iFisus 4 - ɛWee ne ìTsɛm iHywas

iShwɛɛ ne Byinki iTo

¹ iPhɛ ɛlɛy, mee wo ne nzo ne nyang ngge daa ɛli ne nzi roos ɛKiriti yegha, nzi roro ne nyinɛn, shɛɛ ɛn ishwɛɛ da ne ifɛ so kancɛng yel-le da ne kɛ yel-le nyini nɛ wo.

² Shɛɛ ɛn lyaak cɛcɛɛy, te ɛ so ɛn hywɛɛ, ne ɛbɔk. Boos ɛn nigwaa ndɔ ne ishwim.

³ Mɔn ɛn gbik ɛkɔn na ne ˆaa mɔn ɛn te ˆɛ shɛɛ ɛn ishwɛɛ ne byinki ito da ne iKabyik ge ne kɛ nang nyini wo lenɛ ne irway ne laal da ne ifɛ kɛ byinki nyini wo.

⁴ Ɛ so ɛn ibek idaan, iKabyik ɛTaanggbey idaan nɛ iphɛ so ndɔ mon. ɛLɛy dɔng sit ne irwisɛ ijwaan nɛ ne ta sonɛ ne kɛ yel-le nyini nɛ.

⁵ ɛDaray ɛdaan, ìnang ne itin idaan, ibatisima idaan nɛ.

⁶ ɛTaanggbey ɛdaan, ɛbhɛ ɛ soye ɛKyɛɛ ninyi na gbik, ɛDaray gbik, ɛɛ mɔn ɛtomɛ ndɔ nikɔn na gbik, ne ɛ so ndɔ nikɔn na gbik.

⁷ Gbik ne iphɛ ɛlɛy, kɛ ne nang ɛrɔngɔ ìnang ngga lenɛ ne izɛɛng ɛKiriti de, ɛli ne iphɛ jam ɛKiriti yegha nɛ.

⁸ ɛLi ne ɛWee ne iBol ɛTaanggbey yo i bo, “Nten de ne ɛ kaa wara daa irywa wo ɛ kaa boos ɛlang nikpuru ne ɛ kɛ wumus. Ɛ ta naas ninyi na ìnang ngga ihywee-ihywee.”

⁹ ɛYa ɛkɔn ne i bol ne i bo, “ɛ kaa wara woo?” I bo wu ɛ kaa tsa ɛ tɔm ndɔ ɛta ne ivel.

¹⁰ ɛNyi gha ne ɛ kaa tɔm mo ɛbhɛ kaa ne ta wara daa ne nyu ne irywa wo te ɛzay ya te hyɔrɔ ne ihyɔrɔ ɛbhɛ gbik.

¹¹ Ɛbhɛ ɛ kɛ ne ta naas ninyi na ìnang ngga kang-ka-kang, tɛ nidɛng teye ninɔn ne tom, nidɛng teye ninabawa, nidɛng teye ninaa ne sanga iBol iYɛnɛng, nidɛng teye ninaa ne hyep ᐩigyol ɛTaanggbey, nidɛng teye nikyɛɛ ne icwam.

¹² Ɛ kɛ mɔn ɛlɛ wo te ɛ ryɔng ninyi ɛTaanggbey ya nibhɛ mɔn ɛtomɛ ɛbhɛ, nibhɛ lɔl ibek ɛKiriti de.

¹³ ɛLɛ wo ne yaa ne i mɔn nyɛɛn njwɛɛn kyi teye nidaan nɛ ndɔ ne ìnang ne itin da gbik ne ishweng ne seng ɛNgɔn ɛTaanggbey ya. Njwɛɛn teye ninyi nɛ nibhɛ kɛ hɔn, nibhɛ te hyɔrɔ ɛli ne ɛKiriti gha so wo.

¹⁴ Kɛ mɔn ɛlɛ wo te njwɛɛn kɔɔng nge kaan ne ihywɛɛ njwɛɛn de tɛ ninɔn nishɛɛrɛng nga. Te njwɛɛn sang teye ninyi ne i kaan ne ihywɛɛ nibhɛ te icwen ne igbil kɛ luu. Te njwɛɛn sang teye ninyi ne imɛmɛ ne iluk i hyeem ihywɛɛ nibhɛ ifɛ bok ngɛ nilɔ na kang-ka-kang.

¹⁵ Te yang i tɔng itin nɛ ndɔ ne ishwim, njwɛɛn hɔn ndɔ nikɔn na gbik, i te hyɔrɔ te ɛKiriti gha ne ɛbhɛ so iTo njwɛɛn de.

¹⁶ Ɛbhɛ ɛ bok igbɔm ndɔ ne idira ninaa ne roos de nɛ nibhɛ so tɛ nilɔ ne ibek ka. Nilɔ ne ibek ka ne kɛ byingis lenɛ ne ᐩitsibhi de, ɛrɔngɔ i mɔn ɛtomɛ ɛbhɛ gha te ibek ge ne i hanas ne hɔnɔs sɛ ndɔ ne ishwim ba.

iKen iPhas ndɔ ɛDaray

¹⁷ iPhɛ ɛlɛy, nzi ne tɔng nyini, nzi kpɛng nyini ndɔ ne irywɛɛk ɛDaray, sɔng ˆɛ tɔ shɛɛ ɛn tɛ ninaa nɛ nibhɛ doo ɛTaanggbey yegha ne icwas nibhɛ da so icwas ɛbuu da nang.

¹⁸ iRway nibhɛ da so hyɔrɔ ne igbyik. Kɛ hosop nibhɛ ne iken de ne ɛTaanggbey ya i naas so daa ne iyɔm ne seng nɛ nibhɛ bok lenɛ ne ito ihet.

¹⁹ Sɔng nibhɛ tɔ ne ncwa nang. Nibhɛ kɛ nang irway nibhɛ gbik ndɔ nzangas, nibhɛ has irway tɛ nibhɛ sɛ i mɔn nikɔn ne ishis kang-ka-kang.

²⁰ Sɔng ɛkɔn nɛghaa wo ne ˆɛ kɛ ne mɛmɛ ɛn nɛ daa ɛKiriti gha nang.

²¹ ɛTsak, ˆɛ kɛ phok ɛn ibol ɛbhɛ de, kɛ ne mɛmɛ nyini ne itin de ne i sɛ ndɔ ɛYɛso gha.

²² iPhɛ ɛlɛy hana ɛn ishwɛɛ icwɛl mon da ne ˆɛ kaa i shɛɛ ɛn nɛ wo. iShwɛɛ icwɛl mon da ne ifɛ i bees ibek ge lenɛ ne iluk ga ne ibek ge i sim mo.

²³ iPhɛ kɛ jam mɛ i hyere icwas mon da gbik ne ihywɛɛ mon de ifɛ teye ifas sɛ.

²⁴ Bo ɛn ishwɛɛ ifas da ne ɛTaanggbey ya kɛ ryɔng ɛli ne ɛ so wo. iShwɛɛ yɛdaa nggyɛ wo i tɔɔrek ghe ndɔ ne ishwim gbik ne ishwɛɛ ne tul le kang.

²⁵ iPhɛ ɛlɛy yang, ne ˆɛ kɔɔng ɛn irywɛɛk ga! Te ɛrɔngɔ i tɔng ɛhaa ɛcɛcɛk ɛbhɛ itin nɛ daa ɛli ne njwɛɛn so ibap ne ibek idaan nɛ.

²⁶ Wu ˆɛ kɛ te ɛn njenjek, sɔng ne ˆɛ mɔn ɛn ɛfɔt nang. Sɔng ne ˆɛ te ɛn njenjek ko iroy phyii bhɛ hooy nang.

²⁷ Sɔng ˆɛ nang ɛn ɛShɛtan ne gha ikɛk nang.

²⁸ ɛNyi gha ne ɛɛ hyel ɛyi, te ɛ kɔɔng ihyel ɛyi da te ne ɛ yaa mɔn ɛtomɛ ne ibɔ ɛbhɛ ɛli ne aa re ilong ɛbhɛ, te ɛ phyii sɛ ɛkɔn ɛli ne aa phyik ninyi nihala nɛ.

²⁹ Sɔng ivol ikpɛɛ wuru ndɔ ɛnu mon nang, yang bol ɛn ivol iywɛnɛng, ivaa ne ifɛ yaa phyik ne lɔl ninyi daa ɛkɔn na nɛ nibhɛ i tɔk. ɛLɛ wo ne ivol mon da yaa ne phyik ninaa nɛ nibhɛ i tenes nyini wo.

³⁰ Sɔng ˆɛ bees ɛn iKabyik ɛTaanggbey de irway nang. iKabyik ge ne iphɛ so ɛlamba gha daa ne mon no, ne iphɛ kɛ tɔɔrek wu ˆɛ so ɛn ninaa ɛTaanggbey ya ˆɛ hyep ɛtuk ka ne ɛTaanggbey ya sɛ phɔt nyini wo.

³¹ Hosop ɛn nyini ne irway icway da, ne njenjek ge, ne irway njɛt da, ne irywen da, ne ibees ninyi na irywɛɛk ga gbik ne waa irway da.

³² Yang yaa mɔn ɛn iyɛnɛng ndɔ mon, te ne ˆɛ san ɛn iyɔm nigwaa. Te ɛrɔngɔ hana ɛrɔngɔ nɛ ɛli ne ɛTaanggbey ya kɛ hana nyini ne wo lenɛ ne ɛKiriti gha.