iGalatiya 6 - ɛWee ne ìTsɛm iHywas

Tɔɔk ɛn Nggbang Nigwaa

¹ Nigwaa en, wu kɛ sɛ ɛnyi gha mɔn ɛfɔt to, nyinɛn no ne ɛ so ɛn ndɔ ne ikabyik ge, ne ɛ kyi ɛn ne ɛbhɛ ne nkiinɛ wo hywɛɛ. Tɛ ne ɛ ma wɛɛ ɛn nyini yɛnɛng, ɛlɔ ne aa ma yung kyibhɛ ɛn daa ne tɛrɛk kɛ ne mang.

² Tɔɔk ɛn nggbang nigwaa da, ɛlɛy ne aa ne shwaak ɛn ɛShara ɛKiriti gha.

³ ɛNyi gha ne ɛ tɔɔsek ito ɛbhɛ de ɛ wɛɛ te ɛ sɔ ɛkɔn na, sɔng ne ɛ so ɛkɔn nang, ɛɛ luk ito ɛbhɛ.

⁴ Te ɛrɔngɔ tɛɛsek ɛtomɛ ɛbhɛ ne ito ɛbhɛ. Wu ɛtomɛ yɛ kɛ jam, aa ne yɛɛ ne hal le ɛggyɛy. Sɔng ne ɛ ten ito ɛbhɛ de ne ɛhak ɛnyi nang.

⁵ Daa ɛli ne iphɛ so nggbinggbing te ɛrɔngɔ mɔn ɛhaa ɛbhɛ ɛtomɛ.

⁶ Gbik ɛnyi gha ne i kɛ mɛmɛ ɛbhɛ ne bol ɛTaanggbey de, tɛ ne ɛ ma mɔn ɛKyɛɛ ne icwam ɛbhɛ gha ɛkɔn ɛyɛnɛng.

⁷ Sɔng ˆɛ luk ɛn ito mon nang. Daa ɛli ne sɔng i yɛɛ ne luk ɛTaanggbey yegha nang. Gbik ɛkɔn na ne ɛnyi gha kɛ tup, ɛbhɛ ne ɛ sɛ ne bhɛ pha.

⁸ Wu ɛnyi gha kɛ nikɔn ne ɛfɔt ta ne ibek ge sim mo, ɛ sɛ ne bhɛ pha iku. Wu ɛ kɛ ne tubhus ndɔ ne nikɔn na iKabyik ɛTaanggbey sim, ɛ sɛ ne bhɛ sɛ iken ne inat lenɛ ne ikabyik ge.

⁹ Sɔng njwɛɛn te kpos ne mɔn nikɔn ne yɛnɛng nga nang, daa ɛli ne nten nɛ yaaso ne njwɛɛn sɛ bhɛ pha nikɔn na ne njwɛɛn kɛ tubhus so, wu njwɛɛn kɛ sang te kpos kɔp.

¹⁰ iPhɛ ɛlɛy, gbik nten de ne njwɛɛn kɛ sɛ, te njwɛɛn mɔn ninyi na gbik nikɔn niyɛnɛng, yang ji so ninaa ne roos ɛKiriti yegha.

iBol ne Taal Lɛ

¹¹ Ɛ yaang ɛn njwinjway ne ilwing ngɛdaa woo? Mee nzi haa nyini nɛ ne iwɔ nge.

¹² Ninyi na nɛ nibhɛ sim tɛ nibhɛ yaa yɛk nyini nɛ nggbinggbing ɛ hyɛghɛ ɛn icwee da, nibhɛ sim te sɛɛ yɔng wu nibhɛ mɔn ɛkɔn ɛyɛnɛng. Nibhɛ mɔn nyini ɛlɛ wo ɛlɔ nɛ nibhɛ yaa yung sɔ nggbang daa ne ibol ne gangat ɛKiriti ye.

¹³ Ninaa ne kɛ hyɛghɛ nibhɛ icwee da, sɔng nibhɛ ne roos ɛShara da gbyak kang. Nibhɛ sim te sɛ ma hyɛghɛ nyini icwee da te nibhɛ sɛ nibhɛ hal ɛgyɛy ne nyini daa ɛli nɛ nibhɛ kɛ yɛk ngɛ i hyɛghɛ nyini icwee da.

¹⁴ Sɛɛ so te me wo, sɔng naa ne hal ɛgyɛy ya nang. Wu naa yung hal ɛgyɛy ya, naa ne hal daa ne bol ne gangat ɛDaray njwɛɛn ɛYɛso ɛKiriti ye, daa ɛli ne ibol ne gangat ɛYɛso yede kɛ te nikɔn ɛzay ya te te ikom ɛlɔ nge gha, nggɛ ne ma te te ikom mɛ ɛlɔ nikɔn ɛzay ya.

¹⁵ Sɔng ibol ne hyɛ itee de ne sang hyɛ itee de iphɛ phɛ soye ɛgbaang ɛkɔn nang. ɛGbaang ɛkɔn no so, te kyii ryɔng ɛnyi gha iryɔng ifas.

¹⁶ Te irway ne laal, ne san iyɔm ɛTaanggbey shɛɛ daa ninaa nɛ nibhɛ roos ikpii yɛdaa wo, nibhɛ bhɛ soye ninyi niphas ɛTaanggbey ya!

¹⁷ Naa ne ta yaak nyini, sɔng ɛdɛ ɛnyi ne tang ta tak me iyɔm be nang, daa ɛli ne itsili de ne n bok ne ibek nge de kɛ tɔɔrek wu n some ɛkpuru ɛYɛso gha.

¹⁸ Nigwaa nge, te izɛɛng ɛDaray njwɛɛn ɛYɛso ɛKiriti de shɛɛ ne nyinɛn gbik. Ɛɛy!