iRooma 1 - ɛWee ne ìTsɛm iHywas

iKyili

¹ ɛBulus ne ɛ so ɛkpuru ɛYɛso ɛKiriti ne ɛYɛso, ne ɛTaanggbey kɛ yel-le ɛbhɛ te ɛ teye ɛngɔn ne tom ɛDaray, ɛ ta kasa ɛbhɛ te ɛ sanga iBol iYɛnɛng ɛTaanggbey.

² ɛTaanggbey ya kaa ku sim-mɛ ne ile daa ne iBol iYɛnɛng ngɛdee wo lenɛ nɛ ninabawa ɛbhɛ nɛ nibhɛ kɛ haa ndɔ ne ɛWee ne iBol ɛTaanggbey yo.

³ iBol iYɛnɛng ngge kaa ne so daa ɛNgɔn ɛbhɛ, ɛhaa ne ndɔ ne ibol ne ibek ɛten ɛsii, i kɛ yɛk ɛbhɛ ndɔ ne icwaang ɛDoda.

⁴ Ndɔ ne ibol de ne ɛ le ɛlɔ ɛTaanggbey ya ne idee ne iwɛwɛy ɛbhɛ de nang, kaa ne tɔɔrek ɛli ne ɛ so ɛngɔn ɛTaanggbey ya nten de ne kaa yiisik ɛbhɛ tsik ndɔ ne ikpuu da lenɛ ne ihwet ne iKabyik ɛTaanggbey de. Ɛbhɛ ne ɛ so ɛYɛso ɛKiriti ɛDaray njwɛɛn.

⁵ Kaa ne lenɛ ne ɛDaray ɛYɛso gha, te ne ta nang irywɛɛk ne ndiinday, kɛ ne nang izɛɛng ɛTaanggbey ne ɛ ta yel-le me te n te me ɛhaa ne tom ɛbhɛ mbɛ tɔng ibol ɛbhɛ de ɛlɔ ninyi na ne hame nibhɛ so niYahodawa na gbik, tɛ nibhɛ nang ne itin nɛ, nibhɛ ta roos nɛ ihywɛɛ.

⁶ iBol lɛdee wo kɛ ne ma dat nyini, nyinɛn no ne kɛ yel-le nyini wo te ɛ te ɛn nyini ninaa ɛYɛso ɛKiriti gha.

⁷ Nyinɛn no ne ɛ so ɛn iRooma de ne ɛTaanggbey ya i sim nyini ɛ kɛ ta yel-le nyini te ɛ shɛɛ ɛn kang, Te izɛɛng ne irway ne laal ɛTaanggbey ne ɛ so ɛkyɛɛ njwɛɛn gbik ne ɛDaray ɛYɛso ɛKiriti shɛɛ ne nyinɛn.

ɛBulus sa kɛ Has iRway ne Phɛ ne iRooma

⁸ Naa tsa n tɔɔrek ɛTaanggbey irway ihwala lenɛ ne ɛYɛso ɛKiriti gha daa mon no gbik, daa ɛli ne i tɔng ngka ne ìnang ne itin de mɔn ndɔ ɛzay ya gbik.

⁹ ɛTaanggbey ya ne nzi mɔn ɛtomɛ ɛbhɛ gha ne irway nge ijwaan da daa ne sanga iBol iYɛnɛng ɛNgɔn ɛbhɛ de, ɛbhɛ ne ito ɛbhɛ ɛ kɛ tɔɔrek ɛli ne nzi ku tas ne nyinɛn cɛcɛɛy,

¹⁰ gbik nten de ne naa boote ne ɛbhɛ. Nzi ne roro ne te ɛTaanggbey ya wu ɛ kɛ sim te ne ɛ phaal me ɛnkiinɛ ne naa sɛ n yɛɛs ɛlɔ mon na.

¹¹ Nzi ku has irway te nzɛɛ yaang nyini te n te nyini ɛ sɛ ɛn nidɛng Niwɛng nga ne iKabyik ɛTaanggbey ya i nang, te iphɛ te nyini itsɔngɔl gɛgɛy.

¹² Kaabi nzi bo te njwɛɛn byinkit i te en itsɔngɔl gɛgɛy ngkak. Te n te nyini itsɔngɔl gɛgɛy, ɛ ma te ɛn mɛɛn itsɔngɔl gɛgɛy ndɔ ne ìnang ne itin de.

¹³ Nigwaa ɛn, nzi sim te ɛ sɛ seng ɛn wu nggɛ bo nten nzi sim te na yɛɛs ɛlɔ mɔn na, kɛ ne ring me nɛ. Nggaa sim te nzɛɛ sɛ nidɛng ndɔ mon no nibhɛ teye ninaa ne roos, te ɛli ne nggɛ sɛ ndɔ ɛbyin ninyi na ne hame nibhɛ soye ninaa ne roos sa.

¹⁴ iRighitik ninyi de gbik ne so daa ne ito nge, ninaa ɛhay nɛ ninaa ne ijwee, ninyi nibhɛ bok ishweng nɛ ninaa ne hame bhɛ bok ishweng.

¹⁵ iPhɛ phɛ kɛ te nggɛ has irway da te sɛ yɔng nggɛ ma yɛɛs n tɔng nyini iBol iYɛnɛng ngge nyinɛn no ne ɛ so ɛn iRooma de.

¹⁶ Sɔng n bok ncwa ne iBol iYɛnɛng ngge nang, daa ɛli ne iphɛ so ihwet ɛTaanggbey ne iphɛ phɔt gbik ɛnyi gha ne ɛ kɛ nang ne itin nɛ: i tsa nɛ niYahodawa ne ji kungus nɛ ninyi na ne hame nibhɛ so ɛn niYahodawa.

¹⁷ Daa ɛli iBol iYɛnɛng ngge iphɛ phaal ɛli ɛTaanggbey ya i say ɛnyi wu ɛ so cik. Ninyi na ne say icik kɛdee nggɛ wo lenɛ ne nang ne itin nɛ, ɛli ne kɛ haa i bo: “ɛCik ka yaa shɛɛ ɛken lenɛ ne nang ne itin nɛ.”

Njenjek Daa Ninyi ɛZay Gbik

¹⁸ Kɛ phaal ɛli ne njenjek ɛTaanggbey de sɛ le daa ne irywa ihywɛ yɛɛs daa ninaa ne ɛfɔt ta, nɛ ninyi nibebhe na, nɛ ninaa ne yɛbhɛsek itin de lenɛ ne ibebhe nibhɛ de.

¹⁹ ɛKɔn na ne aa te i seng ɛkɔn daa ɛTaanggbey ya ɛ so wɛsɛrɛk ɛnu ɛyisɛ nibhɛ gha, daa ɛli ne ɛTaanggbey ya ɛbhɛ kɛ tɔɔrek nibhɛ.

²⁰ Sɔng ɛTaanggbey ya, ɛli ne ɛ so wo, gbik ne igbom ne ihwet ne inat ɛbhɛ de so ɛli ne i yaang ne irwisɛ nang. Kɛ ne lenɛ ne nten de ne kɛ ryɔng ɛzay ya kɛ ne seng iTaanggbey ɛbhɛ de ndɔ nikɔn ɛzay ya wɛsɛrɛk, ninyi na ne yaang. iPhɛ ɛlɛy sɔng nibhɛ ne ta bok ɛkɔn nɛ nibhɛ yaa ta yɔngɔ nang.

²¹ Ɛli nɛ nibhɛ yɛɛ ɛTaanggbey yegha, gbik ne phɛ ɛlɛy sɔng nibhɛ kɛ ne nang ɛbhɛ ne ndiinday wo ɛ so ɛTaanggbey yang, sɔng nibhɛ kɛ ne ta tɔɔrek ɛbhɛ irway ihwala nang. iCwas nibhɛ da kɛ ne yang kyi te buu, irway nibhɛ da ne ifɛ sang seng ɛkɔn na kɛ ne te gbyik.

²² Gbik ɛli nɛ nibhɛ wɛɛ tɛ nibhɛ bok ntsɛntsɛng ngge, nibhɛ ne kyi so niwamang.

²³ Nibhɛ kɛ sunu re ɛTaanggbey ne ndiinday yegha ntsong, ɛTaanggbey ya ne hame ɛ ku wo, nibhɛ kyi yaa re igunkyi ne iphɛ so te ɛten ɛsii ne iphɛ ku, nɛ ninon, ne inyam ɛhay gbik nɛ nikɔn ne hyel ne ibuu ntsong ngga.

²⁴ iPhɛ ɛlɛy, ɛTaanggbey kɛ ne tek ndɔ mɔn nikɔn nibebhe na ne irway nibhɛ da i sim mo, nibhɛ mɔn nikɔn ne yɔm ncwa ne ibek de.

²⁵ Nibhɛ kɛ sunu itin ɛTaanggbey de iphɛ teye irywɛɛk. Nibhɛ ne kyi yaa re nikɔn ne ɛTaanggbey ya kɛ ryɔng ntsong nibhɛ mɔn nibhɛ nitomɛ, nibhɛ ji kyii tek ɛTaanggbey yegha ne ɛbhɛ ɛ kɛ ryɔng nikɔn na, ne ɛbhɛ ɛ so ɛhaa ne ya ku i dɛp ɛbhɛ ishay-ishay. Ɛɛy.

²⁶ iPhɛ ɛlɛy, ɛTaanggbey ya ne tek nibhɛ tɛ nibhɛ roos ihyop ne ibek nibhɛ de ne phɛ so ɛkɔn ncwa gha. Nikuk nibhɛ na ne sunu, sɔng nibhɛ tɔ sɛme ne ɛras ne ɛkuk ka ɛli ne phɛ ku so wo nang, nibhɛ ne yaa sɛmɛs en ne nkiinɛ wo ne hame kɛ ryɔng ɛbhɛ ɛlɛy.

²⁷ Kɛ ne ma sɛ ihyop ne ibek niras de kɛ yɛk nibhɛ nɛ, nibhɛ ne ma kɔɔng sɛmɛs en nɛ nikuk ɛli ne kɛ ku ryɔng ngo. Niras nɛ niras ne ma yaa mɔn ɛkɔn ncwa ɛlɛy nibhɛ kɛ hɔ ito nibhɛ nggbang ngga ne ɛbhɛ so cɛcɛɛy ne ibebhe nibhɛ de.

²⁸ Daa ɛli nɛ nibhɛ kɛ mbaray tang hyel ihywel da nɛ nibhɛ yɛɛ daa ɛTaanggbey ya, ɛTaanggbey ya kɛ ne tek nibhɛ, nibhɛ yɛk icwas ivebhe te ifɛ te nibhɛ, nibhɛ mɔn nikɔn na ne hame nibhɛ kɛ jam nibhɛ sɛ mɔn.

²⁹ iRway nibhɛ ba so hyɔrɔ ne yɔm ne icik, ne ibebhe de ihywee-ihywee; ɛnyɛs, ne irisɛ, sim ito. Nibhɛ so hyɔrɔ ne ɛnkyis, ne irway ne phoo ɛnyi, ne irywen, ne iluk gbik ne irway ishwii. Nibhɛ ta bok ivol mumuk,

³⁰ Nibhɛ so ninaa ne ivol ikpɛɛ, ninaa ne iphup ne ɛTaanggbey. Ninaa ne towos, ninaa ne tɔɔsek ito, ninaa ne hal ɛgyɛy, ninaa ne robhos ibebhe, nɛ ninaa nibhɛ sang phok ibol nikyɛɛ.

³¹ Nibhɛ so niwamang, sɔng nibhɛ i shwaak ɛkɔn na ne kɛ rop nang. Nibhɛ so ninaa ne sang sim nigwaa, ninaa ne sang san iyɔm.

³² Nibhɛ yɛɛ ɛli ne ɛshara ɛTaanggbey ya bo wu gbik ninyi na nɛ nibhɛ mɔn nikɔn nɛnaa wo, iphɛ kɛ jam mɛ nibhɛ kus. Gbik ne iphɛ ɛlɛy sɔng nibhɛ i ne ma yung mɔn nikɔn nɛnaa wo zɔng nang, nibhɛ roos ɛduu ninyi na nɛ nibhɛ mɔn ihywee nikɔn nɛnaa wo.