Nikɔn ne kɛ Phaal 3 - ɛWee ne ìTsɛm iHywas

ìTom ne iPhɛ Phɛɛs ɛLɔ ne iDira Ninaa ne Roos ne iSadis

¹ Haa ɛmalɛka ne idira ninaa ne roos ne iSadis sa nɛ te ɛ yaak nibhɛ, iBol lɛdee bɛ ne iphɛ le ɛlɔ ɛnyi gha ne ɛ bok iKpabyik ɛniitaa ɛTaanggbey da nɛ niYiyɔrɔ ɛniitaa na. Nzi yɛɛ nikɔn na ne ɛ mɔn no gbik, i wɛɛ yɛ te ɛ so ɛken kaabi ɛ so ikom.

² Seme! Te ɛ ryɔng ɛbyin ɛkɔn na ne ɛ kɛ mak ndɔ ne ihywel ne roos mo da ne ɛ yunga ku wo, daa ɛli ne nzi yaang sɔng ihywel ne roos mo da so hyɔrɔ ɛnu ɛyisɛ ɛTaanggbey nge gha nang.

³ iPhɛ ɛlɛy, ne ɛ taate nɛ nikɔn na ne kaa mɛmɛ yɛnɛ wo, ɛ say yo. San ɛbɔk te ɛ roos itin de. Wu ɛ kɛ ne sang seme wo, naa ne yɛɛs sɛ te ɛhaa ɛyi, sɔng ɛ sɛ ne yɛɛ nten de ne naa yɛɛs nɛ nang.

⁴ Gbik ne phɛ ɛlɛy, nidɛng ne sonɛ ncɛt ndɔ iSadis de nɛ nibhɛ hyel wɛwɛy, sɔng nibhɛ kɛ kpɔtɔk ghe ne ɛfɔt to nang. Nibhɛ sɛ hyel ne mee ne itsura ihwala ne ibek nibhɛ daa ɛli nɛ nibhɛ kɛ hɔn ɛlɔ yɛ.

⁵ Gbik ɛnyi gha ne ɛ kɛ re ɛwɛng ne itsom mɛghaa wo, sɛ́ ne ma sɔɔl ɛbhɛ ɛtura ɛhala wo tɛ ninyi yɛnaa nggyɛ wo. Sɔng naa ne tul irywɛɛk ɛbhɛ ndɔ ɛwee ne iken no nang. Nzɛ ne kyinak ɛnu ɛyisɛ ɛKyɛɛ nge gha, gbik nɛ nimalɛka n yaak n yɔng wu ɛ soye ɛhaa nge.

⁶ Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ne ninaa ne roos de.

ìTom ne iPhɛ Phɛɛs ɛLɔ ne iDira Ninaa ne Roos ne iFiladafiya

⁷ Haa ɛmalɛka ne idira ninaa ne roos ne iFiladafiya na nɛ te ɛ yaak nibhɛ, iBol lɛdee bɛ ne iphɛ le ɛlɔ ɛnyi gha ne ɛ kɛ tul le kang ɛ so ɛhaa ne itin na. ɛNyi gha ne ɛyaaya igbɔm ɛGɔm ɛDoda gha, ne i sɛ ɛ kɛ phaal ɛhak ɛnyi gha sang yɛɛ ne gangke wo, ne sɛ ɛ kɛ gangke wo ɛhak ɛnyi gha sang ta yɛɛ ne phaal lo.

⁸ Nzi yɛɛ nikɔn na ne ɛɛ mɔn no gbik. Nzi yɛɛ ihwet mo da so ncɛt, gbik ne iphɛ ɛlɛy ɛ kɛ roos imɛmɛ nge da gbik, sɔng ɛ kɛ ton irywɛɛk nge wo nang. Nggɛ ne phaal ɛnu ne izuk ɛnu ɛyisɛ mo ne hame ɛnyi ya yɛɛ ne gangke yɛ.

⁹ Ninyi na nɛ nibhɛ i bok itso nibhɛ da wu i soye niYahodawa na kaabi nibhɛ sang kyi soye nɛ wo. Nibhɛ soye ninaa ne irywɛɛk, ɛguu ninyi ɛShɛtan. Nzi tɔng ngɛ, naa ne yɛk nibhɛ nɛ nibhɛ yɛɛs nibhɛ ho yɛ ne iphanta. Nibhɛ yaa ne ji seng wu nzi sim-mɛ.

¹⁰ Daa ɛli ne ɛ kɛ bo ɛbɔk ka ɛ hyep ibol nge de, nzɛ ne ma hyep pɛ nten ne nggbang ngɛdee nggyɛ wo ne mpɛ sɛ yɛɛs ninaa ɛzay ya gbik ko te phɔwɔ nibhɛ wo.

¹¹ N yaaso, sɔng ne bees nten nang. iPhɛ ɛlɛy ne ɛ wum ɛkɔn na ɛ bok ko gɛgɛy ɛlɔ ne ɛdɛ ɛnyi yaa yung phɔt ɛkɔn ne ito ne igbɔm ɛwɛng mo gha ne ɛ kɛ re wo.

¹² Gbik ɛnyi gha ne ɛ kɛ re ɛwɛng, naa ne te ɛbhɛ ɛ teye ɛkangashi ne ideng ɛTaanggbey nge de, sɔng ne ɛ tang wuru ne ideng nge de nang. Naa ne haa irywɛɛk ɛTaanggbey nge wo gbik ne irywɛɛk ɛgarang ɛTaanggbey nge wo daa ɛbhɛ. ɛGarang nga ne ɛbhɛ soye iYɛrushɛlɛm iphas de ne iphɛ le daa ne irywa ɛTaanggbey nge wo. Nzɛ ne ta haa irywɛɛk ifas nge wo daa ɛbhɛ dɔng.

¹³ Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de.

ìTom ne iPhɛ Phɛɛs ɛLɔ ne iDira ne Ninaa Roos ne iLɔdakiya

¹⁴ Haa ɛmalɛka ne idira ninaa ne roos ne iLɔdakiya na nɛ te ɛ yaak nibhɛ, iBol lɛdee bɛ ne iphɛ lɛ ɛlɔ ɛnyi gha ne i yeres ɛbhɛ Ɛɛy ya, ɛshɛɛda gha ne ɛ so sɛ kyinak daa ne ibol ɛbhɛ de, ɛnyi gha ne ɛbhɛ ɛ bok igbɔm ba daa nikɔn na ne ɛTaanggbey ya kɛ ryɔng ngo.

¹⁵ Nzi yɛɛ nikɔn na ne ɛ mɔn no gbik. Sɔng ɛ so ntsentseng nang, sɔng ne ɛ kyi ta so kpikpiy nang. Sɛ ma yung yɔng ɛ soyɛ ɛkɔn ɛdaan ndɔ nikɔn nɛ́naa wo.

¹⁶ Daa ɛli ne ɛ so byim mo, ɛ sang so kpikpiy ɛ sang kyi ta so ntsentseng ngo, naa ne tuk kyi yɛ, te ncwincway, ndɔ ɛnu nge gha.

¹⁷ iPhɛ dee ɛ bo, “N bok iryat, sɔng nzi ta sim ɛkɔn nang,” kaabi ɛ soyɛ ɛhala yɛ, ɛkɔn ne san iyɔm. Ɛ so ɛkɔn ncwa, ɛhaa ne iwil, ɛ so nkywankywaang.

¹⁸ iPhɛ ɛlɛy, nzi ne kpɛng ngɛ, yɛɛs ɛ say izinariya de ɛlɔ nge, izinariya de ne kɛ halang i tul ishoo yɛ, te ɛ sɛ iryat de. Yɛɛs te ɛ say itsura ihwala da ɛlɔ nge dɔng te ɛ cwaal ne nkywankywaang mo de ne iphɛ soye ɛkɔn ncwa gha. Te ɛ ta say ihwal ne irwisɛ ne aa yɛk ne irwisɛ mo da te ɛ yaa wɛɛ yɛnɛng.

¹⁹ ɛNyi gha ne nzi sim, ɛbhɛ ne nzi ne nep n da i gbaat. iPhɛ ɛlɛy ne ɛ kyinak ndɔ ne itin, ɛ san ɛbɔk.

²⁰ Mee woo bɛ nggɛ kyinak ɛnu ne izuk, nzi hal ɛnu ne izuk ka. Gbik ɛnyi gha ne ɛ kɛ ne phok izɔlɔs nge de ɛ phaal ɛnu ne izuk ka, naa ne lel, naa ne re ɛkyee ɛdaan nɛ ne ɛbhɛ, ɛ ma re ne mee.

²¹ Gbik ɛnyi gha ne ɛ kɛ re ɛwɛng ndɔ ne itsom mɛdee wo, nzɛ ne nang ɛbhɛ ɛnkiinɛ ɛ soos ne mee ɛcuruu ne igbɔm nge gha te ɛli ne nggɛ ma re ɛwɛng nga nggɛ soos ne ɛKyɛɛ nge gha ɛcuruu ne igbɔm ɛbhɛ gha.

²² Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de.