iGalatiya 1 - ɛWee ne ìTsɛm iHywas

iKyili ɛBulus

¹ ɛWee yɛwoo wo le ɛlɔ ɛBulus ne ɛ so ɛNgɔn ne Tom ɛYɛso ɛKiriti. Sɔng ɛnyi ɛbhɛ kɛ kasa me nang, sɔng ninyi nibhɛ kɛ ne ta nang me ɛtomɛ yɛ nang. Yang so ɛYɛso ɛKiriti gha ne ɛTaanggbey ne ɛ so ɛTaa ne ɛ kaa yiisik ɛbhɛ ne ikpuu da ɛbhɛ kɛ yel-le me.

² Nigwaa na gbik ne njwi sonɛ nibhɛ ɛbɛ wo i kyiisi nyini ninaa ne roos ne iGalatiya na.

³ Te ɛTaanggbey ya ne ɛ soye ɛKyɛɛ njwɛɛn na ne ɛDaray ɛYɛso ɛKiriti gha nang nyini izɛɛng ne irway ne laal ɛbhɛ.

⁴ ɛKiriti gha kɛ nang ito ɛbhɛ ɛlɔ ne ɛfɔt njwɛɛn te ne ɛ phɔt njwɛɛn ndɔ ɛzay ɛbebhe yeghaa wo ɛli ne ɛTaanggbey ya ne ɛ so ɛKyɛɛ njwɛɛn na i sim.

⁵ Te ne nang ɛbhɛ ne ndiinday de cɛcɛɛy. Ɛɛy.

iBol iYɛnɛng ngge ku So iPhɛ Daan Zɔng

⁶ iPhɛ some ɛkɔn ne kparat ne ˆɛ kɛ shii hyere nyini ˆɛ tek ɛn ɛnyi gha ne ɛ kɛ yel-le nyini lenɛ ne izɛɛng ɛKiriti de ˆɛ yaa roos ɛn ɛhak ɛnkiinɛ wo ne ˆɛ wɛɛ ɛn te ɛbhɛ ɛbhɛ so ibol iyɛnɛng ngge.

⁷ ɛTsak, sɔng idɛ ibol iyɛnɛng ngge sonɛ kang nang. Nggɛ boote ɛlɛ wo, daa ɛli nɛ nidɛng ninyi na sonɛ nɛ nibhɛ hyeem ibol iyɛnɛng ɛKiriti de ne nggɛ tɔng nyini wo.

⁸ Gbik ɛnyi gha ne ɛ kɛ yɛɛs ɛ tɔng nyini idɛ ibol de ne iphɛ so kang ne idee njwi kɛ ku tɔng nyini wo, te ɛ teye ɛhaa ɛkawɛy, ɛhiha ɛnyi sɛɛ kyi le ndɔ mos so, hang ɛmalɛka ɛdaa ne irywa yɔɔ.

⁹ ɛLi ne njwi kaa ku tɔng nyini wo, nzi ne ta tɔng nyini iphɛ ɛlyilyɛghaa wo dɔng, wu ɛdɛ ɛnyi gha kɛ yɛɛs ɛ tɔng nyini idɛ ibol de ne iphɛ so kang ne idee ne ɛ kɛ ku say no, te ne te ne ɛ teye ɛhaa ɛkawɛy.

¹⁰ Ɛ wɛɛ ɛn te nzi mɔn ɛlɛ wo tɛ ninyi ton me naa? Yɛwɛy, nzi sim te ɛTaanggbey ɛbhɛ aa sim ɛkɔn na ne nzi mɔn no. Ɛ wɛɛ ɛn te nzi sim naa laasek niten irway ye? Yɛwɛy, sɛ yɔng ɛlɛy, sɔng nzɛ ne te me ɛkpuru ɛKiriti gha nang.

Ɛli ne ɛBulus sa kɛ Teye ɛNgɔn ne Tom Ma

¹¹ Nigwaa en, naa mɔng nyini, sɔng ɛnyi ɛbhɛ bok ibol iyɛnɛng ngge ne nggɛ tɔng nyini wo nang.

¹² Sɔng nggɛ say iphɛ ɛlɔ ɛten ɛsii nang. Sɔng nggɛ ne ta mɛmɛ nɛ ɛlɔ ɛnyi nang. ɛYɛso ɛKiriti gha ne ito ɛbhɛ ɛbhɛ kɛ tɔɔrek me.

¹³ Ɛ kɛ phok ɛn ihywee ne ishwɛɛ da ne nggaa so ndɔ ne roos iKpii niYahodawa da, ɛli ne nggaa baasek idira ninaa ne roos ɛTaanggbey de nggbang ngga gagak ko, nzi tɔk ɛli ne naa bees nibhɛ wo.

¹⁴ Ɛ ta yɛɛ ɛn ɛli ne mee nggaa some ɛhaa ɛyisɛ yɛ ndɔ nitaay nge na daa ne ibol ne roos ikpii niYahodawa da, n da bok irway ne roos ikpii nikyɛɛ nikyɛɛ mos da.

¹⁵ Kaa ne lenɛ ne izɛɛng ɛTaanggbey de ɛ kaa ne ku kasa me ɛli ne kɛ tang yɛk me, ne ɛ ji yel-le me nten de ne ɛ kɛ sim.

¹⁶ Te ɛ phaal me irwisɛ ne seng ɛngɔn ɛbhɛ gha, te mbɛ tɔng ninyi na ne hame nibhɛ ne so niYahodawa na ibol iyɛnɛng ɛbhɛ de. Kaa ne sɛ ɛ kɛ mɔn ɛlɛ wo, sɔng nggaa ne bhɛ phom ɛnyi ɛli ne naa mɔn nang.

¹⁷ Sɔng nggaa ne ta kyi phɛ ne iYɛrushɛlɛm ɛlɔ ninaa nibhɛ ku soye Ninɔn ne Tom ma ɛyisɛ nge gha nang. Nggaa ku phee mbɛ ne iRabiya ne mbɛ kyii mbɛ ne iDimaskus.

¹⁸ Ne sɛ ishay itat kɛ phee, ne n ji phɛ ne iYɛrushɛlɛm be ɛlɔ ɛSimɔn ɛBiturus, ne mbɛ shɛɛ ɛlɔ ɛBiturus sa nituk ɛnduwubɔ nɛ nibhɛ iwii.

¹⁹ Sɔng nggaa ne bhɛ yaang ɛdɛ ɛNgɔn ne Tom ma kang ne ɛYakub pa ne so ɛgwaa ɛDaray ya nang.

²⁰ iBol lɛ de wo ne nzi haa wo iphɛ soye itin nɛ. ɛTaanggbey i yɛɛ sɔng irywɛɛk ne nzi wul nang.

²¹ ɛTsim mɛ, ne n ji phɛ ne ivel ne iSiriya ne iSilisiya.

²² Nten nɛdee nggyɛ wo, sɔng ninaa ne roos ɛKiriti gha nɛ nibhɛ so ne iYahudiya de kaa ku yaang me ne irwisɛ nibhɛ nang.

²³ Nibhɛ gha ku i phok zɔng ɛli ninyi bo; “ɛNyi gha ne ɛ kaa baasek njwɛɛn nggbang ngga gagak kɛ ma kyi yaa tɔng ibol ne ìnang ne itin ne ɛ kɛ i sim te aa bees so.”

²⁴ Nibhɛ ne nang ɛTaanggbey ye ne ndiinday daa ɛkɔn na ne ɛ kɛ mɔn ne me wo.