Biblia Todo Logo
Bìoball air-loidhne

- Sanasan -

Nikɔn ne kɛ Phaal 19 - ɛWee ne ìTsɛm iHywas


Kɛ Dɛp ɛTaanggbey ye daa ne iRywa

1 ɛTsim mɛ ɛlɛy, ne n phok ɛdɛ ɛkɔn na te izok ninyi maa nɛ nibhɛ yaak ne iywel ɛ le daa ne irywa, ɛ bo, “Te dɛp ɛTaanggbey ye! iPhɔrɔt ne ndiinday ne igbɔm so ivaa ɛTaanggbey njwɛɛn da.

2 ɛShara gha ne ɛTaanggbey ya kɛ bol ɛ so itin nɛ, ɛ so cik. Ɛ kɛ hyɛ ɛgbaang ɛkuk ne re shwaa gha ɛshara, ɛkuk ka ne ɛbhɛ kɛ bees ɛzay ya ne ishwɛɛ ne nzangas ɛbhɛ da. ɛTaanggbey ya kɛ hyɛ ɛbhɛ ɛshara gha, ɛ kɛ yɛk ɛbhɛ nɛ ɛ tal neyi nikpuru ɛTaanggbey ya.”

3 Nibhɛ ne ta kyii ta tɔɔk izɔlɔs de nibhɛ yɔngɔ, “Te dɛp ɛTaanggbey ye! Ngkoy ne wɔɔ ɛgarang ngɛghaa wo i tuk mpɛ phɛɛs daa ne irywa mpɛ i tuk ishay-ishay.”

4 Ninu nikɔɔn nzuwubɔ ifaa nɛ nibhɛ nwaas sa, nɛ nikɔn niken nwaas sa ne hoghɛse ne ivel nibhɛ re ɛTaanggbey yegha ne ɛ kɛ soos ɛcuruu ne igbɔm ma ntsong. Nibhɛ ne yaak ne iywel nibhɛ bo, “Ɛɛy! Te dɛp ɛTaanggbey ye.”

5 iDɛ izɔlɔs de ne le ɛlɔ ɛcuruu ne igbɔm ma ihywɛ yɔngɔ, “Dɛp ɛn ɛTaanggbey njwɛɛn na, nyinɛn nikpuru ɛbhɛ na. Nyinɛn no ne ɛ phok ɛn ɛnik ɛbhɛ wo, nindiinday nɛ ninɔn.”


iDira ɛWɛrɛ ɛNgɔn ne ɛPharak

6 ɛTsim mɛ ɛlɛy ne n da phok ɛdɛ ɛkɔn na te izok ninyi maa, te izok ɛyuus inɛn ne ɛ tel, te irywa ne tɛɛ. Ne n phok izɔlɔs sɛ bo, “Dɛp ɛn ɛTaanggbey ye! Daa ɛli ne ɛDaray ɛTaanggbey njwɛɛn na ɛbhɛ ɛ soye ɛHaa ne iTo gbik, ɛbhɛ ɛ soye ɛhaa ne re igbɔm!

7 Te njwɛɛn yɛk irway ihwala! Njwɛɛn yɛk izinɛ ne ishwɛ te njwɛɛn nang ɛbhɛ ne ndiinday! Daa ɛli ne nten nɛ kɛ tuu, nten ɛwɛrɛ ɛNgɔn ne ɛpharak ge. ɛYɛl ɛbhɛ wo kɛ ne ku ryɔng nge gbik.

8 Kɛ nang ɛbhɛ ɛtura ne ililing ɛwɛwɛy yɛ kyɔsɔk te ɛ sɔɔl le.” ɛTura ne ililing ngo ɛbhɛ so tɛ nitomɛ niyɛnɛng ninyi ɛTaanggbey ya.

9 ɛMalɛka gha ne yaak me, “Haa ɛbɛ: ‘Ninaa ɛwɛng ngaa nggyɛy ne kɛ mɔng nibhɛ idira ɛwɛrɛ ɛNgɔn ne Pharak ge.’ ” Ne ɛ ta yaak me, “iBol lɛdee wo so ibol ɛTaanggbey, iphɛ ne so itin nɛ.”

10 Ne n ho ne ita ɛbhɛ te n re ɛbhɛ ntsong. Ne ɛ yaak me, “Yɛwɛy! Sɔng ˆɛ mɔn ɛlɛ wo nang! Ma nzo me ɛkpuru ɛYɛso gha te igyɛ wo nɛ nigwaa mo ninaa ne roos sa nɛ nibhɛ i naas ishɛɛda ne itin de ne ɛYɛso gha kɛ phaal lo. ɛTaanggbey ne ˆaa re ɛbhɛ ntsong ngga.” Daa ɛli ne itin de ne ɛYɛso gha kɛ phaal lo i nang ihwet ne tɔng ibol ɛTaanggbey de.


ɛNyi ne ɛ So daa ne ɛRɔghɔ

11 Ne n yaang irywa wo phere, ɛrɔghɔ sonɛ. I bok ɛsaa yɛ ɛHaa ne sɛ Kyinak ne iBol ɛbhɛ ne ɛHaa ne iTin. Ɛ ne bol ɛshara ɛbhɛ gha ne itsom ɛbhɛ de cik.

12 iRwisɛ ɛbhɛ da so te ilem ne igboo, nikɔn ne ito ne igbɔm gbom ne so daa ne ito ɛbhɛ. Kɛ ne haa ɛbhɛ ne idɛ irywɛɛk ko ne wɛlɛng ɛnyi ne ɛ yɛɛ ɛnting ngɛ kang ne ɛbhɛ wo.

13 Ne ɛ yɛk ghe ne ɛtura ɛdɔrɔng ne kɛ sɔɔl ndɔ neyi, ne i bok irywɛɛk ɛbhɛ “iBol ɛTaanggbey.”

14 iDira nisooja ɛdaa ne irywa na ne i kungus ɛbhɛ, nibhɛ sos daa ne ɛrɔwɔ, nibhɛ bok itsura ne ililing ihwala yɛ wɛwɛy.

15 iHywa ne ihywɛ re gbom ne wuru ɛnu ɛnyi gha. iHywa yɛdee nggyɛ wo ne sɛ ne bo ɛ re igbagha ɛzay yo ne itsom. Ɛ sɛ re igbɔm ba daa nibhɛ ne ɛntsɛng ne igyɔs. Ɛ sɛ ne pharak nibhɛ ne njenjek ɛTaanggbey ne iTo Gbik ɛli ne i pharak ikpam ɛnap ɛlɔ ne pharak kɛ.

16 Kɛ haal ne ɛtura ɛbhɛ gbik ne igbap ɛbhɛ irywɛɛk kɛwoo bɛ, “ɛGɔm ngɔm, ɛDaray nidaray.”

17 Ne n yaang ɛdɛ ɛmalɛka gha ɛ kɛ kyinak ne iroy. Ne ɛ yel-le ninon gbik nɛ nibhɛ i tel daa ne inɔp be ne ɛgbaang ne izɔlɔs ɛ yɔngɔ, “Yɛɛs ɛ tumɛ ɛn nyini ɛlɔ ne ɛgbaang ne idira ɛTaanggbey de ne ɛ kɛ ku ryɔng ngo.

18 Te ɛ re ɛn ikpom nigɔm, ne ikpom nisooja nɛ nindiinday nibhɛ, ne ivaa inantse nɛ nisaa yɛ. Te ˆɛ re ɛn ikpom ninyi da gbik, ikpom nikpuru ne ivaa ninyi nɛ nibhɛ shɛɛ ishwɛɛ ne ito nibhɛ. iKpom nindiinday ninyi ne ivaa ninɔn.”

19 Ne n ji yaang inyam igywebhe de nɛ nigɔm ɛzay ya gbik nɛ nisooja nibhɛ, nibhɛ kɛ tumɛ en ɛlɔ ɛdaan tɛ nibhɛ ta itsom ne ɛnyi gha ne ɛ so daa ne ɛrɔghɔ wo nɛ nisooja ɛbhɛ.

20 Ne wum inyam be ne ɛnɛbi ne rywɛɛk ka ne ɛ kɛ mɔn nikɔn ne kparat ta daa ne irywɛɛk ne inyam be. Ne nyu nikɔn ne kparat tɛnaa nggyɛ wo ne ɛnɛbi ne rywɛɛk kɛghaa nggyɛ wo kɛ luk ninyi na nɛ nibhɛ kɛ say ɛlamba ne inyam igywebhe gha nibhɛ re izazurum ne ihywɛ de ntsong ngaa. Ne wum inyam igywebhe de ne ɛnɛbi ne irywɛɛk ka i cwaak nibhɛ niken nɛ ndɔ ɛling ne igboo ne ifɛ re ne isɔlifa.

21 Ne ji phobho nisooja nibhɛ na ne ihywa de ne ihywɛ kɛ wuru ɛnu ɛnyi gha ne ɛ kɛ taay ne ɛrɔghɔ wo. Ninon ɛzay ya gbik ne re ikpom mɛ, ɛrɔngɔ re ɛli ne aa yɛɛ nɛ.

© Wycliffe Bible Translators, Inc. and

© the Nigeria Bible Translation Trust 2018

in cooperation with

iTen Language and Bible Translation Project

Nigeria Bible Translation Trust
Lean sinn:



Sanasan