1 Kronika 13 - Biblia alo Ŋɔŋlɔ Kɔkɔe La Le Eʋegbe Me 1913

Dawid yi ɖaxɔ nubablaɖaka, eye wotsɔe de Obed-Edom ƒe me.

¹ Eye esi Dawid de adaŋu kple ame akpewo kple ame alafa wo ƒe tatɔwo kpakple amegãwo katã la,

² Dawid gblɔ na Israel ƒe ameha blibo la bena: Ne edze mia ŋu, eye wòtso Yehowa, mia Mawu gbɔ la, ekema mina míado ame ɖe afiawo katã ɖe mía nɔvi, siwo kpɔtɔ ɖe Israel-nyigbawo katã dzi la gbɔ, hekpe ɖe nunɔlawo kple Lewi-viwo, si wo le woƒe lãnyiƒewo ƒe duwo me la gbɔ, ne woava kpe ta ɖe mía gbɔ,

³ ne míaɖakɔ mía Mawu ƒe aɖaka la ava mia gbɔe; elabena le Saul ŋɔli la míebia eta se kpɔ o.

⁴ Tete ameha blibo la gblɔ be, yewoawɔ nenema, elabena nya la dze dukɔ blibo la ŋu.

⁵ Eye Dawid yɔ Israel blibo la tso Egiptetɔwo ƒe Sixor vaseɖe Xamat, ne woaɖakɔ Mawu ƒe aɖaka la tso Kiryat-Yearim vɛ.

⁶ Tete Dawid kple Israel blibo la ho yi Baala, eya nye Kiryat-Yearim, si nye Yuda lɔ, ne woatsɔ Mawu Yehowa, amesi le Kerubiwo ta me, afisi woyɔa eƒe ŋkɔ le la ƒe aɖaka tso afima vɛ.

⁷ Ke wotsɔ Mawu ƒe aɖaka la ɖo tasiaɖam yeye dzi tso Abinadab ƒe me, eye Uza kple Axyo wole tasiaɖam la kplɔm.

⁸ Tete Dawid kple Israel blibo la le ɣe ɖum le Mawu ŋku me kple ŋusẽ katã ɖe hadzidzi, saŋku kple kasaŋku, asiʋui kple gakogoe kpakple kpẽwo ŋu.

⁹ Esi wova Kidon ƒe lugbɔƒe la, Uza do asi ɖa, be yealé aɖaka la, elabena nyiawo dze ɖe aga.

¹⁰ Tete Yehowa ɖo dɔmedzoe ɖe Uza ŋu, eye wòƒoe, le esi wòdo eƒe asi ɖa lé aɖaka la ta, eye woku le afima le Mawu ŋku me.

¹¹ Eye wòve Dawid be, Yehowa ɖe Uza ɖa, eye wòna ŋkɔ teƒe ma be Perez-Usa, vaseɖe egbe.

¹² Eye Dawid vɔ̃ Mawu gbemagbe hegblɔ bena: Aleke matsɔ Mawu ƒe aɖaka la ava gbɔnyee?

¹³ Eyata Dawid metsɔ aɖaka la va eɖokui gbɔ le Dawid ƒe du la me o, ke boŋ ena woɖadroe ɖe Gat vi Obed-Edom ƒe me.

¹⁴ Ale Mawu ƒe aɖaka la tsi Obed-Edom gbɔ le eƒe me dzinu etɔ̃, eye Yehowa yra Obed-Edom ƒe aƒe la kple eƒe nuwo katã.