1 Mose 25 - Biblia alo Ŋɔŋlɔ Kɔkɔe La Le Eʋegbe Me 1913

Abraham ɖe srɔ̃ evelia.

¹ Eye Abraham gaɖe srɔ̃, si ŋkɔ nye Ketura.

² Eya dzi Simran, Yoksan, Medan, Midian, Yisbak kple Suax nɛ.

³ Yoksan dzi Seba kple Dedan; eye Asuritɔwo, Letusitɔwo kple Leumitɔwo dzɔ tso Dedan me.

⁴ Eye Midianviwo nye: Efa, Efer, Henox, Abida kple Edaa. Ame siawo katã dzɔ tso Ketura me.

⁵ Eye Abraham tsɔ eƒe nuwo katã na Isak.

⁶ Ke Abraham na nu srɔ̃ bubuawo ƒe viwo heɖe wo ɖa le Isak ŋu, eye wòɖo wo ɖe ɣedzeƒenyigba dzi le eya ŋutɔ ƒe agbenɔɣi me.

Abraham ƒe ku kple eɖiɖi.

⁷ Eye ƒe, siwo katã Abraham nɔ agbe la, wonye ƒe alafa ɖeka kple blaadre vɔ atɔ̃.

⁸ Ke Abraham ku amegã ɖeɖi, eye agbenɔnɔ tii hafi wòku, eye wòyi ɖe tɔgbuiawo gbɔ.

⁹ Eye via Isak kple Ismael woɖii ɖe Maxpela-kpeto la me, le Xititɔ Efron, Zoxarvi ƒe agble, si le Mamre kasa la me.

¹⁰ Le agble, si Abraham ƒle le Xitiviwo si la me woɖi Abraham kple srɔ̃a Sara ɖo.

¹¹ Le Abraham ƒe ku megbe la Mawu yra via Isak. Eye Isak nɔ „Agbetɔ, si le kpɔyem la“ ƒe vudo gbɔ.

Ismael ƒe dzidzimeviwo.

¹² Esiawo nye Abrahamvi Ismael, amesi Egipte-nyɔnu Hagar, Sara ƒe kosi, dzi na Abraham la ƒe dzidzimeviwo.

¹³ Esiawo nye Ismaelviwo ƒe ŋkɔwo le woƒe ƒomeŋkɔwo nu. Nebayot, Ismael ƒe ŋgɔgbevi, Kedar, Adbeel, Mibsam,

¹⁴ Misma, Duma, Masa,

¹⁵ Xadad, Tema, Yetur, Nafis kple Kedma.

¹⁶ Ame siawo nye Ismaelviwo kple woƒe ŋkɔwo. Fia wuieve le woƒe aƒetsotsowo, agbadɔwo kple woƒe dukɔwo nu.

¹⁷ Ismael ƒe agbe me ŋkekewo nye ƒe alafa ɖeka kple blave vɔ adre, eye wòku, eye wòyi ɖe tɔgbuiawo gbɔ.

¹⁸ Eye woƒe nɔƒe tso Xawila vaseɖe Sur le Egipte ƒe ɣedzeƒe heɖo ta Asur ke; ale wɔ womimi wo nɔviwo katã ɖo. Esau kple Yakob.

¹⁹ Esia nye Abraham vi Isak ƒe dzidzimeŋutinya: Abraham ye dzi Isak.

²⁰ Isak xɔ ƒe blane, esime wòɖe Rebeka, si nye Aramtɔ Betuel tso Mesopotamia ƒe vi kple Aramtɔ Laban ƒe nɔvinyɔnu.

²¹ Ke Isak, ƒo koko na Yehowa le srɔ̃a ta, elabena etsi ko. Eye Yehowa ɖo to eƒe kokoƒoƒo la, eye srɔ̃a Rebeka fɔ fu.

²² Ke esi ɖeviawo le ŋu ɖom wo nɔewo le eƒe dɔ me la, egblɔ bena: Ne ele alea la, nukaŋuti megale agbe ɖo? Eye wòyi ɖabia Yehowa se.

²³ Eye Yehowa gblɔ nɛ bena; Dukɔ evee le wò dɔ me, eye dukɔ eveawo amã atso wò dɔ me ke; dukɔ ɖeka asesẽ awu ɖeka, eye tsitsitɔ asubɔ ɖevitɔ!

²⁴ Eye esi eƒe vidziɣi ɖo la, wokpɔ bena, venɔviwoe le eƒe do me.

²⁵ Esi gbãtɔ do la, eŋuti bia hẽ, eye fu le eŋu kedzekedze, eyata woyɔ eƒe ŋkɔ bena Esau.

²⁶ Eyome nɔvia hã do, eye wòlé Esau ƒe afɔkpodzi ɖe asi; eyata woyɔ eƒe ŋkɔ bena Yakob. Isak xɔ ƒe blaade, eye wòdzi wo.

²⁷ Esi ɖeviawo va tsi la, Esau zu adela, eye wòlɔ̃a gbe me nɔnɔ; ke Yakob enye ame fafa, eye wòlɔ̃a agbadɔ me nɔnɔ.

²⁸ Eye Isak lɔ̃a Esau, elabena adelã vivia enu; ke Rebeka ya lɔ̃a Yakob.

Esau dzra eƒe ŋgɔgbevinyenye.

²⁹ Gbe ɖeka Yakob ɖa nu, eye Esau gbɔ tso gbe me, eye dɔ wui ɖi tsi ɖe eŋu.

³⁰ Tete Esau gblɔna Yakob bena: Na nu dzia ɖem maɖu, elabena ɖɔ wum ɖi tsi ɖe ŋunye. Eyata woyɔ eƒe ŋkɔ be Edom.

³¹ Yakob ɖo ŋu nɛ be: Tsɔ wò ŋgɔgbevinyenye ƒle nam gbã gbɔ.

³² Tete Esau gblɔ be: Mele kuku ge tso, nuka gɔ̃ ŋgɔgbevinyenye awɔ nam?

³³ Eye Yakob gblɔ be: Ka atam ƒu dzi nam gbɔ! Tete wòka atam nɛ, eye wòtsɔ eƒe ŋgɔgbevinyenye ƒle na Yakob.

³⁴ Eye Yakob tsɔ abolo kple bɔbɔ na Esau. Tete wòɖu nu no nu, eye wòtso dzo. Ale wo, eye Esau do vlo eƒe ŋgɔgbevinyenye enye esi.