iRooma 5 - ɛWee ne ìTsɛm iHywasNikɔn na ne ìNang ne iTin da i Yɛɛs nɛ Wo 1 iPhɛ ɛlɛy, ɛlyilyɛghaa wo ne kɛ say njwɛɛn wu njwɛɛn so icik ɛnu ɛyisɛ ɛTaanggbey ya lenɛ ne nang ne itin de, njwɛɛn ne bok irway ne laal ɛnu ɛyisɛ ɛTaanggbey lenɛ ne ɛDaray njwɛɛn ɛYɛso ɛKiriti. 2 Kɛ lenɛ ne ɛbhɛ ne njwɛɛn kɛ sɛ lel ndɔ ne izɛɛng ngɛdee wo lenɛ ne ìnang ne itin njwɛɛn da. iPhɛ ɛlɛy njwɛɛn ne bok irway ihwala daa ɛli ne njwɛɛn kɛ yɛk ne irway njwɛɛn sɛ so ndɔ ninaa nɛ nibhɛ so ndɔ ne ndiinday ɛTaanggbey de. 3 Sɔng ɛlɛ wo zɔng nang, njwɛɛn bok irway ihwala ndɔ ne nggbang ngga ne njwɛɛn i sɔ wo daa ɛli ne njwɛɛn i yɛɛ wu nggbang ngga i yɛɛs ne irway nviit. 4 iRway nviit da ne iyɛɛs ne irway iywɛnɛng. iRway iywɛnɛng ngga ne ma yɛɛs ne iyɛk ne irway. 5 Sɔng iyɛk ne irway da yaa ne te buu nang, daa ɛli ne ɛTaanggbey ya kɛ sit ishwim ɛbhɛ da ndɔ ne irway njwɛɛn da lenɛ ne iKabyik ɛTaanggbey de ne ɛTaanggbey ya kɛ nang njwɛɛn. 6 Yaang ɛn, kaa ne ji sɛ nten nɛ kɛ shwaak ghe, nten de ne njwɛɛn kɛ tɔ iMarasha, ɛKiriti gha ne ku ɛlɔ njwɛɛn ninaa ne ɛfɔt to. 7 iPhɛ bok nggbang gbom ɛnyi gha ku ɛlɔ ɛnyi gha ne ɛ so cik ko, sɛɛ ne ma rɔk ɛdɛ ɛnyi gha rop ku, ɛ ku ɛlɔ ɛnyi ɛyɛnɛng. 8 ɛTaanggbey ya kɛ yang tɔɔrek ishwim ɛbhɛ daa njwɛɛn daa ɛli ne njwɛɛn kɛ tɔ ninaa ne ɛfɔt, ɛKiriti gha ne ku ɛlɔ njwɛɛn! 9 Wu ɛTaanggbey ya kɛ ne say njwɛɛn wu njwɛɛn so cik ko lenɛ nɛ neyi ɛKiriti na, yaa ne ji mɔn ɛlii i sang phɔt njwɛɛn ndɔ ne njenjek ɛTaanggbey dee? 10 Kaa kyii ryɔng njwɛɛn ne ɛTaanggbey ya nten de ne njwɛɛn kaa tɔ ninaa ne iphup ɛbhɛ lenɛ ne iku ɛNgɔn ɛbhɛ. ɛLyilyɛghaa wo, njwɛɛn kɛ ne ji teye nitaay ɛbhɛ, njwɛɛn sɛ ne phɔrɔt lenɛ ne iken ɛNgɔn ɛbhɛ de! 11 Sɔng ɛlɛ wo zɔng nang, njwɛɛn bok irway ihwala ne ɛkɔn na ne ɛTaanggbey ya kɛ mɔn lenɛ ne ɛDaray njwɛɛn ɛYɛso ɛKiriti gha, ne kɛ lenɛ ne ɛbhɛ i kyii ta ryɔng njwɛɛn ne ɛTaanggbey ya. iBol ɛDɛmu ne iDee ɛKiriti 12 ɛFɔt to kaa yɛɛs ndɔ ɛzay ya lenɛ ne ɛnyi ɛdaan, ɛfɔt to kɛ ne yɛɛs ne iku. iKu de kɛ ne teye idee ninaa ɛzay gbik, daa ɛli nɛ ninaa ɛzay ya gbik kɛ mɔn ɛfɔt. 13 ɛFɔt to kaa ku so ndɔ ɛzay ya nyɛɛn ɛTaanggbey ya kyi nang iMɛmɛ ɛMuusaa da. ɛLɔ gha ne iMɛmɛ ɛMuusaa da kaa ne sang sonɛ wo sɔng kɛ ne bo ɛfɔt to te ɛkɔn nang. 14 Gbik ne iphɛ ɛlɛy, iku de ne ku bok igbɔm da ninyi na gbik lenɛ nten ɛDɛmu phyin ne hɔn nten ɛMuusaa. iPhɛ ma phyin so daa ninyi na ne hame nibhɛ kɛ mɔn ɛfɔt lenɛ nɛ nibhɛ kɛ ten ikpii da te ɛDɛmu gha kaa ten no. Kaa ten ɛDɛmu yegha ne ɛnyi gha ne ɛ sɛ yɛɛs so. 15 iZɛɛng ɛTaanggbey de ne ɛ kɛ nang lenɛ ne ɛnyi gha ne ɛ sɛ yɛɛs so ne labhe ne ɛfɔt ɛDɛmu wo. ɛTsak, ɛfɔt ɛnyi ɛdaan nɛwoo nggyɛ wo kɛ hɔ ninyi gbom iku. iZɛɛng ɛTaanggbey de ne phyin ne igbom, izɛɛng ɛbhɛ de ne ɛ kɛ nang lenɛ ne ɛnyi ɛdaan nɛghaa nggyɛ wo, ne ɛbhɛ so ɛYɛso ɛKiriti gha kɛ ne sit ninyi na gbarang ne ɛwɛng gbogbom. 16 Ɛlɛy ne iphɛ so, izɛɛng ɛTaanggbey de labhe ne ɛfɔt ɛnyi ɛdaan nɛwoo nggyɛ wo. ɛTsim ne ɛfɔt ɛnyi ɛdaan no, kɛ ne hyɛ ɛshara ne iku; ɛtsim mɛ nɛ ninyi gbom kɛ mɔn ɛfɔt to, ɛTaanggbey ya ne kyii yɛɛs ne izɛɛng ne say ninyi wu nibhɛ so cik. 17 ɛTsak, kɛ lenɛ ne ɛfɔt ɛnyi ɛdaan no ne ɛ so ɛDɛmu gha, iku de kɛ ne yaa re igbɔm daa ninyi na gbik. Sɔng igbɔm mɛ ne so ɛkɔn nang wu kɛ ten-nɛ ɛkɔn na ne ɛnyi ɛdaan na kɛ ma yɛɛs nɛ wo, ɛbhɛ ɛYɛso ɛKiriti gha. Gbik ninyi na nɛ nibhɛ kɛ ne say ɛgbaang ne izɛɛng ɛTaanggbey yo ne ɛKiriti gha kɛ yɛɛs nɛ wo, ɛTaanggbey ya sɛ ne say nibhɛ wu nibhɛ so cik, sɛ ne lenɛ ne ɛKiriti ghe nibhɛ shɛɛ niken nibhɛ re igbɔm. 18 iPhɛ ɛlɛy, ɛli ne ɛfɔt ɛnyi ɛdaan no kɛ yɛɛs ne iku de daa ninyi na gbik ko ɛlɛy ne ihywel icik ɛnyi ɛdaan da kɛ ne ma te kɛ say ninyi na gbik wu nibhɛ so cik ɛnu ɛyisɛ ɛTaanggbey, iphɛ kɛ ne te nibhɛ bok iken. 19 Ɛli ne kɛ lenɛ nɛ ɛnyi ɛdaan na ne ɛ kɛ sang roos ibol ɛTaanggbey de ninyi na gbom teye ninaa ne mɔn ɛfɔt to, ɛlɛy ne kɛ ne ma lenɛ ne ɛnyi ɛdaan ne ɛ kɛ roos ibol ɛTaanggbey de kɛ ne say ninyi na gbom wu nibhɛ so cik ɛnu ɛyisɛ ɛTaanggbey ya. 20 Kaa yɛɛs ne iMɛmɛ ɛMuusaa da te sɛ tɔɔrek ɛfɔt to kpas. Kɛ ne sɛ ɛfɔt to kɛ hantey yɛ, izɛɛng ɛTaanggbey de kɛ ne ma hantey yɛ gbom iphɛ phyin ɛli ne i mɔn ɛfɔt to. 21 Kaabi i bo wu ɛli ne ɛfɔt to kaa bok ihwet daa ninyi gbom daa ɛli ne ɛbhɛ yɛɛs ne iku de, ɛlɛy ne izɛɛng ɛTaanggbey de ne bok ihwet daa ne ninyi na daa ɛli ne ihywɛ te i say nibhɛ wu nibhɛ so cik ɛnu ɛyisɛ ɛTaanggbey. iCik ge ne iphɛ nang iken ne inat lenɛ ne ɛYɛso ɛKiriti gha. |
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
Nigeria Bible Translation Trust