iRooma 7 - ɛWee ne ìTsɛm iHywas

Sɔng ɛShara gha Tɔ ne iHwet daa Njwɛɛn Nang

¹ Nigwaa en, nyinɛn no ne ɛ yɛɛ ɛn iMɛmɛ ɛMuusaa gha aa seng ɛn ibol de ne nzi bol. iMɛmɛ ɛMuusaa da bok igbɔm ba daa ɛnyi gha nten de ne ɛ tɔ zɔng.

² Te ne ten-nɛ ne ibol ne tom ɛyɛl, ɛshara ne tom ɛyɛl lo i rop ɛkuk ka ne ɛras sa wu ɛ so ɛken, wu ɛras sa kɛ ne ku kɛ ne biri ɛshara gha ne ɛ kɛ rop ɛbhɛ ne ɛras sa.

³ iPhɛ ɛlɛy, wu ɛkuk ka kɛ ne tek ɛras sa ɛ tɔ ɛken ɛhak ɛnyi ra ne ɛbhɛ, ya ne yaak ɛbhɛ ɛhaa ne ra nzangas. Wu ɛras sa kɛ ne ku, ɛ kɛ ne sɔrɔt daa ɛshara gha, sɔng yaa ne yaak ɛbhɛ ɛhaa ne ra nzangas sang, wu ɛhak ɛras kɛ tul ɛbhɛ.

⁴ Nigwaa en, kɛ ne ten ibol lɛdee wo ne nyinɛn. iKu ɛKiriti de daa ne ihon no kɛ te ˆɛ kɛ ku ɛn daa ne ihwet ɛshara da. Sɔng ɛshara gha ne tɔ ne ihwet daa nyinɛn no nang, ɛshara so te ˆɛ kyii ɛn ne iwɔ ɛhak ɛnyi, ɛnyi gha ne kɛ yiisik ɛbhɛ tsik ndɔ ne ikpuu da. Te ˆɛ kyii ɛn ndɔ iwɔ ɛbhɛ wo ˆɛ mɔn ɛn ɛTaanggbey ye ɛtomɛ ne aa nang ikpam iywɛnɛng ndɔ ne ihywel mon da.

⁵ Daa ɛli ne nten de ne njwɛɛn kaa i roos izɔlɔs ne irway ɛten ɛsii da nɛ wo, iMɛmɛ ɛMuusaa da kaa ne yɛɛs ne ihyop igywebhe ne ibek njwɛɛn. iHyop igywebhe yɛdee wo ne i mɔn ɛtomɛ ndɔ ne ibek njwɛɛn de, ne ɛ nang ikpam ivebhe ne ifɛ yɛɛs ne iku.

⁶ ɛLyilyɛghaa wo, njwɛɛn kɛ ne sɔrɔt ndɔ ne iMɛmɛ ɛMuusaa da daa ɛli ne njwɛɛn kɛ ku ɛlɔ ɛkɔn na ne ɛ kaa rop njwɛɛn no. iPhɛ ɛlɛy njwɛɛn kɛ ne yaa re ɛTaanggbey yegha ntsong ngga ndɔ ne ɛnkiinɛ ɛphas ne ikabyik ge kɛ yɛɛs nɛ, sɔng ndɔ ne ɛnkiinɛ ɛtɛl lo ne iMɛmɛ ɛMuusaa da kaa nang ngo nang.

ɛShara gha i te ɛFɔt to Kpas

⁷ Njwɛɛn yaa ne ji yɔng ɛli da mɛɛ? iMɛmɛ ɛMuusaa da so ɛfɔt naa? Kwa! Yang so ikpii ne iMɛmɛ da ifɛ i te ɛfɔt to kpas. Sɛɛ yɔng iMɛmɛ ɛMuusaa da kɛ sang yɔngɔ, “Sɔng ɛ phok ihyop ɛkɔn ɛnyi nang,” sɔng nzɛɛ ne seng ɛkɔn na ne bok ɛbhɛ ihyop be nang.

⁸ Kɛ ne lenɛ ne ibol ɛshara de ɛfɔt to phaal me ikɛk n yɛk ihyop nikɔn na gbom ndɔ nge de. Wu ikpii ne iMɛmɛ da ne sang ngɛ, ɛfɔt to ne so te ikom ne hosop iphɛ ne iken.

⁹ Nggaa so ɛken ɛli ne nggɛ tang seng iMɛmɛ ɛMuusaa da, kɛ ne sɛ nggɛ seng ikpii ne iMɛmɛ da, ɛfɔt to ne yɛk ihwet ndɔ nge de ɛbhɛ yɛɛs me ne iku.

¹⁰ iKpii ne iMɛmɛ da ne kɛ i wɛɛ te ifɛ yaa yɛɛs ne iken de kɛ ne kyii yɛɛs me ne iku.

¹¹ ɛFɔt to kɛ sɛ ikɛk lenɛ ne ikpii ne imɛmɛ da ne ifɛ kɛ luk me, ifɛ ne phoo me.

¹² iPhɛ ɛlɛy, kɛ ne tul iMɛmɛ ɛMuusaa da kang, ne ta tul ikpii da kang, cik, byirik.

¹³ ɛKɔn na ne ɛ kɛ jam mo ɛbhɛ aa ne kyii yɛɛs me ne iku dee? Kwa! Sɔng ɛlɛy yang. ɛFɔt to ɛbhɛ kɛ ne yɛɛs me ne iku lenɛ ne ɛkɔn na ne ɛ kɛ jam mo te sɛ i seng ɛli ne ɛfɔt to soye ɛfɔt to. iPhɛ ɛlɛy, yaa ne lenɛ ne ikpii ne iMɛmɛ da ɛfɔt to ne ji tɔɔl ibebhe ne bhɛ de kpas.

I Ta iTsom ne ɛFɔt To

¹⁴ Njwi i yɛɛ ɛli ne iMɛmɛ ɛMuusaa da so ibol ne ikabyik, mee wo nang ne n bok icwas ne irway ɛten ɛsii, nggɛ te me ɛkpuru ne ɛfɔt ta.

¹⁵ Sɔng nzi yɛɛ ɛkɔn na ne nzi mɔn nang. Sɔng nzi mɔn ɛkɔn na ne nzi sim te nzɛ i mɔn nang, nzi yang kyii mɔn nikɔn na ne nzi mbaray me.

¹⁶ Wu nzi ne mɔn nikɔn na ne nzi sang sim te nzɛ mɔn no, iphɛ kɛ ne tɔɔrek wu nggɛ sim wu iMɛmɛ ɛMuusaa da kɛ jam.

¹⁷ iPhɛ ɛlɛy, sɔng mee nzi ne mɔn nikɔn nɛnaa wo nang, ɛfɔt to ne ɛbhɛ shɛɛ ndɔ nge de ɛbhɛ bhɛ mɔn.

¹⁸ Nzi yɛɛ sɔng ɛkɔn ɛyɛnɛng i shɛɛ ndɔ mee wo nang, ndɔ ne icwas ne irway ɛten ɛsii da ne ifɛ so ndɔ nge de. Nzi yang sim te nzɛ mɔn ɛkɔn ɛyɛnɛng nga, sɔng nzi ne ji kyi yɛɛ ne mɔn nɛ nang.

¹⁹ Sɔng nzi mɔn ɛkɔn ɛyɛnɛng nga ne nzi sim te naa mɔn no nang, nzi yang kyii mɔn ibebhe de ne nzi mbaray me iphɛ.

²⁰ Wu nzi ne mɔn ɛkɔn na ne nzi tang sim te nzɛɛ mɔn no, iphɛ kɛ ne tɔɔrek sɔng me nzi mɔn ɛkɔn nɛ nang. Yang so ɛfɔt to ne ɛbhɛ shɛɛ ndɔ nge de ɛbhɛ bhɛ mɔn.

²¹ iPhɛ kɛ te te ibek nge, i sɛ nzi sim na mɔn ɛkɔn ɛyɛnɛng nga, ibebhe de ne jung sonɛ.

²² Ndɔ ɛkyukyum ne irway nge, ɛshara ɛTaanggbey ya kɛ jam.

²³ Nzi ne jung kyii phok ɛdɛ ɛkɔn na kang ne ɛ mɔn ɛtomɛ nɛ nilɔ ne ibek nge na. ɛKɔn nɛghaa nggyɛ wo i ne dat iphup ne ɛkɔn na ne irway nge da sim. ɛKɔn kɛgha kɛ ne te nggɛ te me ɛkpuru ɛkɔn ne ɛfɔt tɛghaa nggyɛ wo ne ɛ tɔ ndɔ ne ibek nge de.

²⁴ Aa! Nggɛ ne te me ɛkɔn ne san iyɔm! ɛHay ɛbhɛ aa ne ji phɔt me ɛlɔ ne ibek kɛdee wo ne iphɛ phɛɛs ne me ndɔ ne iku dee?

²⁵ ɛHay, kang ne ɛTaanggbey yaa? N bok irway ihwala ne ɛTaanggbey ne ɛbhɛ kɛ phɔt me lenɛ ne ɛDaray njwɛɛn ɛYɛso ɛKiriti! iPhɛ ɛlɛy, ndɔ ne irway nge, nzo ɛkpuru ne imɛmɛ ɛTaanggbey. iCwas ne irway ɛten ɛsii da ne ifɛ so ndɔ nge de ne ma ji so ɛkpuru ɛshara ne ɛfɔt.