iRooma 9 - ɛWee ne ìTsɛm iHywas

ɛTaanggbey ya kɛ Kasa niSɛrɛla

¹ Nzi tɔng itin nɛ ndɔ ɛKiriti, sɔng irywɛɛk ne nzi tɔng nang. Ndɔ ne icwas ne irway nge nzi yɛɛ iphɛ ɛlɛy ɛli ne iKabyik ɛTaanggbey kɛ ne ma tɔɔrek iphɛ ɛlɛy.

² N bok irway ishwii gbom, irway nge ne bees se cɛcɛɛy.

³ Sɛ ma yung yɔng nggɛ te me ɛhaa ɛkawɛy i hosop me ne ɛKiriti gha tɛ nigwaa nge ne ihywee nge ndɔ ne iyɛk ne ibek sɛ iphɔrɔt.

⁴ Nibhɛ bhɛ so niSɛrɛla. Nibhɛ ne ɛTaanggbey ya kɛ ne bo nibhɛ teye ninɔn ɛbhɛ, ɛ tɔɔrek nibhɛ ndiinday ɛbhɛ, ɛ rop ibol nɛ nibhɛ, ɛ nang nibhɛ iMɛmɛ ɛMuusaa, ɛ tɔɔrek nibhɛ ɛnkiinɛ ne re ntsong ntin, ɛ nang nibhɛ nikɔn na ne ɛ kɛ ku sim-mɛ.

⁵ Nibhɛ so ihywee nikyɛɛ-nikyɛɛ niYahodawa na ne i yɛɛ nibhɛ gbom. ɛKiriti gha ne so ihywee nibhɛ ndɔ ne iyɛk ne ibek. Te ne dɛp ɛTaanggbey ye ne ɛbhɛ ɛ bok igbɔm nikɔn na gbik wɛlɛng ɛgak. Ɛɛy.

⁶ Sɔng nzi bo ibol ɛTaanggbey de kɛ te buu daa ne ito ninyi ɛbhɛ na nang, daa ɛli ne sɔng gbik ɛnyi gha ne so ihywee niSɛrɛla de ɛ soye ɛnyi ɛTaanggbey ya nang.

⁷ ɛLɛy dɔng sɔng gbik ninyi na nibhɛ so ihywee ɛBaraying ngge nibhɛ soye ninɔn ɛTaanggbey ya nɛ ne itin nɛ nang. ɛTaanggbey ya kaa yaak ɛBaraying nge gha, “ɛShaaku gha ɛbhɛ ɛ so ɛnyi gha ne sɛ lenɛ ne ɛbhɛ i re ɛnu ɛyisɛ ne yeres irywɛɛk mo wo.”

⁸ Kaabi i bo wu hang ninɔn na ne kɛ yɛk nibhɛ ndɔ ne ibek nibhɛ bhɛ soye ninɔn ɛTaanggbey ya. Yang so ninɔn na ne kɛ yɛk nibhɛ daa ne ibol de ne ɛTaanggbey ya kɛ ku sim-mɛ nibhɛ ne i bok nibhɛ ninɔn ɛTaanggbey ya.

⁹ iBol lɛdee ne ɛTaanggbey ya kaa boote ne ɛBaraying nga, ɛ kaa yaak ɛbhɛ, “Sɛ́ sɛ nten nɛ kɛ shwaak ghe ne naa bhɛ kyii, ɛSaratu gha sɛ ne yɛk ɛngɔn ɛras.”

¹⁰ Kɛ ta ten ne idɛ ibol de dɔng. Ninɔn ifaa na ne ɛRɛbɛka gha kaa yɛk ko kaa bok ɛkyɛɛ ɛdaan, ɛbhɛ ɛkyɛɛ-ɛkyɛɛ njwɛɛn ɛShaaku.

¹¹ Kaa ne tang yɛk ninaa ifaa yɛnaa nggyɛ wo. Nibhɛ kaa tɔ tang ku shɛɛ yaa mɔn ɛkɔn ɛyɛnɛng hang ɛkɔn ɛbebhe yɔɔ, ɛTaanggbey ya ne boote ne ɛRɛbɛka gha te i sɛ i shwaak ibol ɛnyi de ne ɛ kɛ ku kasa wo. Sɔng yaa ne shwaak ko daa ɛtomɛ nibhɛ nang, yang so daa ne yel-le ɛTaanggbey.

¹² Ne ɛ yaak ɛRɛbɛka yegha, “ɛKɔɔn na sɛ teye ɛkpuru ɛshɛɛrɛng nga.”

¹³ Te ɛli ne kɛ haa ndɔ ne ɛwee ne ibol ɛTaanggbey yo i bo, “Nggɛ sim ɛYakub bhe, nggɛ ne mbaray me ɛSuwa ye.”

¹⁴ Njwɛɛn yaa ne ji yɔng ɛli daa mɛɛ? Yaa yɔng wu ɛTaanggbey ya kaa ne ben ne? Kwa! Sɔng ɛlɛy yang.

¹⁵ ɛTaanggbey ya kaa yaak ɛMuusaa yegha, “Naa san iyɔm ɛnyi de ne nzi yaang naa san iyɔm ɛbhɛ, naa ne rɔ-irway ɛnyi da ne nzi yaang naa rɔ-irway ɛbhɛ.”

¹⁶ iPhɛ ɛlɛy, sɔng ibol lɛ ne so daa ɛkɔn na ne ɛnyi gha i sim, hang ɛ kɛ mɔn nang, iphɛ yang so ibol ne san iyɔm ɛTaanggbey zɔng.

¹⁷ iPhɛ phɛ kɛ te ɛWee ne ibol ɛTaanggbey yo i bok ɛHyiridus yegha, “Nggɛ yɛk kɛ nɛ ɛ teyɛ ɛgɔm ma te nzɛ n tɔɔrek ihwet nge lenɛ ne igyɛ wo, te irywɛɛk nge wo ne ta shwalat ɛzay ya gbik.”

¹⁸ iPhɛ ɛlɛy, wu ɛTaanggbey ya i yaang iphɛ kɛ jam ɛbhɛ nɛ aa san iyɔm ɛdɛ ɛnyi de ne ɛ mɔn ɛlɛy, wu ɛ ne yaang iphɛ kɛ jam ɛbhɛ nɛ aa te ɛdɛ ɛnyi gha ɛ yɛk ito ihet ne ɛ ma ta mɔn ɛlɛy.

¹⁹ ɛDɛ mon sɛ ne yɛɛ ne yaak me, “Wu iphɛ ne so ɛlɛ wo ikyee iphɛ kɛ ne te ɛTaanggbey ya ne tɔ bo wu njwɛɛn soye ninaa ne ɛfɔt ta i? ɛDɛ ɛnyi gha sɛ yɛɛ ne mbaray ɛkɔn na ne ɛTaanggbey ya sim mo be?”

²⁰ Ɛ soyɛ ɛhay igyɛ ɛten ɛsii wo ne aa kyii ɛTaanggbey yegha ne ibol dee? Sɔng iron de i yɛɛ ne phom ɛnyi gha ne ɛ kɛ ryɔng iphɛ wo iphɛ yɔngɔ, “iKyee iphɛ kɛ te ɛ ryɔng me ɛlɛ woo?”

²¹ Nzo ɛhaa ne ryɔng iron da ɛbhɛ bok ito ne mɔn ɛkɔn na ɛ sim ne ives da. Ɛ sɛɛ yɛɛ ne bo ikɔɔng ne ives idaan nɛ ɛ ryɔng ne iron ihywee yɛ ifaa, idɛng soye idee ne izel, idɛng ne ji soye iron ne mɔn ɛtomɛ ne ijwee.

²² ɛLɛy ne ɛtomɛ ɛTaanggbey ya ne so. Ɛ kɛ sim aa tɔɔrek njenjek ɛbhɛ de ɛ ta tɔɔrek ihwet ɛbhɛ de kpas, ne ɛ ma kyi bo ɛbɔk gbom daa ninaa na ne iphɛ ku so aa te njenjek nɛ nibhɛ, nɛ ninaa ne iphɛ ku so yaa bees nibhɛ.

²³ Ɛ kɛ ne mɔn ɛlɛ wo te ɛ tɔɔrek ndiinday ɛbhɛ de ne iphɛ so gbom mo daa ninyi na ne ɛ kɛ san iyɔm nibhɛ de, ninyi na ne ɛ kaa ku ryɔng ne ile de tɛ nibhɛ sɛ ndiinday ɛbhɛ de.

²⁴ Njwɛɛn ne ma so ndɔ ninaa ne ɛTaanggbey ya kɛ yel-le wo, sɔng niYahodawa zɔng nang, gbik nɛ ninaa ne hame nibhɛ soye niYahodawa na.

²⁵ Ɛli ne ɛTaanggbey ya kɛ mɔng ndɔ ne ɛWee ɛnɛbi ɛHosiya wo, ɛ yɔngɔ, “Ninyi na ne hame nibhɛ soye ne ninyi nge, naa ne yaak nibhɛ ninyi nge. iGbagha wo ne nggɛ sang sim, naa ne yaak wu nzi sim.”

²⁶ “Ɛlɔ gha ne nggɛ ne yaak ɛbhɛ, ‘Sɔng ɛ so ɛn ninyi nge nang.’ ɛLɔ yɛ ne sɛ ne yaak ɛbhɛ, ‘Ninɔn ɛTaanggbey ne iken.’ ”

²⁷ “ɛNɛbi ɛShaa kaa ne ku salan daa ne ito niSɛrɛla de ɛ yɔngɔ: ‘iPhɛ dee niSɛrɛla na kɛ kat te imumu ne ihywel, ne so ɛbyin nɛ bɔbɔk ndɔ nibhɛ wo ne sɛ phɔt.

²⁸ Daa ɛli ne ɛDaray ya sɛ shwaak ɛkɔn na ne ɛ ku yɔng sɛ mɔn ɛzay ya. Sɔng ɛ sɛ bees nten nang.’ ”

²⁹ Te ɛli ne ɛShaa gha kaa ku boote ne ile de ɛ yɔngɔ, “Sɛɛ sang yɔng ɛDaray ne iGbɔm gbik ka kɛ sang tek njwɛɛn ihywee de, njwɛɛn sɛɛ ne te tɛ ninyi ne iSɔdɔm, sɛ ne ku mɔn njwɛɛn te iGomora.”

iYɔm ne Nang ne iTin ne niSɛrɛla

³⁰ Njwɛɛn yaa ne ji ta yɔng ɛli da mɛɛ? Ninyi ne hame nibhɛ soye niYahodawa na, nɛ nibhɛ sang ta kyangase nɛ tɛ nibhɛ sɛ icik ɛTaanggbey de, kɛ ne sɛ. iCik ge ne i sɛ lenɛ ne ìnang ne itin ne de.

³¹ niSɛrɛla na nɛ nibhɛ ne kyangase ne tɔk icik ɛTaanggbey de lenɛ ne roos iMɛmɛ ɛMuusaa da nang, sɔng nibhɛ kɛ ne sɛ nang.

³² ɛLɔ ne ikyee? Daa ɛli ne sɔng nibhɛ kɛ kyangase ne tɔk icik ge ne ɛnkiinɛ ne ìnang ne itin de nang, nibhɛ yang kyangase nɛ lenɛ nɛ nitomɛ nibhɛ. Nibhɛ kɛ ne kyibhɛ daa ne “iKɛɛ de ne iphɛ i yɛɛs ne ikyibhɛ da.”

³³ Te ɛli ne kɛ ku haa i bo, “Yaang ɛn, nggɛ see ikɛɛ ndɔ ne iSihiyɔɔna, ikɛɛ ne phɛ yɛɛs ne ikyibhɛ. ɛPhang ngo yaa ne te ninyi gbom nibhɛ hoghɛse. Gbik ɛhiha ɛnyi, ne ɛ kɛ ne nang ne itin nɛ ne ɛbhɛ sɔng aa ne sɔ ncwa nang.”