iRooma 13 - ɛWee ne ìTsɛm iHywas

Te Roos iBol ne iGbɔm Ba

¹ iPhɛ so nggbinggbing ɛrɔngɔ roos ibol ne igbɔm ba, daa ɛli ne sɔng idɛ igbɔm ba sonɛ ne hame ɛTaanggbey ɛbhɛ kɛ nang ifɛ nang. ɛLɛy dɔng, gbik igbɔm ba ne ifɛ sonɛ wo ɛTaanggbey ɛbhɛ kɛ see ifɛ.

² iPhɛ ɛlɛy, gbik ɛnyi gha ne ɛ kɛ bɛɛs igbɔm ba ɛ kɛ ne bɛɛs ɛkɔn na ne ɛTaanggbey kɛ see, ninaa nɛ nibhɛ ne mɔn ɛlɛ wo nibhɛ ne hɔ nggbang daa ne ito nibhɛ.

³ Sɔng nigɔm ma so ɛkɔn ne ɛnik ɛlɔ ninyi na nɛ nibhɛ mɔn nikɔn niyɛnɛng nga nang, ifɛ yang so ɛkɔn ne ɛnik ɛlɔ ninyi na nɛ nibhɛ mɔn nikɔn nibebhe. ˆƐ sim te hame ɛ sɛ tel ɛgɔm maa? Ne ɛ mɔn ɛkɔn ɛyɛnɛng, ɛgɔm ma yaa ne ton nɛ.

⁴ ɛGɔm ma so ɛkpuru ɛTaanggbey ne ɛTaanggbey ya kɛ tek ɛbhɛ te ɛ phyik kɛ. Wu ne ɛ so ɛhaa ne mɔn ibebhe, ne ɛ phok ɛnik daa ɛli ne ɛgɔm ma bok igbɔm ne bak ɛnyi nggbang. Ɛ so ɛkpuru ɛTaanggbey, ɛ ne bak ɛnyi gha ne ɛ kɛ mɔn ɛTaanggbey ye ibebhe nggbang.

⁵ iPhɛ ɛlɛy, iphɛ ne so nggbinggbing ɛ roos ɛn ibol ne igbɔm ba, sɔng ne ɛ roos ɛn iphɛ ɛlɔ ne ɛ tel ɛn njenjek ɛTaanggbey zɔng nang, mɔn ɛn ɛlɛ wo daa ɛli ne icwas ne irway mon ifɛ ifɛ bok nyini ɛlɛy.

⁶ iBol lɛ iphɛ kɛ te ɛ ta taal ɛn ijam ne ivel, daa ɛli nɛ nindiinday ya i mɔn ɛTaanggbey ye ɛtomɛ, nibhɛ kɛ nang nten nibhɛ gbik ndɔ ɛtomɛ yɛghaa nggyɛ wo.

⁷ Tal ɛn ɛrɔngɔ gbik ɛkɔn na ne ɛ roos nyini. Wu ijam ne ne ivel te ɛ tal ɛn, wu ijam nikɔn te ɛ tal ɛn. Wu nang ɛnyi ne ndiinday te ne ɛ nang ɛn nɛ, wu phok ɛnik ɛnyi, te ne ɛ phok ɛn.

Sim ɛn Nigwaa

⁸ Tal ɛrɔngɔ gbik ɛkɔn na ne ɛ roos sɛ. ɛKɔn na ne ɛ so nggbinggbing ɛ roos ɛn nyini wo so ɛlɛ, tɔɔrek ɛn ishwim ndɔ mon cɛcɛɛy, daa ɛli ne ɛnyi gha ne ɛ sim ɛgwaa ɛbhɛ gha, ɛbhɛ kɛ shwaak iMɛmɛ ɛMuusaa da.

⁹ iKpii ndɔ ne iMɛmɛ ɛMuusaa da bo, “Sɔng ˆɛ ra nzangas sang, sɔng ˆɛ phoo ɛnyi nang, sɔng ˆɛ hyel ɛyi nang, sɔng ˆɛ phok ihyop ɛkɔn ɛnyi nang,” kɛ byinki nikɔn nɛnaa wo ne ɛbyin ne ikpii ne iMɛmɛ ɛMuusaa da ndɔ ne ibol idaan ne iphɛ bo; “Sim ɛgwaa mo ɛli ne ɛ sim ito mo.”

¹⁰ Wu ɛ sim ɛnyi gha sɔng aa ne mɔn ɛbhɛ ibebhe nang. iPhɛ ɛlɛy, ishwim ba ifɛ ne so kɛ shwaak iMɛmɛ ɛMuusaa da.

¹¹ iPhɛ so nggbinggbing ɛ mɔn ɛn ɛlɛ wo, daa ɛli ne ɛ kɛ seng ɛn wu nten nɛ kɛ tuu ne aa seme ɛn nwa mon da, nten ne phɔt njwɛɛn de yek cɛcɛk iphɛ phyin nten de ne njwɛɛn kaa tsa nang ɛn ne itin nɛ wo.

¹² ɛTuk ka yek gbang, ihwɛlɛ yungaa wuru. iPhɛ ɛlɛy te njwɛɛn hana nitomɛ ndɔ gbyik ka njwɛɛn yɛk en ne nikɔn ne itsom ninaa nɛ nibhɛ so iwɛwɛy.

¹³ Te njwɛɛn hyel byirik tɛ ninyi nɛ nibhɛ so ndɔ ne iwɛwɛy. Sɔng njwɛɛn teye ninaa sim ijwira ne sɔ i re i tes ziizii wo nang, sɔng njwɛɛn ne teye ninaa ne nzangas sa nang, sɔng njwɛɛn ne phok iyɛnɛng nikɔn na nɛ nibhɛ ninaa ne iyɔm ncwa na nang, sɔng njwɛɛn teye ninaa ne ishamas sa nang, sɔng yɛk ɛnkyis sa nɛ nigwaa na nang.

¹⁴ Te njwɛɛn yang boos ɛDaray ɛYɛso ɛKiriti yegha cɛcɛk ne ibek te ɛtura ne njwɛɛn kɛ yɛk ngɛ, sɔng njwɛɛn sim i roos icwas ne irway njwɛɛn da ne ifɛ aa te njwɛɛn yaa sim ibebhe de nang.