Nikɔn ne kɛ Phaal 7 - ɛWee ne ìTsɛm iHywas

Kɛ Yɛk Ninyi niSɛrɛla 144,000 ne ɛLamba

¹ Ɛtsim nikɔn nɛnaa wo ne n ji yɛɛn, ne n yaang nimalɛka ɛTaanggbey nibhɛ nwaas nibhɛ kɛ kyinasek ne ibap naas ɛzay de, tɛ nibhɛ ring igbil lo ne ifɛ le ne ibap naas de ne tel ɛzay, nɛ niling gbik nɛ nihon.

² Ne n da yaang ɛdɛ ɛmalɛka gha ɛ le ne iwap ɛdak, ɛ bok ɛlamba ɛTaanggbey ne iKen. Ne ɛ boote nɛ nimalɛka nwaas sɛnaa nggyɛ wo ne kɛ nang nibhɛ ito ne bees ɛzay ya nɛ niling nga, ne ɛgbaang ne izɔlɔs.

³ Ɛ bo, “Sɔng ɛ ku shii bees ɛn ivel ba nɛ niling nga, nɛ nihon na nang, shɛɛ ɛn yak te njwi kyi yaak nikpuru ɛTaanggbey njwɛɛn na ne ɛlamba ne icwiri nibhɛ nyɛɛn.”

⁴ Ne n ji phok wu kɛ yɛk ninyi na ninom ma ikɔl idaan nɛ nibhɛ nzuwubɔ nwaas nɛ nibhɛ nwaas (144,000) gbik ne ɛlamba gha ne icwiri nibhɛ, nibhɛ kaa ne le ne itaang niSɛrɛla de gbik.

⁵ Kaa yaak ninyi ne ɛlamba gha ɛlɛ: ne icwaang ɛYahoda, ninyi ninom ɛnduwubɔ nɛ nibhɛ ifaa (12,000). Ne icwaang ɛRubɛn, ninyi ninom ɛnduwubɔ nɛ nibhɛ ifaa (12,000). Ne icwaang ɛGad, ninyi ninom ɛnduwubɔ nɛ nibhɛ ifaa (12,000).

⁶ Ne icwaang ɛShɛr ninyi ninom ɛnduwubɔ nɛ nibhɛ ifaa (12,000). Ne icwaang ɛNatali, ninyi ninom ɛnduwubɔ nɛ nibhɛ ifaa (12,000). Ne icwaang ɛManasɛ, ninyi ninom ɛnduwubɔ nɛ nibhɛ ifaa (12,000).

⁷ Ne icwaang ɛSimiyɔn, ninyi ninom ɛnduwubɔ nɛ nibhɛ ifaa (12,000). Ne icwaang ɛLawi, ninyi ninom ɛnduwubɔ nɛ nibhɛ ifaa (12,000). Ne icwaang ɛSaka, ninyi ninom ɛnduwubɔ nɛ nibhɛ ifaa (12,000).

⁸ Ne icwaang ɛZɛbalun, ninyi ninom ɛnduwubɔ nɛ nibhɛ ifaa (12,000). Ne icwaang ɛYisifu, ninyi ninom ɛnduwubɔ nɛ nibhɛ ifaa (12,000). Ne icwaang ɛBinyami, ninyi ninom ɛnduwubɔ nɛ nibhɛ ifaa (12,000).

ɛGbaang ne iDira ne iLwem ɛZay

⁹ Ɛtsim nikɔn nɛnaa wo, ne nyɛɛn, ne n yaang ɛgbaang ne idira ne hame ɛnyi sɛ yɛɛ ne tɔng ngɛ. Nibhɛ kaa les ne igbagha ɛzay yo, ne ihywee ɛzay de, ne itaang ɛzay de gbik ne ilwem ɛzay da gbik, nibhɛ kɛ kyinasek ɛnu ɛyisɛ ɛcuruu ne igbɔm ma ne ɛNgɔn ne Pharak ka. Nibhɛ so ndɔ ne itsura dɔrɔng ihwala yɛ, nibhɛ ne ji bok ivee ne izezeres ne bo nibhɛ.

¹⁰ Nibhɛ ne ji kyangkey nibhɛ boote ne ɛgbaang ne izɔlɔs nibhɛ bo, “iPhɔrɔt da le ɛlɔ ɛTaanggbey mos ne ɛ kɛ soos ɛcuruu ne igbɔm, ne ɛNgɔn ne Pharak ka.”

¹¹ Gbik nimalɛka na ne te ɛcuruu ne igbɔm ma, nɛ ninu nikɔɔn na, nɛ nikɔn niken nwaas sa gyɔɔ, nibhɛ ne ji hoghɛse ne ivel nggbuk ɛnu ɛyisɛ ɛcuruu ne igbɔm ma, nibhɛ re ɛTaanggbey yegha ntsong.

¹² Nibhɛ bo, “Ɛɛy! Te yɔngɔ idɛp, ne ndiinday, ne ntsɛntsɛng, ne irway ihwala, ne igbom, ne ito-ndiinday, ne ihwet, soye ivaa ɛTaanggbey njwɛɛn ne ishay-ishay. Ɛɛy!”

¹³ ɛDɛng ndɔ ninu nikɔɔn na ne ji phom me ɛ yɔngɔ, “Ninay yaa wo nɛ nibhɛ so ndɔ ne itsura ihwala dɔrɔng ngɛdaa nggyɛ woo? Nibhɛ le ɛbii?”

¹⁴ Ne nggyii ɛbhɛ nɛ, n yaak ɛbhɛ, “Ɛndiinday, ɛ yɛɛ.” Ne ɛ ji yɔngɔ, “Ninyi yɛnaa wo nibhɛ bhɛ kɛ wuru ndɔ ne ɛgbaang ne nggbang ngo. Nibhɛ kɛ ne kuus itsura nibhɛ da nɛ neyi ɛNgɔn ne pharak ka, neyi na kɛ ne ji te ifɛ ifɛ te ihwala da.”

¹⁵ iPhɛ phɛ kɛ te, “Nibhɛ kyinasek ɛyisɛ ɛcuruu ne igbɔm ɛTaanggbey ya, nibhɛ mɔn ɛtomɛ ɛbhɛ gha ne ideng ge ne ɛtuk ne igbey. ɛHaa ɛcuruu ne igbɔm ma, yaa ne cwaal nibhɛ ndɔ ɛlɔ ɛsirim ɛbhɛ.

¹⁶ Sɔng nibhɛ ne tang ta phok ikpyak nang. Sɔng irway nibhɛ ne tang ta has nang, sɔng igbey ne tang ta re nibhɛ nang, sɔng ɛkɔn ne tang ta raate nibhɛ nang.

¹⁷ ɛNgɔn ne ɛpharak ka, ne ɛ so ɛceree ɛcuruu ne igbɔm ma, aa ne teye ɛhaa ne hyep nibhɛ, aa phɛ nɛ nibhɛ ne irwong ne iphɛ bok inɛn ne nang iken. ɛTaanggbey ya yaa ne yes nibhɛ niyilis sa gbik.”