1 Mose 45 - Biblia alo Ŋɔŋlɔ Kɔkɔe La Le Eʋegbe Me 1913

Yosef ɖo eɖokui fia nɔviawo.

¹ Ke Yosef megate ŋu zi eɖokui dzi, abe alesi wòwɔ vaseɖe fifi, esime amewo le egbɔ la ene o; eye wògblɔ bena: Amesiame nado go le gbɔnye! Eye amea ɖeke menɔ Yosef gbɔ, hafi wòɖe eɖokui fia nɔviawo o.

² Tete wògbã avi doo, ale bena Egiptetɔwo kple Farao-ƒemetɔwo hã see.

³ Eye Yosef gblɔ na nɔviawo bena: Nye enye Yosef! Fofonye gale agbea? Ke nɔviawo lulu le eƒe ŋku me, eye womete ŋu ɖo nyaa ɖeke ŋu nɛ o.

⁴ Eye Yosef gblɔ na nɔviawo bena: Mite ɖe ŋunye dzro! Esi wole ɖe eŋu la, egblɔ bena: Nye enye mia nɔvi Yosef, si mietsɔ dzra ɖe Egipte la.

⁵ Migana woazu nuxaxa na mi o, eye megave mi be, mietsɔm ƒle ɖe afisia o; elabena Mawue dɔm ɖe mia ŋgɔ, bena maɖe miaƒe agbe.

⁶ Fe eve enye si dɔwuame le anyigba dzi, eye wògasusɔ ƒe atɔ̃, siwo me womaŋlɔ nu, eye womaŋe nu o.

⁷ Ke Mawu dɔm ɖe mia ŋgɔ, bena mia ŋutɔwo kple mia viwo míatsi agbe, eye ame geɖewo nakpɔ ɖeɖe.

⁸ Menye miawoe dɔm ɖe afisia o, ke boŋ Mawue, eye wòtsɔm wɔ adaŋudela vevi na Farao, eye wòɖom amegãe ɖe eƒe aƒe dzi kple dziɖulae ɖe Egipte-nyigba blibo la katã dzi.

⁹ Eyata netsɔ, ne miayi fofonye gbɔ, eye miagblɔ nɛ bena: Ale viwò Yosef gblɔ esi: Mawu ɖom amegãe ɖe Egipte-nyigba blibo la katã dzi; va gbɔnye, megahe ɖe megbe o!

¹⁰ Eye nanɔ Gosen-nyigba dzi, ate ɖe ŋunye, wò ŋutɔ, viwòŋutsuwo kple wò tɔgbuiyɔviwo, wò alẽwo kple nyiwo kpakple nusiwo katã le asiwò.

¹¹ Makpɔ dziwò le afima, elabena esusɔ ƒe atɔ̃ dɔwuame naganɔ anyi, bena hiã nagatu wò ŋutɔ, viwòwo kple aƒewòmetɔwo katã o.

¹² Mia ŋutɔwo kple nɔvinye Benyamin hã miekpɔe kple miaƒe ŋkuwo bena, nye ŋutɔe ƒo nu kpli mi.

¹³ Migblɔ bubu, si katã mekpɔ le Egipte-nyigba dzi, kple nusiwo katã miekpɔ la, fia fofonye, eye netsɔ, miakplɔ fofonye ava afisiae.

¹⁴ Emegbe la ekpla asi kɔ na Benyamin, eye wòfa avi, eye Benyamin hã fa avi ɖe eƒe kɔ dzi.

¹⁵ Eyome la eɖuɖɔ nu na nɔviawo katã, eye wòfa avi ɖe woƒe kɔ dzi, emegbe la nɔviawo ƒo nu kplii.

Yosef na wokplɔ fofoa va Egipte.

¹⁶ Eye Farao kple eƒemetɔwo se bena, Yosef nɔviwo va. Eye wòdze Farao ŋuti mewo katã ŋu.

¹⁷ Tete Farao gblɔ na Yosef bena: Gblɔ na nɔviwòawo be, mido agba na miaƒe lãwo, eye míayi Kanaan-nyigba dzi

¹⁸ aɖakplɔ mia fofo kple mia ƒomeawo ava gbɔnye, eye mana anyigba nyuitɔ mi le Egipte, ne miaɖu nu ʋaʋãawo le anyigba la dzi.

¹⁹ Ke wò la, gblɔ nusi woawɔ la na wo! Mitsɔ tasiaɖamwo tso Egipte-nyigba dzi ɖe asi hena mia viwo kple mia srɔ̃wo, eye mina mia fofo hã naɖoe ava.

²⁰ Eye migana miaƒe ŋkuwo nanɔ miaƒe xɔmenuwo ŋu, eye woƒe nu nave mi o, elabena Egipte-nyigba dzi nu nyuiwo katã lanye mia tɔ.

²¹ Eye Israel viwo wɔ nenema, eye Yosef tsɔ tasiaɖamwo na wo le Farao ƒe nya la nu, eye wòna mɔ dzi nuɖuɖu hã wo.

²² Eye wòna atsyɔɖowu wo dome amesiame: ke ena klosalo sekel alafa etɔ kple atsyɔɖowu atɔ Benyamin ya.

²³ Eye wòɖo tedzi ewo, siwo tsɔ Egipte-nu veviwo kple tedzinɔ ewo, siwo tsɔ bli kple abolo kple mɔ dzi nuɖuɖu, ɖe fofoa.

²⁴ Emegbe edo mɔ nɔviawo, eye hafi wòadze mɔ la, exlɔ̃ nu wo bena: Migawɔ dzre le mɔ dzi o!

²⁵ Ale wotso le Egipte, eye wova ɖo wo fofo Yakob gbɔ le Kanɔan-nyigba dzi.

²⁶ Eye wogblɔ nɛ bena: Yosef gale agbe, eye wònye dziɖula le Egipte-nyigba blibo la katã dzi. Ke nya la ka ɖe Yakob, eye mexɔe se o.

²⁷ Ke esi wogblɔ nya, siwo katã Yosef gblɔ na wo la, nɛ, eye wòkpɔ tasiaɖam, siwo Yosef ɖo ɖee, be woaɖo ava la, wo fofo Yakob ƒe dzi gaɖo me.

²⁸ Eye Israel gblɔ bena: Esɔ gbɔ be, vinye Yosef gale agbe! Mayi aɖakpɔe ɖa hafi aku!