iFisus 3 - ɛWee ne ìTsɛm iHywas

ɛTomɛ ɛBulus ndɔ Ninaa nɛ Nibhɛ Sang So niYahodawa

¹ ɛKɔn nɛghaa wo bhɛ kɛ te mee ɛBulus sa, nzo ne nyang, ɛlɔ ɛYɛso ɛKiriti te iphɛ phyik nyini, nyinɛn no ne ɛ sang so ɛn niYahodawa. Nzi ne bol ne ɛTaanggbey ya daa ne ito mon de.

² ɛTsak, ˆɛ kɛ phok ɛn wu ɛTaanggbey ya ndɔ ne izɛɛng ɛbhɛ de kɛ nang me ɛtomɛ yɛghaa wo te iphɛ phyik nyini,

³ kaabi ɛTaanggbey ya kɛ phaal me ɛkɔn ɛbhɛ ne ɛ so gying, ɛ tɔɔl me ɛli ne nggɛ ne ma ku haal ncɛt to.

⁴ Yaa ne sɛ ˆɛ kɛ tɔng ɛn ɛkɔn na ne nggɛ haa wo, ˆaa ne seng ɛn ɛkɔn na ne nzi yɛɛ daa ɛkɔn ɛgying ɛKiriti gha.

⁵ Ne ile de, sɔng ɛTaanggbey ya kaa ku tɔng niten nisii ibol lɛdee wo nang. ɛLyilyɛghaa wo, ne lenɛ ne iKabyik ɛbhɛ, ɛ kɛ ne phaal ninabawa nɛ gbik nɛ ninɔn ne tom mɛ nɛ nibhɛ so kang.

⁶ ɛKɔn ɛgying ɛTaanggbey ya so ɛlɛ, te lenɛ ne iBol iYɛnɛng ɛYɛso ɛKiriti de, tɛ ninaa nɛ nibhɛ sang so niYahodawa na teye ninaa ne re isha ɛTaanggbey de gbik nɛ niYahodawa na. Nibhɛ teye ibap ne ibek idaan nɛ, nibhɛ sɛ ihop ndɔ ɛkɔn na ne ɛTaanggbey ya kɛ sim-mɛ lenɛ ne ɛKiriti gha.

⁷ Kɛ ne nang me ɛtomɛ ne sanga iBol iYɛnɛng ngɛdee wo lenɛ ne izɛɛng ɛTaanggbey, ne ɛTaanggbey ya kɛ nang me daa ne mɔn ɛtomɛ ne ihwet ɛbhɛ.

⁸ Gbik ɛli ne mee nggɛ taasek n shɛs ndɔ ninyi ɛTaanggbey ya, ɛTaanggbey ya kɛ ne nang me izɛɛng ne sanga iBol iYɛnɛng ngɛdee wo ndɔ ninaa nɛ nibhɛ sang so niYahodawa na, ibol ɛwɛng ne ɛ sang ɛgak ne i sɛ lenɛ ne ɛYɛso ɛKiriti.

⁹ Te n da phaal ninyi na nɛ gbik icwas ne ibol igying ɛTaanggbey de, idee ne iphɛ ku so igying izam-izam be. iBol igying ɛTaanggbey de ne ɛbhɛ ɛ kɛ ryɔng nikɔn na gbik ko.

¹⁰ iCwas ɛbhɛ da kaa so wu te lenɛ ne idira ninaa ne roos de ɛlyilyɛghaa wo, tɛ nigɔm gbik nɛ ninaa ne igbɔm ɛzay ɛdaa ne irywa na mɛmɛ ne ntsɛntsɛng ɛTaanggbey de hywee-hywee.

¹¹ ɛTaanggbey ya kaa mɔn ɛlɛ wo lenɛ ne icwas ɛbhɛ ne ɛ kaa ku bok, ne ɛ kɛ shwaak ifɛ ndɔ ɛDaray njwɛɛn ɛYɛso ɛKiriti gha.

¹² Kɛ lenɛ ne ìtsɛm be ne njwɛɛn bok ne ɛKiriti gha, gbik ne ìnang ne itin de ne ɛbhɛ wo, njwɛɛn i ne phɛ ɛnu ɛyisɛ ɛTaanggbey ya tɔrɔk wɛlɛng ɛnik.

¹³ iPhɛ ɛlɛy, nzi ne roro ne nyinɛn, sɔng ˆɛ te ɛn kyɔkyɔt daa ne nggbang ngga ne nzi sɔ ɛlɔ mon na nang. Nggbang nge da so te iphɛ phyik nyini.

ɛBulus sa kɛ Boote ne ɛTaanggbey daa Ninyi ne iFisus

¹⁴ ɛKɔn nɛghaa wo ɛbhɛ kɛ te nggɛ te ne irwa-nggburuk ɛnu ɛyisɛ ɛTaa gha.

¹⁵ ɛTaa gha ne kɛ lenɛ ne ɛbhɛ icwaang ɛdaa ne irywa wo gbik icwaang ɛzay yo sɛ irywɛɛk nibhɛ wo.

¹⁶ Nzi bol ne ɛTaanggbey ya wu te ɛ nang nyini ìnang ne ito-ndiinday ɛbhɛ ne iphɛ sang ɛgak, te ɛ te nyini itsɔngɔl gɛgɛy ne ihwet ɛbhɛ te ˆɛ yɛk ɛn irywa nviit lenɛ ne iKabyik ɛbhɛ.

¹⁷ Te ɛKiriti gha shɛɛ ndɔ ne irway mon lenɛ ne ìnang ne itin. Nzi ne bol ne ɛTaanggbey ya te ˆɛ see ɛn iling kyukyum ndɔ ne ishwim,

¹⁸ te nyinɛn no gbik nɛ ninyi ɛTaanggbey ya ˆɛ sɛ ɛn ito ne seng ibɛrɛdɛng, ne ndaalang, ne iganga gbik ne ikyukyum ne ishwim ɛKiriti da.

¹⁹ Te ˆɛ ta seng ɛn ishwim ɛKiriti da ne ifɛ phyin nikɔn na ne ishweng ngga gbik ko te ˆɛ te ɛn hyɔrɔ ne ihyɔrɔ ɛTaanggbey de.

²⁰ Te nang ɛTaanggbey ye ne ndiinday, ɛhaa ne ihwet ɛbhɛ i mɔn ɛtomɛ ndɔ njwɛɛn iphɛ te njwɛɛn mɔn nikɔn na nɛ nibhɛ phyin ɛli ne njwɛɛn kɛ phom gbik nɛ ninaa ne njwɛɛn i tas.

²¹ Te nang ɛbhɛ ne ndiinday de ndɔ ne idira ninaa ne roos de gbik ne ndɔ ɛYɛso ɛKiriti gha ne ᐩizam be gbik, ne ishay-ishay! Ɛɛy.