɔ̃wo ke mí, elabena miawo hã míesubɔa fofowò ƒe Mawu la. Tete Yosef fa avi le nya sia ŋuti.

¹⁸ Emegbe la nɔviawo ŋutɔ yi, eye wodze klo de ta agu nɛ gblɔ bena: Miawo nye si, tsɔ mi wɔ wò kluviwoe!

¹⁹ Eye Yosef ɖo ŋu na wo bena: Migavɔ̃ o! Alo Mawu teƒe melea?

²⁰ Miawo miesusu vɔ̃ ɖe ŋunye, ke Mawu trae wòzu nyuie, be yeawɔe axɔ ame geɖe ɖe agbe, abe alesi miele ekpɔmi egbegbe ene.

²¹ Eyata migavɔ̃ o, manyi mia kple mia viwo siaa! Ale wòfa ako na wo, eye wòde dzi ƒo na wo.

²² Eye Yosef kple fofoa ƒemetɔwo tsi Egipte-nyigba dzi, eye Yosef xɔ ƒe alafa ɖeka kple ewo.

²³ Eye Yosef nɔ agbe tso Efrayim ƒe tɔgbuiyɔviwo ɖo, eye Maxir Manase vi hã dzi viwo le Yosef ƒe agbenɔɣi me.

²⁴ Eye Yosef gblɔ na nɔviawo bena: Nye la mele kuku ge; ke Mawu aɖo ŋku mia dzi, eye wòakplɔ mi atso anyigba sia dzi ayi ɖe anyigba, si ŋugbe wodo na Abraham, Isak kple Yakob la dzi.

²⁵ Tete Yosef na Israel ƒe viwo ka atam, eye wògblɔ bena: Ne Mawu aɖo ŋku mia dzi la, ekema mitso nye ƒuwo hã tso afisia yii!

²⁶ Esi Yosef xa ƒe alafa ɖeka kple ewo la, eku, eye wòsi atike nɛ hetsɔe de aɖaka me le Egipte.