Nikɔn ne kɛ Phaal 9 - ɛWee ne ìTsɛm iHywas

ɛNtuntuung ne iWii Yɛ

¹ ɛMalɛka ne iwii yɛ ne wuuti ɛntuntuung ɛbhɛ wo, ne n yaang ɛyuyɔrɔ le dak ne irywa wo ɛ ho ndɔ ɛzay ya, ne nang ɛbhɛ ɛyaya ne ibong kyukyum be.

² ɛyuyɔrɔ gha ne phaal ibong kyukyum be, ɛgbaang ne ngkoy ne wuru ndɔ ne ibong ngge mpɛ so lilip te ngkoy ne ijwɛ ne kɛ te gup. Ngkoy da ne te tol ne iroy de ne irywa wo te gbyik.

³ ᐩiCobhol ne le ndɔ ne ngkoy ihywɛ wuru ihywɛ yɛɛs ɛzay ya. Ne i nang ihywɛ ito ne tabha ninyi ɛzay tɛ nitapoo.

⁴ Ne yaak ᐩicobhol de wu hang ihywɛ ta idik, ne ivee, gbik nɛ nihon, wu te ihywɛ yang ku tabha ninyi na ne hame nibhɛ bok ɛlamba ɛTaanggbey ya ne itiri nibhɛ de.

⁵ Sɔng kaa nang ihywɛ ito ne phobho ninyi nang, kaa yang nang ihywɛ ito ne baasek ninyi ɛmpyep pa iphɛl iwii. iRɔ yɛ kaa ne i rɔ te irɔ ɛtapoo ne ɛ kɛ ta ɛnyi.

⁶ Ndɔ ne iphɛl iwii yɛdee nggyɛ wo, ninyi na sɛ ne tɔk iku de ne irwisɛ gbyik, sɔng nibhɛ ne sɛ nang. Nibhɛ sɛ sim te sɛɛ yɔng nibhɛ yaa shii ku, iku de sɛ ne tel nibhɛ.

⁷ ᐩiCobhol lɛdee nggyɛ wo kaa so te ᐩinantse ne kɛ gyura i phɛɛs nɛ ne itsom, nidɛng nikɔn na kaa ne so daa ne itso nibhɛ nɛ nibhɛ so tɛ nikɔn ne ito ne igbɔm ne izinariya, niyisɛ yɛ kaa ne so tɛ niyisɛ niten nisii.

⁸ iHywɛ kaa ne bok itsotso ne ito wumang te itsotso ne ito ɛkuk, izinɛ yɛ ne so te izinɛ ɛkuramanza.

⁹ iHywɛ kaa ne bok nidɛng nikɔn na te ɛtura ne igyɔs ne kyɛngɛ ɛgyɛy. iZok ne ivaat tɛ kaa ne i wunga te izok nikyɛɛkyɛ ne ᐩinantse ne ihywɛ tel ihywɛ phɛɛs ne itsom.

¹⁰ iHywɛ kaa ne bok ihel, ihywɛ ne i tabha tɛ nitapoo. iHwet ne ta ɛnyi gha ɛlɔ yɛ rɔ iphɛl iwii de kaa ne so ne ihel de.

¹¹ iHywɛ kaa bok ɛgɔm ne ɛ re igbɔm daa ne ihywɛ, ɛbhɛ kaa ne soye ɛmalɛka ne ibong kyukyum be. Kaa ne i yeres ɛbhɛ “ɛBadɔn” ne ilem ne iHyiburu, ne yeres ɛbhɛ “ɛPɔliyɔn” ne ilem iGirik, kaabi ɛHaa ne Bees.

¹² ɛKɔn ne ɛnik ɛyisɛ gha kɛ phee, ne phok ɛn nidɛng nikɔn ne ɛnik ka ifaa ne ji yaaso ɛtsim ɛhihaa gha.

ɛNtuntuung ɛTaraa Yɛ

¹³ ɛMalɛka ne ɛtaraa yɛ ne wuuti ɛntuntuung ɛbhɛ wo, ne n phok ᐩizɔlɔs ihywɛ wuusi ne ibap nwaas ɛraa ne hap itsanga ne kɛ ryɔng izinariya ne ɛ so ɛnu ɛyisɛ ɛTaanggbey ya.

¹⁴ ihywɛ ne yaak ɛmalɛka ne ɛtaraa gha, ne ɛ bok ɛntuntuung, “Biri nimalɛka nwaas sa ne kɛ rop nibhɛ ndɔ ne iHywel ne iYufɛrɛtis so!”

¹⁵ niMalɛka nwaas sɛnaa nggyɛ wo ne kɛ ku ryɔng nibhɛ i hyep ne ishay yɛdee wo, ne ifɛl lɛwoo wo, ne igbey yɛwoo wo, ne nten nɛdee wo te ji biri nibhɛ nibhɛ bhɛ phobho ihop idaan ndɔ ne iphɛ itwat ninyi ɛzay ya.

¹⁶ Ne n bok wu nisaa ne ᐩinantse yɛnaa wo kɛ hɔn ᐩishin de ikpɔl ifaa (200,000,000).

¹⁷ ᐩiNantse de nɛ nisaa yɛ ne nggaa yaang ndɔ iyuwa nibok nge de kaa ne so ɛlɛ: iNɛn ne itsura ne igyɔs ne kyɛngɛ ɛgyɛy nisaa na kaa so iseng ngɛ zurutut, ne isii yɛ te irywa, ne inɛn ne ɛndaran. iTso ne ᐩinantse de ne so te itso ne nikuramanza, igboo, ne ngkoy ne gbik ne isɔlifa ne i wuusi ɛnu ne ihywɛ.

¹⁸ Nikɔn itwat tɛnaa nggyɛ wo nɛ nibhɛ wuusi ɛnu ne ᐩinantse gha, igboo wo ne ngkoy da ne isɔlifa de ne phoo ihop idaan ndɔ ne iphɛ itwat ninyi ɛzay de.

¹⁹ iHwet ne ᐩinantse da kaa so ɛnu ne ihywɛ gbik ne ihel lɛ. iHel ne ihywɛ de kaa so te ᐩizɔ, ihel lɛ bok itso, ihywɛ kaa ne ji mɔn ɛtomɛ ne itso ne ihel de ihywɛ phok ninyi na ikpom.

²⁰ Sɔng ɛbyin ninyi na ne hame kaa phoo nibhɛ ndɔ ɛkɔn ne ɛnik kɛghaa wo kaa ne san ɛbɔk daa nikɔn na nɛ nibhɛ mɔn no nang. Sɔng nibhɛ kaa kɔɔng re niphoo na, ne igunkyi de kɛ ryɔng ne izinariya de, ne idee ne kɛ ryɔng ne ɛzurufa wo, ne idee ne kɛ ryɔng ne ikpɛɛ da gbik ne itson de ntsong ngga nang. iPhɛ dee sɔng igbunkyi da bol nang, sɔng ifɛ phok nang, sɔng ifɛ ne ta hyel nang.

²¹ Sɔng nibhɛ kaa ne ta san ɛbɔk ɛlɔ ne phobho ninyi na nɛ nibhɛ phobho wo nang, sɔng nibhɛ ne san ɛbɔk ka daa ne ikyarakyut nibhɛ de, ne nzangas de, gbik ne ɛyi gha nang.