Nikɔn ne kɛ Phaal 6 - ɛWee ne ìTsɛm iHywasɛNgɔn ne ɛPharak ka kɛ Bal iCwɛɛm nilɔ ɛNiitaa Na 1 Ne n yaang ɛli ne ɛNgɔn ne Pharak ka kɛ bala icwɛɛm ɛyisɛ yɛ ndɔ nibhɛ ɛniitaa na. Ne n bok ɛdaan ndɔ nikɔn niken nwaas sa kɛ boote te ɛlɔ ne ɛ kɛ wungare, ɛ bo, “Yɛɛs!” 2 Ne nyɛɛn, ne n yaang ɛrɔghɔ. ɛSaa yɛ bok iwan, ne nang ɛbhɛ ɛkɔn ne ito ne igbɔm, ɛ wuru te ɛnyi ne ɛ kɛ ku re itsom, ne iyɔk ne re itsom be. 3 Ne sɛ ɛNgɔn ne Pharak ka kɛ bala icwɛɛm ne ifaa yɛ, ne n bok ɛhaa ne ifaa yɛ ndɔ nikɔn niken nwaas sa i bo, “Yɛɛs!” 4 iDɛ inantse de ne ihywɛ so isheng ngɛ ne wuru. Ne nang ɛsaa yɛ ito ne aa ba irway ne laal ndɔ ɛzay ya ɛ te ninyi na yaa hal en nibhɛ hyɛghɛ en. Kaa ne nang ɛbhɛ ɛgbaang ɛwal. 5 Ne sɛ ɛNgɔn ne Pharak ka kɛ bala ɛlɔ icwɛɛm ne itwat tɛ, ne n phok ɛhaa ne itwat tɛ ndɔ nikɔn niken nwaas sa i bo, “Yɛɛs!” Ne nyɛɛn, n yaang inantse ishii. ɛSaa yɛ bok iziring ne tɛrɛk irighitik ne iwɔ ɛbhɛ. 6 Ne n ji kyi ta phok ɛdɛ ɛkɔn na kɛ boote te izɔlɔs ɛceree nikɔn niken nwaas sa ɛ bo, “Sɛ́ bo ijam ɛtomɛ ɛtuk ɛdaan ɛlɛbura, ne say ne ɛgyuuru ɛlikama ɛdaan, ne bo ijam ɛtomɛ ɛtuk ɛdaan ɛlɛbura ne say nɛ nigyuuru itwat ne ibɔrɔk ne ibaali. Sɔng ne bees Niphaa na nɛ nihon ne inɛn ɛnap ba nang.” 7 Ne sɛ ɛNgɔn ne Pharak ka kɛ bala icwɛɛm ne nwaas sɛ, ne n bok ɛhaa ne nwaas sɛ ndɔ nikɔn niken nwaas sa i bo, “Yɛɛs!” 8 Ne nyɛɛn, ne n yaang inantse ne ihywɛ kɛ haatel te ɛtura ne igbey kɛ tang inɛn ne. I bok ɛsaa yɛ iKu, ɛLɔ ne iKpom ne i kungus ɛbhɛ ɛtsim. Ne nang nisaa yɛnaa nggyɛ wo ito tɛ nibhɛ bo ihywa, ne iyɔm, ne ishwa igywebhe, gbik ne ᐩinyam ɛhay nibhɛ phobho ne ihop idaan ndɔ ne ihop nwaas ɛzay de. 9 Ne sɛ ɛNgɔn ne Pharak ka kɛ bala icwɛɛm ne iwii yɛ, ne n yaang ikpen ninyi da ne kaa phobho nibhɛ daa ɛli nɛ nibhɛ kɛ tɔng ibol ɛTaanggbey de, nibhɛ ta nang ishɛɛda yɛwo, so ndɔ ɛta ɛraa ne hap itsanga. 10 Nibhɛ yeres ne izɔlɔs nziinzay nibhɛ bo, “ɛDaray ne iTo Gbik, ne ɛ so kang, ɛhaa ne itin, ne nggyibhii ne ɛ sɛ bol ninaa ɛzay ya ɛshara gha, ɛ bak nibhɛ nggbang daa ɛli nɛ nibhɛ kɛ lok neyi mos saa?” 11 Ne nang ɛrɔngɔ ɛtura ɛdɔrɔng ɛhala yɛ, ne ji yaak nibhɛ te nibhɛ kyi shɛɛ yak te kyi shwaak ɛnu nitaay ɛtomɛ nibhɛ na nɛ nigwaa nibhɛ na ne yaa ma phobho ɛli ne kaa ma phobho nibhɛ wo. 12 Ne sɛ ɛNgɔn ne ɛpharak ka kɛ bala icwɛɛm ɛtaraa yɛ, ne nyɛɛn, n yaang ɛzay ya kɛ rungket gbom, iroy de ne hyereey iphɛ te isii yɛ te iwulu isii, ifɛl lo gbik ne ma hyereey ifɛ te seng ngɛ tɛ neyi. 13 Niyiyɔrɔ na ne ji les daa ne irywa wo nibhɛ hoghɛse ndɔ ɛzay ya te ɛli ne ikpam iven ɛpharang ne ɛgbaang ne igbil i suun. 14 iRywa wo ne habharet te ɛkpangga, ne baas ibarang ngge ne ikpop inɛn da ɛlɔ gha ne ifɛ sonɛ wo. 15 Nigɔm ɛzay ya, ne igbaang ninyi na, nɛ nindiinday nisooja na, nɛ ninaa ne iryat ta, nɛ ninaa ne ihwet ta, ne ɛbyin ninyi na, nikpuru na, gbik nɛ ninyi na nibhɛ bok ishwɛɛ ne ito nibhɛ, ne bhɛ rɛrɛs en ndɔ ne itak, ne ndɔ ne ikpɛɛ daa ne ibarang. 16 Nibhɛ ne salan nibhɛ yaak ibarang ngga ne ikpɛɛ da, “Hoghɛsɛ ɛn daa mos te ɛ cwaal ɛn njwii, ɛlɔ ne ɛhaa ne soos ɛcuruu ne igbɔm ma yaa yung yaang njwii, njenjek ɛNgɔn ne Pharak ge ta sɛ njwii. 17 Daa ɛli ne ɛgbaang ɛtuk ne njenjek nibhɛ wo kɛ ne tuu. ɛHay ɛbhɛ yaa yɛɛ ne kyinak kɛɛ?” |
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
Nigeria Bible Translation Trust