Nikɔn ne kɛ Phaal 1 - ɛWee ne ìTsɛm iHywas

iTsa Yɛ

¹ ɛWee yɛwoo wo so ɛwoo nikɔn ne ɛTaanggbey kɛ phaal ɛYɛso ɛKiriti ye, te ɛ tɔɔrek nikpuru ɛbhɛ nikɔn na nɛ nibhɛ yunga te. ɛYɛso gha kɛ ne phaal ɛkpuru ɛbhɛ ɛYohana ye ibol lɛdee wo lenɛ ne ɛmalɛka ɛbhɛ ne ɛYɛso gha kɛ tom ɛbhɛ ɛlɔ ɛYohana gha.

² ɛYohana gha kɛ ne nang ishɛɛda nikɔn na ne ɛ kɛ yaang ngo gbik, ne ibol ɛTaanggbey ɛ ta nang ishɛɛda ne itin de ne ɛYɛso ɛKiriti gha kɛ phaal ɛbhɛ nɛ wo.

³ ɛHaa ɛwɛng ngaa nggyɛy ne ɛ tɔng nihak ninyi ibol lɛdee wo ne iphɛ le ɛlɔ ɛTaanggbey ya, ɛhaa ɛwɛng ngaa nggyɛy ne ɛ ne tenes ibɔrɔk ne ibol lɛdee wo ɛ roos gbik nikɔn na ne kɛ haa ndɔ ne ɛWee yɛwoo wo. Daa ɛli ne nten nɛ nikɔn nɛnaa wo sɛ shwaak ghe yek cɛcɛk.

iKyili ne kɛ Nang iJwira Ninaa ne Roos ɛNiitaa

⁴ ɛWee yɛwoo le ɛlɔ ɛYohana, ɛbhɛ phɛɛs ɛlɔ ne ijwira ninaa ne roos ɛniitaa na nɛ nibhɛ so ne ivel ne iSiya. Te izɛɛng ne irway ne laal ne ifɛ le ɛlɔ ɛTaanggbey shɛɛ ne nyinɛn. iZɛɛng ne irway ne laal ɛTaanggbey ya ne ɛ sonɛ ɛlyilyɛghaa. ɛHaa ne ɛ kaa ku sonɛ wo, ne haa ne ɛ se ta yaaso. Ne izɛɛng ne irway ne laal de ne ifɛ le ɛlɔ ne ikpabyik ɛniitaa da ne ifɛ so ɛnu ɛyisɛ ɛcuruu ne igbɔm ɛTaanggbey ya.

⁵ Ne izɛɛng ne irway ne laal ne ifɛ le ɛlɔ ɛYɛso ɛKiriti ne ɛbhɛ soye ɛshɛɛda ne sɛ kyinak daa ne ibol ɛbhɛ. Ne ɛ soye ɛngɔn ɛkɔɔn ndɔ ninaa ne yiisitsik ne ikpuu da. Ne ɛbhɛ ɛ soye ɛgɔm nigɔm ɛzay ya. Te nang ɛbhɛ ne ndiinday ne ɛbhɛ ɛ sim njwɛɛn, ɛ kɛ sɔnɔ njwɛɛn ndɔ ne ɛfɔt njwɛɛn no lenɛ nɛ neyi ɛbhɛ ne ɛ kɛ lok.

⁶ Ɛ kɛ te njwɛɛn njwɛɛn teye ninaa ne re igbɔm, nɛ nibo ninaa ne mɔn ɛtomɛ ɛTaanggbey ne ɛbhɛ ɛ soye ɛKyɛɛ ɛbhɛ. iPhɛ ɛlɛy, te ne yɔng ɛYɛso ɛKiriti gha bok ndiinday ne igbɔm ne ishay-ishay. Ɛɛy.

⁷ Yaang ɛn! Ɛ yaaso ndɔ ne inɔp, ninyi na gbik sɛ yaang ɛbhɛ, nɛ ninaa nɛ nibhɛ kɛ tolo ɛbhɛ ne nibhɛ kugha wo. iLwem ɛzay da gbik sɛ san ɛbhɛ. ɛTsak! Ɛlɛy ne phɛ sɛ te. Ɛɛy.

⁸ ɛDaray ɛTaanggbey ya bo, “Mee nzo me ɛHaa ɛYisɛ yɛ ne ɛHaa ɛTsim mɛ. Mee nzo ɛTaanggbey ya ne ɛ sonɛ ɛlyilyɛghaa, ɛhaa ne ɛ kaa ku sonɛ, ɛhaa ne ɛ sɛ ta yaaso, ɛHaa ne iGbɔm Gbik.”

Kɛ Phaal ɛKiriti ye Ndɔ ne iYuwa

⁹ Mee ɛYohana ɛgwaa mon ne ɛtaay mon ndɔ ne sɔ nggbang, ɛtaay mon ndɔ ne igbɔm ɛTaanggbey gbik ne ɛbɔk ne rop iku ne ɛYɛso gha kɛ yel-le njwɛɛn nɛ. Kaa bo me bhɛ hana me ne idɛ ikop inɛn de ne i bok iphɛ iBatamos daa ɛli ne nggɛ tɔng ibol ɛTaanggbey de n da nang ishɛɛda ɛYɛso de.

¹⁰ Kaa ne sɛ ɛdɛ ɛTuk ɛTaanggbey ya, iKabyik ge ne bo me, ne n bok ɛgbaang ne izɔlɔs i bol ne mee te ɛntuntuung ɛtsim nge.

¹¹ iZɔlɔs de ne yaak me, “Haa ɛkɔn na ne ɛ yaang ngo ndɔ ne ɛwee te ɛ tom ijwira ninaa ne roos de nɛ nibhɛ so nilɔ ɛniitaa na. Tom idira ninaa ne roos ne iFisus nɛ, nɛ ninaa ne iSimirina nɛ, nɛ ninaa ne iBirigamu nɛ, nɛ ninaa ne iTiyatira, ne iSadis, ne iFiladafiya gbik ne iLɔdakiya nɛ.”

¹² Ne n hyere me te n yaang ɛnyi gha ne ɛɛ bol ne me wo. Ne sɛ nggɛ hyere me wo, ne n yaang ncwɛng ne izinariya ɛniitaa ne i tes ne ifitila shak.

¹³ Ne n ji yaang ɛdɛ ɛnyi gha ɛceree yɛ ne ɛ so te ɛNgɔn ɛNyi ndɔ ne ɛtura ɛdɔrɔng ɛbhɛ bhɛ hɔn ɛduu ne ita, ɛ ji rop bhe ɛgagha ne izinariya ɛgyɛy.

¹⁴ iTo ɛbhɛ ne itsutsɔ ne ito yɛ kaa ne so ihala hyahyak te ɛwuduga, hang ɛNgkyaaling yɔɔ, irwisɛ ɛbhɛ da ne so te ilwem ne igboo.

¹⁵ iTa ɛbhɛ de ne i tol te igyɔs ne i bok ihywɛ itagula ne kɛ phan i halang ndɔ ne igboo i tul ishoo yɛ. iZɔlɔs ɛbhɛ de ne so te izok ɛyuus inɛn.

¹⁶ Ne ɛ wum niyuyɔrɔ ɛniitaa ne iwɔ irwye ɛbhɛ, ɛwal ninu ifaa ne ɛbhɛ re gbom ne i wuusi ɛnu ɛbhɛ, ɛyisɛ ɛbhɛ gha ne ji tol te iroy ne iphɛ kɛ hɔn ɛceree.

¹⁷ Ne sɛ nggɛ yaang ɛbhɛ, ne n ho ne ivel ɛnu ɛyisɛ ɛbhɛ te ikom. Ne ɛ ji bo iwɔ ne irwye ɛbhɛ ɛ dat me nɛ, ne ɛ yaak me, “Sɔng ɛ phok ɛnik ko nang, mee nzo me ɛYisɛ yɛ ne ɛTsim mɛ.”

¹⁸ Mee nzo ɛhaa iken na! Nggaa ku, ne ɛ yaang nzo ɛken ne ishay-ishay. N bok igbɔm daa ne iku gbik ne ɛlɔ ne ikpom.

¹⁹ iPhɛ ɛlɛy, ne ɛhaa nikɔn na ne ɛ kɛ yaang ngo, nɛ ninaa nɛ nibhɛ sonɛ ɛlyilyɛghaa wo gbik nɛ ninaa nɛ nibhɛ sɛ́ tes gɔɔ ɛnu ɛyisɛ gha.

²⁰ ɛDuk Niyuyɔrɔ ɛniitaa na nɛ ɛ yaang ne iwɔ ne irwye nge wo, nɛ ɛduk ne ncwɛng ne izinariya ɛniitaa da ne i tes ne ifitila da shak ko so ɛlɛ: Niyuyɔrɔ ɛniitaa na so nimalɛka ne ijwira ɛniitaa ninaa ne roos sa, ncwɛng ɛniitaa ne ji so ijwɛng ɛniitaa yɛ.