Nikɔn ne kɛ Phaal 13 - ɛWee ne ìTsɛm iHywas

iNyam iGywebhe ne iHywɛ kɛ Wuru ɛLing

¹ Ne n ji yaang idɛ inyam igywebhe de ihywɛ wuusi ndɔ ɛling. iHywɛ bok itso ɛniitaa ne igbumɛ ɛnduwubɔ. iHywɛ bok nikɔn ne ito ne igbɔm daa ne igbumɛ ne ihywɛ da, kɛ haa irɛɛk ne bɛɛs ɛTaanggbey ye ne itso ne ihywɛ da.

² iNyam igywebhe de ne nggɛ yaang ngo so te ɛtsɔy. ɛNu yɛ ne so te ɛhaa ɛkuramanza, ita yɛ ne ngkpɛt tɛ ne so te mbaa ne idɛ inyam be ne i bok ihywɛ ɛbiya. ɛGbaang ne izɔ wo ne ji nang ihywɛ ihwet ɛbhɛ ne ɛcuruu ne igbɔm ɛbhɛ gha ne igbɔm ɛbhɛ gbom.

³ iDɛ ito ne inyam mɛdee nggyɛ wo ne so te kɛ phok iphɛ ikpom gbom ne ifɛ sɛ yɛɛ ne phoo ihywɛ, inyuu yɛ kɛ ne ku bel. iNyam mɛdee nggyɛ wo ne kpuru ihywɛɛ ninyi ɛzay ya gbik, ne sɛ nibhɛ kɛ yaang ɛkɔn ne kparat tɛghaa nggyɛ wo, nibhɛ kpuru en nibhɛ roos ihywɛ.

⁴ Ninyi na ne re ɛgbaang ne izɔ igywebhe de ntsong daa ɛli ne ɛ kɛ nang inyam be ihwet ɛbhɛ da. Nibhɛ ne ma ta re inyam be ntsong nibhɛ bo, “ɛHay ɛbhɛ ji ta so te inyam bee? ɛHay ɛbhɛ yaa yɛɛ ne ta itsom ne ihywɛ?”

⁵ Ne i nang inyam be ɛnu ne bol, ihywɛ ne tɔɔk ito ihywɛ bol ivol ne bɛɛs ɛTaanggbey ye. Ne i ta tek ihywɛ re igbɔm ba iphɛl de nzuwubɔ nwaas ne ifɛ ifaa.

⁶ iNyam be ne tsa bol ivol ne bɛɛs ɛTaanggbey yegha, ihywɛ bɛɛs irywɛɛk ɛbhɛ, ne ɛlɔ ne shɛɛ ɛbhɛ gbik nɛ ninaa nɛ nibhɛ so daa ne irywa wo.

⁷ Kɛ nang ihywɛ ihwet ne ta itsom nɛ ninyi ɛTaanggbey ya te ihywɛ re nibhɛ. Kɛ ne ta nang ihywɛ igbɔm daa ne icwaang ɛzay, ne ihywee ɛzay de, ne ilwem ɛzay da gbik ne igbagha ɛzay yo.

⁸ Gbik ninyi ɛzay ya sɛ́ ne re inyam be ntsong kang nɛ ninaa ne kaa ku haa irɛɛk nibhɛ de ndɔ ne ɛWee ne iKen no. ɛWee ne iKen no soye ɛwoo ɛNgɔn ne ɛpharak ko ne kaa phoo ɛbhɛ wo. Kaa ne ku haa irɛɛk nibhɛ de nten de ne kaa tang ryɔng ɛzay ya.

⁹ Gbik ɛnyi gha ne ɛ bok itoro, te ne ɛ tenes!

¹⁰ Wu kɛ ku ryɔng ngɛ sɛ́ rop pɛ, sɛ ne rop pɛ wo. Wu kɛ ku ryɔng ngɛ sɛ́ phoo yɛ ne ihywa, sɛ́ ne phoo yɛ ne ihywa de. ɛKɔn nɛghaa wo i tɔk ɛbɔk ndɔ ne rop iku, ne ìnang ne itin ɛlɔ ninyi ɛTaanggbey ya.

iNyam iGywebhe ne iHywɛ kɛ Wuru ne iVel

¹¹ Ne n yaang idɛ inyam igywebhe de dɔng ihywɛ kɛ wuru ne ivel, ihywɛ bok igbumɛ ifaa te ɛngɔn ne ɛpharak, ihywɛ ne kyi bol te ɛgbaang ne izɔ igywebhe de.

¹² iHywɛ bo igbɔm ne inyam ɛyisɛ de ihywɛ mɔn ne ɛtomɛ ɛnu ɛyisɛ ne ihywɛ. iHywɛ yɛk ɛzay ya nɛ gbik nɛ ninaa nɛ nibhɛ so ndɔ ɛzay ya nibhɛ re inyam ɛyisɛ de ntsong. iNyam be ne inyuu ne ihywɛ de kɛ bel lo.

¹³ iNyam ne ifaa yɛdee wo ne mɔn igbaang nikɔn ne kparat. iHywɛ yɛk ngɛ igboo le dak ne irywa ifɛ tɔm ndɔ ɛzay ya ninyi na i wɛɛ.

¹⁴ iHywɛ ne luk ninyi ɛzay ya lenɛ nɛ nikɔn ne kparat ta ne kɛ nang ihywɛ ɛnkiinɛ yɛ ihywɛ mɔn ɛnu ɛyisɛ ne inyam ɛyisɛ de. iHywɛ ne yaak ninyi na wu tɛ nibhɛ ryɔng izazurum te i nang inyam ɛyisɛ de ne ndiinday. iNyam be ne kaa phok ihywɛ ikpom ba ihywɛ jung shɛɛ ɛken na.

¹⁵ Ne nang inyam ne ifaa de ɛnkiinɛ te ihywɛ yɛk izazurum ne inyam ɛyisɛ ne ifɔng, te izazurum be yaa bol. iHywɛ ne yaa bol ihywɛ yɛk ngɛ i phobho ninyi na nɛ nibhɛ mbaray tang re ihywɛ ntsong ngga.

¹⁶ iNyam ne ifaa yɛdee wo ne yɛk ngɛ nggbinggbing i yaak ninyi na ne ɛlamba ne iwɔ ne irwye nibhɛ, hang ne itiri yɔɔ. Wu te yaak ninyi na ne ɛlamba gha gbik, kaa ne yaak ngɛ ɛlɛ: ɛnyi ɛndiinday ne ɛshɛɛrɛng ngɛ, ɛnyi ne iryat ne ɛhala yɛ, ɛkpuru ne ɛngɔn ne ijwee.

¹⁷ iHywɛ kɛ mɔn ɛlɛ wo te ring ɛnyi gha ne ɛ sang ɛlamba gha ne say ɛkɔn, ta ring ɛbhɛ ne rɛp pɛ. ɛLamba yɛghaa nggyɛ wo ɛbhɛ ɛ soye irywɛɛk ne inyam ɛyisɛ wo, hang ne ɛlamba ne irywɛɛk ne ihywɛ yɔɔ.

¹⁸ ɛKɔn nɛghaa wo i sim ntsɛntsɛng. Gbik ɛnyi gha ne ɛ bok ishweng aa ne yɛɛ ne seng ɛkɔn ne ɛlamba ne inyam ma, daa ɛli ne ɛlamba yɛ soye irywɛɛk ɛten ɛsii. ɛLamba soye ikpɔl ɛtaraa ne nzuwubɔ ɛtaraa ne iphɛ ɛtaraa 666.