Nikɔn ne kɛ Phaal 5 - ɛWee ne ìTsɛm iHywas

ɛWee ne iHuhu gbik ne ɛNgɔn ne ɛPharak

¹ Ne n yaang ɛwee ne ihuhu ne kɛ harap ne iwɔ ne irwye ɛnyi gha ne ɛ kɛ soos ɛcuruu ne igbɔm ma. Ɛbhɛ bok ivol ne kɛ haa nɛ ndɔ yɛ gbik ne ɛtsim mɛ, kɛ harap i baa ɛbhɛ nilɔ ɛniitaa i ji baa ne icwɛɛm.

² Ne n yaang ɛgbaang ɛmalɛka ɛɛ bol ne ɛgbaang ne izɔlɔs, ɛ bo, “ɛHay ɛbhɛ kɛ hɔn aa bala icwɛɛm ne ɛwee ne ihuhu wo, ɛ ta phaal le?”

³ Sɔng ne sɛ ɛnyi daa ne irywa, ne ndɔ ɛzay, gbik ne ndɔ ɛta ne ivel la ne ɛ kɛ hɔn aa yɛɛ ne phaal ɛwee ne ihuhu yɛwoo nggyɛ wo ɛ ta yɛɛ ne tɔng ngɛ nang.

⁴ Ne n san gbom, ɛlɔ ne hame kɛ sɛ ɛnyi gha ne ɛ kɛ hɔn ɛ sɛ phaal ɛwee ne ihuhu wo ɛ ta tɔng ngo.

⁵ ɛDaan ndɔ ninu nikɔɔn na ne yaak me, “Sɔng ɛ san no nang. Yaang! iZaa de ne ihywɛ le ne icwaang ɛYahoda wo, ne ijwee ɛDoda wo, kɛ ku re ɛwɛng. Ɛ kɛ ne hɔn aa phaal ɛwee ne ihuhu wo, ɛ ta bala icwɛɛm nilɔ ɛniitaa na gbik.”

⁶ Ne n ji yaang ɛngɔn ne Pharak, ɛ so te kɛ hyɛ ɛbhɛ, ɛ kɛ kyinak ɛceree cɛcɛk ne ɛcuruu ne igbɔm ma, nikɔn niken na, nɛ ninu nikɔɔn na kɛ te ɛbhɛ gyɔɔ. ɛNgɔn ne Pharak ka bok igbumɛ ɛniitaa ne irwisɛ ɛniitaa ne ifɛ soye ikpabyik ɛniitaa ɛTaanggbey ba ne kɛ tom ifɛ ndɔ ɛzay ya gbik.

⁷ ɛNgɔn ne Pharak ka ne yɛɛs ɛ say ɛwee ne ihuhu wo ne ɛbhɛ so ne iwɔ ne irwye ɛhaa ɛcuruu ne igbɔm ma.

⁸ Ne sɛ ɛNgɔn ne Pharak ka kɛ say ɛwee ne ihuhu wo, nikɔn niken nwaas sa, nɛ ninu nikɔɔn nzuwubɔ ifaa nɛ nibhɛ nwaas sa ne ji ho ɛnu ɛyisɛ ɛNgɔn ne Pharak ka. ɛRɔngɔ bok iguwu, ne ɛkpɛɛt ne izinariya i kɛ yɛk ne ɛturarɛ hyɔrɔ nɛ ne ndɔ yɛ. ɛTurarɛ yɛwo nggyɛ wo ɛbhɛ soye ɛroo ninyi ɛTaanggbey ya nɛ nibhɛ roro.

⁹ Nibhɛ ne ji yaak ne iywel ifas, nibhɛ bo, “ˆƐ kɛ hɔn aa bo ɛwee ne ihuhu wo, ˆɛ ta bal icwɛɛm mɛ. Daa ɛli ne kaa phoo yɛ, ne lenɛ nɛ neyi mo na ɛ say ɛTaanggbey ye ninyi gbarang. Ninyi yɛ ne le ne itaang ɛzay de, gbik ne ilwem ɛzay de, ne ihywee ɛzay de gbik ne igbagha ɛzay yo.

¹⁰ ˆƐ kɛ yɛk ngɛ nibhɛ teye ninaa ne re igbɔm nɛ nibo, te nibhɛ mɔn ɛTaanggbey ye ɛtomɛ, nibhɛ ta re igbɔm ɛzay.”

¹¹ Ne sɛ nggɛ yɛɛn ne n bok ᐩizɔlɔs ne nimalɛka nɛ nibhɛ kɛ ne hɔn ninom ma daa ɛco ninom nɛ nibhɛ kɛ hɔn ᐩishin daa ɛco ne ᐩishin gbarang. Nibhɛ kɛ te ɛcuruu ne igbɔm ma nɛ nikɔn niken nwaas sa, nɛ ninu nikɔɔn nzuwubɔ ifaa nɛ nibhɛ nwaas sa gyɔɔ gbik.

¹² Nibhɛ ne i yaak ne iywel ne izɔlɔs nziinzay nibhɛ bo, “ɛNgɔn ne Pharak ka ne kaa hyɛ wo kɛ hɔn ɛlɔ yɛ ne ɛ sɛɛ say ito, ne iryat, ne ntsɛntsɛng, ne ihwet, ne igbɔm, ne ndiinday, ne idɛp.”

¹³ Ne n ji ta phok gbik nikɔn na ne ɛTaanggbey ya kɛ ryɔng wo, nɛ nibhɛ so daa ne irywa wo, ne ndɔ ɛzay ya, ne ndɔ ɛta ne ivel la, ne ndɔ ɛling nga. Gbik nɛ nikɔn na nɛ nibhɛ sonɛ ndɔ yɛwo, nibhɛ yaak ne iywel nibhɛ bo, “Te seng wu idɛp, ne igbom, ne ndiinday ne ihwet idee ne ishay-ishay, so idee ɛhaa ne ɛ kɛ soos ɛcuruu ne igbɔm ma, ne ɛNgɔn ne Pharak ka!”

¹⁴ Nikɔn niken nwaas sa ne kyii nɛ nibhɛ yɔngɔ, “Ɛɛy!” Ninu nikɔɔn na ne ji ho ne ivel nibhɛ re ɛTaanggbey ye ntsong.