Nikɔn ne kɛ Phaal 2 - ɛWee ne ìTsɛm iHywas

ìTom ne iPhɛ Phɛɛs ɛLɔ ne iDira Ninaa ne Roos ne iFisus

¹ “Haa ɛmalɛka ne idira ninaa ne roos ne iFisus nɛ te ɛ yaak nibhɛ,” “iBol lɛdee bɛ ne iphɛ lɛ ɛlɔ ɛnyi gha ne ɛ bok niyuyɔrɔ ɛniitaa na ne iwɔ ne irwye ɛbhɛ wo, ɛnyi gha ne ɛɛ hyel ndɔ ɛceree ne ncwɛng ne izinariya ɛniitaa da ne i tes ne ifitila da shak ko.

² Nzi yɛɛ nikɔn na ne ɛ kɛ mɔn, nzi yɛɛ ɛtomɛ gha ne ɛ kɛ kyangase nɛ, ne ɛbɔk ka ne ɛ bok. Nzi yɛɛ ɛli ne hame ɛ bok ɛbɔk ka nɛ nibebhe ninyi na, nzi ne yɛɛ ɛli ne ɛ kɛ tɛrɛk ninyi na nibhɛ bo wu i soye ninɔn ne tom ma, kaabi nibhɛ sang kyii soye nɛ wo, ɛ ji seng wu nibhɛ soye ne nibo ne irywɛɛk ka.

³ Nzi yɛɛ ɛ bok ɛbɔk, ɛ kɛ ne sɔ nggbang gagak ɛlɔ ne irywɛɛk nge wo, sɔng ɛ kɛ ne te kpos nang.

⁴ Gbik ne iphɛ ɛlɛy, ne so ibol lɛdee bɛ ne n bok ne igyɛ, ɛ kɛ kyi hana ishwim ba ne ɛ kaa tsa ɛ bok ko.

⁵ Taate ne ɛlɔ gha ne ɛ kɛ tsa ɛ sonɛ nyɛɛn ɛ kyi ho wo. Nzi bok kɛ, hana ɛfɔt mo wo, te ɛ kyi yaa mɔn nikɔn na ne ɛ ka tsa ɛɛ mɔn no. Wu ɛ kɛ sang hana ɛfɔt to, naa ne yɛɛs ɛlɔ mo gha, n ba ɛntsɛng ne tek ɛpitila mo wo ɛlɔ gha ne ɛbhɛ sonɛ wo.

⁶ ɛDɛ ɛkɔn na ne sonɛ ne ɛ kɛ mɔn ne ɛ kɛ jam me; ɛ kɛ mbaray yɛ imɛmɛ ninyi ne iNikɔla ɛli ne nggɛ ma mbaray me.

⁷ ‘Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de. Gbik ɛnyi gha ne ɛ kɛ ne re ɛwɛng daa ne itsom mɛdee wo, nzɛ ne nang ɛbhɛ ɛnkiinɛ ne ɛ re ikpam ɛHon ne Nang iKen de ne ɛ so ndɔ ne ihwap ɛTaanggbey da.’ ”

ìTom ne iPhɛ Phɛɛs ɛLɔ ne iDira Ninaa ne Roos ne iSimirina

⁸ Haa ɛmalɛka ne idira ninaa ne roos ne iSimirina de nɛ te ˆɛ yaak nibhɛ, iBol lɛdee bɛ ne iphɛ le ɛlɔ ɛnyi gha ne ɛbhɛ ɛ so ɛYisɛ yɛ ne ɛTsim mɛ wo, ɛnyi gha ne ɛ kɛ ku ɛ kyii ta so ɛken na.

⁹ Nzi yɛɛ nggbang ngga ne ɛ sonɛ wo, nzi ne ta yɛɛ ihala mo de, gbik ne iphɛ ɛlɛy, ne ɛ bok iryat ne iKabyik. Nzi yɛɛ ivol ba ne i bees sɛ nɛ wo, ninyi na nɛ nibhɛ i bok itso nibhɛ da wu i soye niYahodawa na kaabi nibhɛ sang kyi soye nɛ wo. Nibhɛ soye ɛguu ninyi ɛShɛtan.

¹⁰ Sɔng ɛ phok ɛnik ne nggbang ngga ne ɛ yungaa sɔ wo nang. Nzi tɔng ngɛ ɛShɛtan na yaa bo ɛbyin mon ɛbhɛ rop nibhɛ ndɔ ne ijwee ne nyang te ɛ sɛ ɛ phɔwɔ nyini, ne ɛ sɔ ɛn nggbang ngga nituk ɛnduwubɔ. Kyinak ndɔ ne ìnang ne itin mon de, kɛsim i phoo yɛ, naa ne nang ngɛ ɛkɔn ne ito ne igbɔm ne iken.

¹¹ Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de. Gbik ɛnyi gha ne ɛ kɛ ne re ɛwɛng daa ne itsom mɛdee wo, sɔng iku ne ifaa de sɛ ne dat nibhɛ nang.

ìTom ne iPhɛ Phɛɛs ɛLɔ ne iDira Ninaa ne Roos ne iBirigamu

¹² Haa ɛmalɛka ne idira ninaa ne roos ne iBirigamu de nɛ te ɛ yaak nibhɛ, iBol lɛdee bɛ ne iphɛ le ɛlɔ ɛnyi gha ne ɛ bok ɛwal ninu ifaa ne ɛbhɛ re gbom mo.

¹³ Nzi yɛɛ ɛlɔ gha ne ɛ sonɛ wo soye ɛlɔ ne ɛShɛtan bok ne igbɔm. Gbik ne phɛ ɛlɛy, ɛ kɛ ne wum irywɛɛk nge gɛgɛy, sɔng ɛ kɛ hana ìnang ne itin mo da ne mee wo nang. Ɛ kaa ma yung mɔn ɛlɛy nten de ne kaa phoo ɛNtipas se ne ɛ kaa soye ɛshɛɛda nge gha ne sɛ say ibol ɛbhɛ ndɔ ɛgarang mon na ne ɛShɛtan na bok ne igbɔm ba.

¹⁴ Gbik ne phɛ ɛlɛy, ne ɛ jung bok nidɛng nikɔn na ncɛt daa ne ito mo ne hame nzi sim. Nidɛng sonɛ ndɔ mon no nɛ nibhɛ kɛ roos ihywee ne imɛmɛ ɛBalamu, ne ɛ kaa mɛmɛ ɛBalak ghe nɛ ɛ te niSɛrɛla na mɔn ɛfɔt, nibhɛ re ire ne kɛ hap igunkyi ne itsanga, nibhɛ ta i ra nzangas.

¹⁵ ɛLɛy dɔng, ne ɛ ta bok nidɛng ninyi na nɛ nibhɛ roos imɛmɛ ninyi ne iNikɔla ndɔ mon no.

¹⁶ San en ɛbɔk. Wu ɛ kɛ ne tang san ɛn ɛbɔk ka, naa ne yɛɛs dodooy ne n da itsom nɛ ninyi yɛnaa nggyɛ wo ne ivol da ne ifɛ wuusi ɛnu nge gha ifɛ re te ɛwal lo.

¹⁷ Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de. Gbik ɛnyi gha ne ɛ kɛ ne re ɛwɛng daa ne itsom mɛdee wo, naa ne nang ɛbhɛ idɛng ndɔ ne imana de ne kɛ rɛɛ wo. Naa ne ta nang ɛbhɛ ikɛɛ ihala ne kɛ haa ne irywɛɛk ifas ne hame ɛnyi iyɛɛ kang ne ɛnyi gha ne ɛ kɛ say iphɛ wo.

ìTom ne iPhɛ Phɛɛs ɛLɔ ne iDira Ninaa ne Roos ne iTiyatira

¹⁸ Haa ɛmalɛka ne idira ninaa ne roos ne iTiyatira de nɛ te ɛ yaak nibhɛ, iBol lɛdee bɛ ne iphɛ le ɛlɔ ɛnyi gha ne ɛ so ɛNgɔn ɛTaanggbey ya, ne irwisɛ ɛbhɛ da i tol te ilem ne igboo wo, ita ɛbhɛ de ta i tol hyahyak te igyɔs de ne i bok ihywɛ itagula de ne kɛ phan no.

¹⁹ Nzi yɛɛ nitomɛ mo ne ishwim mo gbik ne ìnang ne itin mo. Nzi ne yɛɛ ɛtomɛ mo gha ne ɛ phyighis nigwaa mo na nɛwo, gbik ne ɛbɔk mo gha. Nzi yɛɛ wu ɛtomɛ mo gha ɛlyilyɛghaa phyin ɛhaa ɛyisɛ mo gha.

²⁰ Gbik ne phɛ ɛlɛy, ne ɛ jung bok nidɛng nikɔn na ncɛt daa ne ito mo ne hame nzi sim. Ɛ kɛ sim ibol ɛkuk ge ne i bok ɛbhɛ ɛJɛjɛbhɛl la, ne ɛ yeres ito ɛbhɛ de ɛnɛbi gha. I lenɛ ne imɛmɛ ɛbhɛ ne ɛ dyɛɛl nikpuru nge na nibhɛ ra nzangas, nibhɛ ta hap igunkyi itsanga.

²¹ Nggɛ ne nang ɛbhɛ nten te ɛ san ɛbɔk ndɔ ra nzangas ɛbhɛ de, ɛ kɛ ne mbaray.

²² iPhɛ ɛlɛy, naa ne cwaak ɛbhɛ ɛlɔ ne laal ne isha. Gbik ninyi na nɛ nibhɛ ra nzangas de ne ɛbhɛ wo nang, naa ne bak nibhɛ ɛgbaang ne nggbang. Naa mɔn ɛlɛ wo wu nibhɛ kɛ sang san ɛbɔk daa ne ihywee ne ishwɛɛ ɛbhɛ da.

²³ Naa phobho ninyi na nɛ nibhɛ roos imɛmɛ ɛJɛjɛbhɛl da, gbik ijwira ninaa ne roos sa yaa seng wu mee nzi wɛɛ ɛduk ne irway ya ɛnyi gha gbik ne icwas ɛbhɛ da. Nzɛ ne tal ɛrɔngɔ nɛ ndɔ mon kancɛng ne ɛkɔn na ne ɛ kɛ mɔn.

²⁴ “ɛLyilyɛghaa wo, nzi ne bol ne ɛbyin mon ne ɛ so ɛn ne iTiyatira de, ne ɛ kɛ shɛɛ tang roos ɛn ibol ɛJɛjɛbhɛl de, ɛ mbaray ɛn nyini tang mɛmɛ ɛn ne ibol de nɛ ninaa ne roos ɛbhɛ i yeres ɛbhɛ, ‘ɛDuk ne ivol ɛShɛtan na.’ Nzi ne bok nyini sɔng naa ta hante nyini ne idɛ irighitik ge nang.

²⁵ ɛKɔn na ne nzi sim ne nyinɛn no so ɛlɛ, ku boos ɛn ibol de ne ɛ bok ɛn no n phyii yɛɛs.

²⁶ Gbik ɛnyi gha ne ɛ kɛ ne re ɛwɛng daa ne itsom mɛdee wo, ɛ mɔn ɛkɔn na ne nzi sim phyii hɔn itaal lɛ nzɛ ne nang ɛbhɛ igbɔm daa ne igbagha ɛzay.

²⁷ Ɛ sɛ ne re igbɔm ba daa nibhɛ wo ne ihwet, te sɛ yɔng wu ɛɛ hal nibhɛ ne ɛntsɛng ne igyɔs. Ɛ sɛ́ ne phɔsɔm nibhɛ, tɛ nibhɛ so iron ne itsom.”

²⁸ “ɛLi ne nggɛ say igbɔm da ɛlɔ ɛKyɛɛ nge gha, nzɛ ne nang ɛbhɛ igbɔm ba, ne n da nang ɛbhɛ ɛyuyɔrɔ ɛ ɛraam ne ihwɛlɛ gha.

²⁹ “Gbik ɛnyi gha ne ɛ bok itoro, te ne ɛ tenes ɛkɔn na ne iKabyik ge i tɔng idira ninaa ne roos de!”