iRooma 2 - ɛWee ne ìTsɛm iHywas

ɛShara ɛTaanggbey ya So Cik

¹ iPhɛ ɛlɛy, igyɛ wo ne ɛ kɛ hyɛghɛ ɛhak ɛnyi na ɛshara gha sɔng ɛ bok ɛkɔn ne aa yɔngɔ nang, hang ɛ sɛ kyi soyɛ ɛhay yo. Wu ɛ kɛ hyɛ ɛhak ɛnyi gha ɛshara gha, ɛɛ robhos ito mo, daa ɛli ne ɛ ma kyii mɔn ɛkɔn na ne ɛ kɛ hyɛ ɛhak ɛnyi gha ɛshara gha ne ɛdak kɛwo.

² Njwɛɛn i yɛɛ ɛTaanggbey ya i hyɛ ɛshara ɛbhɛ gha cik dak ninyi na nɛ nibhɛ mɔn nikɔn nɛnaa wo.

³ iGyɛ ninyi wo! iPhɛ dee igyɛ ne ito mo ɛ ne ma kyi mɔn ɛkɔn na ne ɛ kɛ hyɛ ɛhak ɛnyi gha ɛshara gha daa ɛbhɛ wo! Ɛ ne ji wɛɛ te aa phɔrɔt ndɔ ɛshara gha ne ɛTaanggbey ya sɛ hyɛ woo?

⁴ Hang ɛ bɛɛs izɛɛng, ne ɛbɔk gbik ne iyɔm ne sang te njenjek ɛTaanggbey de ne ɛ bok ne igyɛ wo naa? Ɛ doo te izɛɛng ɛTaanggbey de ihywɛ te nyini ɛ hyere ɛn nyini ɛ tek ɛn ɛfɔt to naa?

⁵ Ɛ bok ito ihet ne irway gɛgɛy, ɛ ne waa ito mo ɛndok ɛTaanggbey, ne iphɛ sɛ phaal le ɛtuk ne njenjek ɛTaanggbey ya, ɛtuk ka ne sɛ tɔɔrek ɛli ne ɛTaanggbey ya i hyɛ ɛshara ɛbhɛ gha cik ko.

⁶ ɛTaanggbey ya sɛ mɔn ɛrɔngɔ iyɛnɛng cɛcɛɛy ne ɛkɔn na ne ɛ kɛ mɔn.

⁷ Nidɛng ne sonɛ nɛ nibhɛ kɛ see ito nibhɛ mɔn iyɛnɛng cɛcɛɛy, nibhɛ tɔk ndiinday ne igbom gbik ne iken ne iphɛ sang taal le. Nibhɛ ne ɛTaanggbey ya sɛ ne nang nibhɛ iken ne inat.

⁸ Nidɛng ne ma ji sonɛ nɛ nibhɛ ne sim ito, nibhɛ mbaray itin ne ibol nibhɛ ta i mɔn ibebhe, ɛTaanggbey ya sɛ ne tal nibhɛ ne njenjek gbik ne irway njɛt.

⁹ ɛGbaang nggbang ne ɛmpyep i hyep gbik ɛnyi gha ne ɛɛ mon ibebhe de, sɛ tsa nɛ niYahodawa, ne ji kungus nɛ ninyi na ne hame nibhɛ soye niYahodawa na.

¹⁰ Gbik ɛnyi gha ne ɛ mɔn iyɛnɛng ngge, sɛ ne nang ɛbhɛ ne ndiinday, ne igbom gbik ne irway ne laal, sɛ tsa nɛ niYahodawa ne ji kungus nɛ ninaa ne hame nibhɛ soye niYahodawa na.

¹¹ Sɔng ɛTaanggbey ya i tɔɔrek sim ito nang.

¹² Sɔng ninyi na ne hame nibhɛ so niYahodawa na bok iMɛmɛ ɛMuusaa da nang, nibhɛ kɛ ne mɔn ɛfɔt nibhɛ birit wɛlɛng ɛShara gha. niYahodawa na kaa ne bok iMɛmɛ ɛMuusaa da, nibhɛ kɛ ne mɔn ɛfɔt to sɛ ne bol nibhɛ ɛshara gha ndɔ ne ikpii ɛShara da.

¹³ Sɔng i tenes ɛShara gha zɔng iphɛ te i say ɛnyi gha wu ɛ so cik ɛlɔ ɛTaanggbey ya nang, i yang say ɛnyi gha ne ɛ kɛ roos ikpii ɛShara da gbik.

¹⁴ Sɔng ninyi na ne hame nibhɛ so niYahodawa na bok iMɛmɛ ɛMuusaa da nang, gbik ne iphɛ ɛlɛy, i ne sɛ idɛ nten nɛ nibhɛ ne mɔn ɛkɔn na ne iMɛmɛ da i bo wo. ɛLɛy iphɛ ne tɔɔrek wu nibhɛ wo nɛ nibhɛ sang iMɛmɛ ɛMuusaa da nibhɛ kɛ ne kyii teye ɛshara ne ito nibhɛ.

¹⁵ Nitomɛ nibhɛ na kɛ tɔɔrek wu kɛ haa ɛkɔn na ne iMɛmɛ da bo te mɔn no ndɔ ne irway nibhɛ. iZɔlɔs ne irway nibhɛ de ne ma ta tɔɔrek wu ɛlɛy ne iphɛ so itin nɛ daa ɛli ne izɔlɔs ne irway nibhɛ da i sɛ nibhɛ ne iben ne idɛ nten nɛ, ifɛ ne ma ta sɛ nibhɛ ne iyɛnɛng ne idɛ nten nɛ.

¹⁶ Iphɛ ɛlɛy, ɛli ne ibol iyɛnɛng ngɛdee wo ne nzi sanga wo i bol lo, ɛlɛy ne phɛ sɛ ne te ɛTuk ka ne ɛTaanggbey ya sɛ hyɛ ɛshara gha, lenɛ ne ɛYɛso ɛKiriti gha daa nikɔn na nɛ nibhɛ so igying ndɔ ne irway ninyi da.

niYahodawa na ne iMɛmɛ ɛMuusaa Da

¹⁷ iGyɛ wo ne ɛ bok ito mo de wu ɛ so ɛdɛng ndɔ niYahodawa na lɛɛ? Ɛ kɛ nang irway mo gbik daa ne iMɛmɛ ɛMuusaa da, ɛ hal ɛgyɛy ya wu ɛ soyɛ ɛhaa ɛTaanggbey,

¹⁸ ɛ bo wu i yɛɛ ɛkɔn na ne ɛTaanggbey ya sim te sɛɛ mɔn, ɛ ta bo wu i kɛ tɔng ɛ seng ndɔ ɛshara gha ɛli ne sɛɛ kasa ɛkɔn na ne ɛ kɛ jam.

¹⁹ Ɛ yɛɛ ncɛncɛng igyɛ ɛ so ɛhaa ne hɔ ninaa niwil ɛntsɛng, igyɛ ɛ so ɛwɛwɛy ninaa nɛ nibhɛ so ndɔ gbyik.

²⁰ Ɛ so ɛhaa ne mɛmɛ niwamang ngɛ, ɛkyɛɛ ne icwam ninyi nɛ nibhɛ bok icwas ninɔn, ɛ ne ta bo wu i yɛɛ ncɛncɛng wu ndɔ ɛShara gha ne ɛ kɛ sɛ ne ishweng gbik ne itin.

²¹ Wu iphɛ ne so ɛlɛ wo, igyɛ wo ne ɛ mɛmɛ nidɛng ngɛ wo, ne ɛ ma mɛmɛ ito mo nɛ! Ɛ mɛmɛ nɛ wu hang hyel ɛyi, ɛ ne sang hyel ɛyi ghaa?

²² Ɛ bo wu hang ra nzangas, ɛ ne sang ra nzangas dee? Ɛ bo wu ɛ bok ishis ne re igunkyi ntsong, ɛ ne sang hyel ɛyi ndɔ ne ideng ne igunkyi yɛɛ?

²³ iGyɛ wo ne ɛ hal ɛgyɛy ya ne iMɛmɛ ɛMuusaa da, ɛɛ sang kyii bees irywɛɛk ɛTaanggbey yo daa ɛli ne ɛ tes ɛshara ɛbhɛ gha tsaan noo?

²⁴ ɛWee ne ibol ɛTaanggbey yo i bo: “Kɛ lenɛ nɛ nyinɛn no niYahodawa na, ninaa ne hame nibhɛ so niYahodawa na kɛ ne bol ivol ne bɛɛs irywɛɛk ɛTaanggbey yo.”

²⁵ Wu ɛ kɛ ne shwaak ɛkɔn na ne iMɛmɛ da bol lo, ihyɛ itee mo da ne so ɛkɔn ɛyɛnɛng; wu ɛ kɛ ne sang shwaak, sɔng ne ˆɛ lap nyini ne ɛhaa ne kɛ sang hyɛ ɛbhɛ itee de nang.

²⁶ Wu ninaa ne kɛ sang hyɛghɛ nibhɛ icwee da kɛ shwaak ibol ɛshara de, ɛTaanggbey ya yaa ne sang bo nibhɛ tɛ ninaa ne hyɛghɛ icwee daa?

²⁷ Ninyi na nɛ nibhɛ sang hyɛghɛ icwee da ndɔ ɛli ne iMɛmɛ ɛMuusaa da i bo wo, nibhɛ kyii hyep iMɛmɛ yɛwo sɛ phoo yɛ ne. Nyinɛn niYahodawa na, ne ɛ bok iMɛmɛ da ne kɛ haa wo, ɛ ta so ɛhaa ne hyɛghɛ icwee da, ɛ kyii tes ɛkɔn na ne iMɛmɛ yɛ kɛ bol lo tsaan no.

²⁸ Sɔng ɛYahodawa ne itin na so daa ne ibek zɔng nang, sɔng ihyɛ itee ne itin de ne ma ta so ihyɛ ihuhu ne ibek kɛ zɔng nang.

²⁹ ɛYahodawa ne itin na so ɛnyi ne ɛ kɛ nang ɛTaanggbey irway ɛbhɛ gbik. iHyɛ itee ntin da ne so hyere irway lenɛ ne iKabyik ɛTaanggbey. Sɔng iphɛ so ibol ne hyep ɛkɔn ne kɛ haa ne ɛwee ɛShara zɔng nang. iHywee ɛnyi yɛdee nggyɛ wo ɛTaanggbey ɛbhɛ dɛp ɛbhɛ, sɔng ɛten ɛsii ɛbhɛ dɛp ɛbhɛ nang.