ɛFilimɔn 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus, ne kɛ rop ɛbhɛ ne nyang ɛlɔ ne mɔn ɛtomɛ ɛYɛso ɛKiriti gbik ne ɛgwaa njwɛɛn ɛTimɔti. Ɛbhɛ phɛɛs ɛlɔ ɛFilimɔn, ɛtaay ɛtomɛ mos ne njwii sim,

² ne ɛgwaa mos ɛkuk, ɛFiya gbik ne ɛCipus ne ɛ soye ɛtaay ɛtomɛ mos gbik nɛ ninaa ne roos sa nibhɛ sɛm en ne ijwee mo wo.

³ Te izɛɛng, ne irway ne laal ne le ɛlɔ ɛTaanggbey ne ɛ soye ɛTaa njwɛɛn, ne ɛDaray ɛYɛso ɛKiriti shɛɛ ne nyinɛn.

iShwim ne ìnang ne iTin ɛFilimɔn

⁴ Nzi tɔɔsel ɛTaanggbey nge irway ihwala daa ne igyɛ cɛcɛɛy nten de ne nzi bol ne ɛTaanggbey ya.

⁵ Daa ɛli ne nzi phok ngka ne ìnang ne itin mo de ndɔ ɛDaray ɛYɛso gha gbik ne ishwim ba ne ɛ tɔɔsel ninyi ɛTaanggbey ya.

⁶ Nzi bol ne ɛTaanggbey te ìnang ne itin nɛdaa wo ne iphɛ kɛ byinki njwɛɛn no hantey yɛ, iphɛ nang ngɛ ishweng ikyukyum daa nikɔn na nɛ nibhɛ kɛ jam mo nɛ nibhɛ so ninaa njwɛɛn na ndɔ ɛKiriti gha.

⁷ Ɛgwaa, ishwin mo da kɛ nang me irway ihwala gbom, Ifɛ ne ta te me itsɔngɔl gɛgɛy. Daa ɛli ne ɛ hanas ninyi ɛTaanggbey ya ne ihwet.

ɛBulus kɛ Roo ɛNisimos se Nɛ

⁸ Daa ɛli ne ˆɛ so ɛgwaa nge ndɔ ɛKiriti gha, nzɛɛ ne yɛɛ ne yɛk kɛ nɛ ˆɛ mɔn ɛkɔn na ne ɛ so nggbinggbing ˆɛ mɔn.

⁹ Gbik ne phɛ ɛlɛy, mee ɛBulus, nzi ne roro ne igyɛ ndɔ ne ishwim. Mee wo ne nggɛ helem mo, n da so ne nyang nggɛ ɛlɔ ɛYɛso ɛKiriti gha.

¹⁰ Nzi roro ne igyɛ ɛlɔ ɛngɔn nge ɛNisimos, ne ɛ kɛ teye ɛngɔn nge nten de ne nggɛ so ne nyang ngge.

¹¹ Ne ile de, sɔng ɛNisimos sa kaa bok iphyik ɛlɔ mo gha nang. ɛLyilyɛghaa wo ne ɛ bok iphyik ɛlɔ mo gha gbik ne ɛlɔ nge.

¹² Nzi ne tomos sɛ ne ɛbhɛ ɛlyilyɛghaa wo, irway nge so daa ɛbhɛ gbik.

¹³ Nggɛ sim te nzɛɛ tek ɛbhɛ ɛlɔ nge ɛbɛ wo ne nzo ne nyang ngge te ɛ bo ɛlɔ mo ndɔ ɛtomɛ ne sanga iBol iYɛnɛng ngge.

¹⁴ Sɔng nzi ne sim te nzɛ mɔn ɛdɛ ɛkɔn na tang ne ishwim mo nang, nzi yang sim te ˆɛ sɛ mɔn ɛkɔn na ne irway mo i sim. iPhɛ ɛlɛy, sɔng naa ne mɔn ɛdɛ ɛkɔn na ne ˆɛ kɛ sang sim nang.

¹⁵ Yaa rɔk ɛNisimos sa kaa tek kɛ ndɔ ne nten ncɛt de te yaa ne sɛ ɛ kɛ bhɛ kyii ˆɛ kyi ta say ɛbhɛ ne ibɔ iphaa ɛ teye ɛhaa mo ishay-ishay.

¹⁶ Sɔng nzi bo te ˆɛ say ɛbhɛ te ɛkpuru nang, yang say ɛbhɛ ɛ phyin ɛkpuru gha, say ɛbhɛ te ɛgwaa ndɔ ɛDaray. Nzi sim ɛbhɛ, ˆaa ne sim ɛbhɛ ˆɛ shɛs. Say ɛbhɛ te ɛten ɛsii gbik ne ɛgwaa mo ndɔ ɛDaray.

¹⁷ Wu ˆɛ kɛ bo me nzo me ɛtaay ɛtomɛ mo gha, ne ˆɛ say ɛbhɛ ɛli ne ˆɛ sɛ say me.

¹⁸ Wu ɛ kɛ ne yung ben nɛ nɛ, hang ˆɛ roos ɛbhɛ ɛkɔn yoo, ne ˆɛhaa ɛkɔn nɛ daa ne irywɛɛk nge.

¹⁹ Mee ɛBulus nzi haa ibol lɛdee wo ne iwɔ nge, naa tal lɛ. Sɔng naa ma yung boote ibol ne iken iphas de ne ˆɛ kɛ sɛ lenɛ ne mee wo nang.

²⁰ iPhɛ ɛlɛy ɛgwaa nge ɛFilimɔn, nzi roro ne igyɛ, mɔn me iyɛnɛng ngɛdee wo ndɔ ɛDaray. Te ˆɛ nang me irway ihwala daa ɛli ne nzo ɛgwaa mo ndɔ ɛKiriti gha.

²¹ Nzi yɛɛ ncɛncɛng ˆaa roos ibol lɛdee wo, iphɛ phɛ kɛ te nggɛ haa ɛwee yɛwoo wo nzi yɛɛ ˆaa ma yung mɔn ˆɛ phyin ɛkɔn na ne nggɛ boote wo.

²² ɛDɛ ɛkɔn nɛghaa bɛ dɔng, nzi sim te ˆɛ sɛɛ ryɔng mɛɛn izuk ne nzɛɛ shɛɛ nɛ, daa ɛli ne nggɛ sit irwisɛ nzi wɛɛ te yaa lenɛ ne ɛroo mon na, ɛTaanggbey ya yaa ne kyii nyini ne mee.

iKyili ne Taal Lɛ

²³ ɛPafaras sa ne kɛ rop njwii ne ɛbhɛ ndɔ ne nyang ngge ɛlɔ ɛYɛso ɛKiriti gha i kyiisi yɛ.

²⁴ ɛLɛy ne ɛMarakus, ne ɛRisitakus, ne ɛDimas gbik ne ɛLuka nɛ nibhɛ so nitɛɛrɛk nge ndɔ ɛtomɛ ɛYɛso ɛKiriti gha, i kyiisi yɛ.

²⁵ Te izɛɛng ɛDaray ɛYɛso de shɛɛ ne ikabyik mon. Ɛɛy.