iRooma 15 - ɛWee ne ìTsɛm iHywas

Nang ɛGwaa Mogha iRway iHwala Sɔng iTo mo Nang

¹ Njwɛɛn no ne ìnang ne itin njwɛɛn da bok ihwet da, iphɛ so nggbinggbing njwɛɛn tɔɔk irighitik ninaa nɛ nibhɛ so kyɔkyɔt to. Te njwɛɛn nang nigwaa irway ihwala sɔng ito njwɛɛn nang.

² Te njwɛɛn yang mɔn nikɔn na nɛ nibhɛ yaa nang nigwaa njwɛɛn irway ihwala te iphɛ phyik nibhɛ te ìnang ne itin ne ibol nibhɛ de ne byik ghe.

³ Sɔng ɛKiriti gha kaa mɔn ɛkɔn na ne aa nang ito ɛbhɛ irway ihwala nang, ɛli ne ɛWee ne iBol ɛTaanggbey yo i bo, “iTowos ninyi da nɛ nibhɛ towos sɛ wo kɛ ho daa mee.”

⁴ Gbik nikɔn na ne kɛ haa ndɔ ne ɛWee ne iBol ɛTaanggbey yo kɛ haa te mɛmɛ njwɛɛn nɛ te njwɛɛn sit irwisɛ daa ɛli ne ɛWee ne iBol ɛTaanggbey yo kɛ nang njwɛɛn ɛbɔk, ɛbhɛ ne ta tes njwɛɛn itsɔngɔl gɛgɛy.

⁵ Te ɛTaanggbey ya ne ɛ nang ɛbɔk ka ɛ ta te itsɔngɔl de gɛgɛy yo, nang nyini ikabyik ne byinki ito mon ndɔ ne roos ngkɔɔl ɛYɛso ɛKiriti da.

⁶ Te gbik nyinɛn no ɛ te ɛ ɛnu ɛdaan ɛ dɛp ɛn ɛTaanggbey ye ne irway ijwaan ne ɛbhɛ so ɛKyɛɛ ɛDaray njwɛɛn ɛYɛso ɛKiriti.

⁷ Say ɛn nyini ne ibɔrɔ iphaa ɛli ne ɛKiriti gha kɛ ma say nyini wo, te ne lenɛ ɛlɛy ɛ nang ɛTaanggbey ye ne ndiinday.

⁸ Nzi tɔng nyini, ɛKiriti gha kaa ne mɔn ɛtomɛ gha ndɔ niYahodawa na te tɔɔrek wu ɛTaanggbey ya so ɛhaa ne shwaak ɛkɔn na ne ɛ kɛ ku ibol, te ne ta shwaak ɛkɔn na ne kaa sim nikyɛɛ-nikyɛɛ nibhɛ na nɛ wo.

⁹ Tɛ ninyi na ne hame nibhɛ so niYahodawa na ta nang ɛTaanggbey ye ne ndiinday daa ne isan iyɔm ɛbhɛ de. Te ɛli ne ɛWee ne iBol ɛTaanggbey yo i bo, “iPhɛ ɛlɛy ɛDaray, Naa ne nang ngɛ ne ndiinday ndɔ ninyi na ne hame nibhɛ so niYahodawa, naa yɛk ne iywel, te nang irywɛɛk mo wo ne ndiinday.”

¹⁰ Kɛ ne ta haa i bo, “Byinki ɛn nyini nɛ ninyi ɛTaanggbey ya ndɔ irway ihwala, nyinɛn no ne hame ɛ so ɛn niYahodawa na.”

¹¹ Ne ta yɔngɔ, “Nang ɛn ɛTaanggbey yegha ne ndiinday, nyinɛn no gbik ne hame ɛ so ɛn niYahodawa na, dɛp ɛTaanggbey ye, nyinɛn igbagha ɛzay yo gbik.”

¹² ɛNɛbi ɛShaa gha kɛ ne ta kyi yɔng, “ɛDɛng ndɔ ne itsan ɛYɛsɛ sɛ wuru, ɛ sɛ ne re igbɔm daa ninyi na ne hame nibhɛ so niYahodawa. Ninyi na hame nibhɛ so niYahodawa na, sɛ ne sit irwisɛ daa ɛbhɛ.”

¹³ Te ɛTaanggbey ya ne ɛ so ɛhaa ne te ɛnyi gha ɛ sit irwisɛ da, yɛk nyini ne irway ihwala hyɔrɔ, ne irway ne laal ndɔ nang ne itin de ne ɛ kɛ nang ɛn nɛ ne ɛbhɛ wo, te iKabyik ɛTaanggbey de te nyini ɛ raras ɛn ndɔ ne sit irwisɛ mon da.

Kɛ Tom ɛBulus segha ɛlɔ Ninyi ne Hame Nibhɛ so niYahodawa

¹⁴ Nigwaa ɛn, me ne ito nge nzi yɛɛ ɛli ne ɛ kɛ jam ɛn gbom, ɛ bok ɛn ishweng ngga gbik ɛli ne aa yɛɛ ne mɛmɛ ɛn nigwaa mon nɛ.

¹⁵ Gbik ne iphɛ ɛlɛy, nggɛ ne haa ɛwee yɛwoo wo ne irway nviit, nzi bol ne nyinɛn daa nidɛng nikɔn na te n taate nyini nɛ. Nzi bol ne irway nviit lenɛ ne izɛɛng ne ɛTaanggbey kɛ nang me,

¹⁶ te n te me ɛhaa ne mɔn ɛYɛso ɛKiriti yegha ɛtomɛ gha ɛlɔ ninyi na ne hame nibhɛ so niYahodawa na. Nzi mɔn ɛtomɛ ɛbo ɛTaanggbey ya ɛli ne nzi sanga iBol iYɛnɛng ɛTaanggbey de tɛ ninyi na hame nibhɛ so niYahodawa na teye ɛkɔn ne hap itsanga ne ɛTaanggbey ne kɛ tek ɛTaanggbey ye nɛ lenɛ ne iKabyik ɛTaanggbey.

¹⁷ iPhɛ ɛlɛy nzɛ ne yɛɛ ne hale ɛgyɛy ndɔ ɛYɛso ɛKiriti gha daa ɛtomɛ gha ne nzi mɔn ɛTaanggbey yegha nɛ wo.

¹⁸ Sɔng naa ne boote ne irway nviit daa ɛdɛ ɛkɔn na kang ne ɛkɔn na ne ɛhaa ne ɛKiriti gha kɛ mɔn lenɛ ne mee wo nang. Ɛ kɛ te ninyi na ne hame nibhɛ so niYahodawa na yaa roos ibol ɛTaanggbey de lenɛ ne ivol nge gbik ne ɛtomɛ nge,

¹⁹ ne ihwet ne nyu nikɔn, nɛ nikɔn ne kparat, lenɛ ne ihwet ne iKabyik ɛTaanggbey. iPhɛ ɛlɛy nggɛ le ne iYɛrushɛlɛm n phyii bhɛ hɔn iLirikum nzi sanga iBol iYɛnɛng ɛKiriti de n phyii taal ɛtomɛ yɛghaa wo gbik.

²⁰ iRway nge da has cɛcɛɛy te nzɛ ku i sanga iBol ɛYɛnɛng ngge ɛlɔ gha ne hame kɛ ku phok ne ibol ɛKiriti de, daa ɛli ne yaa yung yɔng wu nge mɔn ɛtomɛ ngɛ gha ɛlɔ gha ne ɛhak ɛnyi kɛ ku tsa nɛ.

²¹ Te ɛli ne ɛWee ne iBol ɛTaanggbey yo i bo: “Ninyi na ne hame kɛ tɔng nibhɛ ibol ɛbhɛ de, nibhɛ yaa ne yaang, ninyi na ne hame nibhɛ kɛ ne ku phok, nibhɛ yaa ne seng.”

²² iPhɛ phɛ kɛ te kɛ kyi ne kyɛngɛse me gbom, i ring me ne yɛɛs ɛlɔ mon na.

ɛBulus sa Bok iCwas ne Phɛ ne iRooma

²³ Sɔng ɛlɔ tɔ nɛ ne ivel lɛdaa wo ne naa mɔn ne ɛtomɛ nge gha nang. ɛLi ne nggɛ ne ku bo ishay de maa wo nzi sim te nzɛɛ yɛɛs n yaang nyini wo,

²⁴ ne n bok icwas ne yaang nyini ɛlyilyɛghaa wo. Nzi sim nzɛ phyii roos ɛlɔ mon na sɛ́ sɛ n phɛɛs ɛgarang ne iSabaniya. ɛTsim mɛ ne nggɛ ne phyɔngɔle ɛlɔ mon na n bok iyɛnɛng mon, nzi ne sim ɛ sɛ phyik ɛn mɛɛn ndɔ ne ihywel nge da.

²⁵ ɛLyilyɛghaa wo, ne n phɛɛs ne iYɛrushɛlɛm te mbɛ nang ninyi ɛTaanggbey ya nɛ nibhɛ so ɛnggyɛ wo iphyik.

²⁶ Daa ɛli nɛ ninaa ne iroos ne iMakyidɔniya nɛ ninaa ne iKaya kɛ nang iphyik ne irway ihwala te bhɛ phyik ninaa ɛTaanggbey ya nɛ nibhɛ so nihala na ne iYɛrushɛlɛm be.

²⁷ Ninyi ne iMakyidɔniya na kɛ mɔn ɛlɛ wo ndɔ ne irway ihwala, ibol lɛ kaa yung so nibhɛ nggbinggbing. Wu ninyi na ne hame nibhɛ so niYahodawa na kaa sɛ ɛwɛng ne iKabyik ɛlɔ niYahodawa na, iphɛ kɛ ne te nibhɛ nggbinggbing nibhɛ ma phyik niYahodawa na nɛ Niwɛng nikɔn iryat ta nɛ nibhɛ kɛ ma sɛ wo.

²⁸ Yaa sɛ nggɛ taal ɛtomɛ yɛghaa wo, nggɛ yaang ninyi nihala ɛTaanggbey ya nɛ nibhɛ so ne iYɛrushɛlɛm be kɛ say iphyik ga ne kɛ tom nibhɛ nɛwo, naa ne wum ɛnkiinɛ ne iSabaniya, n phyii roos ɛlɔ mon na.

²⁹ Nzi yɛɛ ncɛncɛng sɛ́ sɛnaa yɛɛs ɛlɔ mon na, nzɛ ne yɛɛs nyini ne ɛwɛng ɛKiriti hyɔrɔ.

³⁰ Nigwaa ɛn, nzi roro nɛ nyinɛn ndɔ ne irywɛɛk ɛDaray njwɛɛn ɛYɛso ɛKiriti ne ishwim ba ne iKabyik ge naas so, phyik ɛn mɛɛn ne bol ne ɛTaanggbey ndɔ ɛtomɛ yɛghaa wo ne nzi kyangas me nɛ wo.

³¹ Boote ɛn ne ɛTaanggbey ya ɛli ne naa bhɛ sɛ iphɔrɔt ne iwɔ ninaa ne sang roos ne iYahudiya na, te iphyik ga ne n phɛɛs ne nang ne iYɛrushɛlɛm de bhɛ say ye ne irway ihwala ɛlɔ ninaa ne roos ɛlɔ yɛwo.

³² Wu ɛTaanggbey kɛ sim, nzɛ ne tuu ɛlɔ mon na ne irway ihwala, njwɛɛn te en itsɔngɔl gɛgɛy.

³³ Te ɛTaanggbey ya ne ɛ nang irway ne laal da shɛɛ ne nyinɛn gbik. Ɛɛy.