iFisus 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus ne ɛ so ɛNgɔn ne tom ɛYɛso ɛKiriti lenɛ ne icwas ɛTaanggbey. ɛbhɛ phɛɛs ɛlɔ ninyi ɛTaanggbey ne iFisus nɛ nibhɛ so sɛ kyinak daa ne ibol nibhɛ daa ne ibol ne roos ɛYɛso ɛKiriti ye.

² Te ɛTaanggbey ne ɛ soye ɛTaa njwɛɛn ne ɛDaray ɛYɛso ɛKiriti nang nyini izɛɛng gbik ne irway ne laal.

Niwɛng ne iKabyik ne ɛYɛso kɛ Nang

³ Te dɛp ɛTaanggbey ye ne ɛ soye ɛKyɛɛ ɛDaray njwɛɛn ɛYɛso ɛKiriti. Te dɛp ɛbhɛ wo daa ɛli ne ɛ kɛ nang njwɛɛn gbik Niwɛng ne iKabyik nɛ nibhɛ so ne igbɔm ɛzay ɛdaa ne irywa lenɛ ne ɛYɛso ɛKiriti gha.

⁴ Ɛbhɛ kaa kasa njwɛɛn lenɛ ne ɛYɛso ɛKiriti. Ɛ kaa ne kasa njwɛɛn no ɛli ne kaa tang tum ɛzay ya wu te njwɛɛn tul en kang, wɛlɛng ɛkɔn ne tok. Kaa ne lenɛ ne ishwim ne ɛ bok ne njwɛɛn,

⁵ ɛTaanggbey ya ne ku kasa njwɛɛn nten nɛ tɔ te njwɛɛn teye ninɔn ɛbhɛ lenɛ ne ɛYɛso ɛKiriti gha. Ɛ kaa ne mɔn ɛlɛ wo lenɛ ne icwas ne izɛɛng ɛbhɛ.

⁶ Ɛ kɛ mɔn ɛlɛ wo te njwɛɛn dɛp ito-ndiinday ne izɛɛng ɛbhɛ ne ɛ kɛ nang njwɛɛn walala lenɛ ne ɛNgɔn ɛbhɛ ne ɛ sim.

⁷ Kɛ lenɛ nɛ neyi ɛKiriti na ne ɛ kɛ lok ne i say njwɛɛn, kaabi i hana ɛfɔt njwɛɛn no lenɛ ne izɛɛng ɛbhɛ ne ihywɛ so gbogbom.

⁸ iZɛɛng ngɛdee wo ne ɛ kɛ nang njwɛɛn walala ndɔ ne ntsɛntsɛng ne iseng ɛbhɛ ne ifɛ sang ɛgak.

⁹ ɛTaanggbey ya kɛ yɛk ngɛ njwɛɛn seng ɛduk ne icwas ɛbhɛ daa ɛkɔn na ne aa mɔn, ɛhaa ne ɛ kɛ ryɔng ɛ shwaak lenɛ ne ɛKiriti gha.

¹⁰ iCwas ɛbhɛ da so ɛlɛ, sɛ́ sɛ nten nɛ kɛ shwaak ghe, ɛ sɛ ne byingis nikɔn na gbik ndɔ ne igbɔm ɛKiriti ba, kaabi nikɔn ɛdaa ne irywa na nɛ ninaa ndɔ ɛzay ya gbik.

¹¹ Ndɔ ɛKiriti gha ne kɛ kasa njwɛɛn nɛ te njwɛɛn teye ninyi ɛTaanggbey ya. Kaa ne ku kasa njwɛɛn no lenɛ ne iyɔngɔ ɛbhɛ, ɛbhɛ wo ne ɛɛ mɔn nikɔn na gbik ɛli ne icwas ɛbhɛ da so wo.

¹² Ɛ kɛ kasa njwii wo te njwit niYahodawa na ne njwi kɛ tsa njwi yɛk ne irway da daa ɛKiriti gha, shɛɛ ishwɛɛ ne dɛp ito-ndiinday ɛbhɛ.

¹³ Kɛ lenɛ ne ɛKiriti gha, nyinɛn no ne hame ˆɛ so ɛn niYahodawa na, ˆɛ kɛ ne phok ɛn ibol ne itin de, kaabi iBol iYɛnɛng ne iphɔrɔt da. Nten de ne ˆɛ kaa nang ɛn ne itin nɛ ne ɛYɛso gha, ɛTaanggbey ya ne nang nyini iKabyik ɛbhɛ ɛli ne ɛ kaa ku sim nyini nɛ aa mɔn no. iPhɛ yaa ne teye ɛlamba ne ishɛɛda wu ɛ so ɛn ninaa ɛbhɛ.

¹⁴ iKabyik ɛTaanggbey iphɛ phɛ kɛ tɔɔrek njwɛɛn ncɛncɛng wu ɛTaanggbey ya sɛ nang njwɛɛn isha de ne ɛ kɛ ku sim-mɛ wo, isha de ne ihywɛ sɛ teye izee njwɛɛn nten de ne ɛ sɛ phɔt ninaa nɛ nibhɛ so ninaa ɛbhɛ na. Ɛ kɛ mɔn ɛlɛ wo te ɛ say idɛp gbik ne ito-ndiinday.

ɛBulus kɛ Boote ne ɛTaanggbey

¹⁵ iPhɛ phɛ kɛ te, nten de ne nggaa phok ibol ne ìnang ne itin mon de ndɔ ɛDaray ɛYɛso gha gbik ne ishwim mon da daa ninyi ɛTaanggbey ya,

¹⁶ sɔng nggɛ ne kɔɔng me naas ɛTaanggbey ye irway ihwala daa mon no nang. Nzi tas ne nyinɛn gbik nten de ne nzi bol ne ɛTaanggbey ya.

¹⁷ Nzi bo wu te ɛTaanggbey ɛDaray njwɛɛn ɛYɛso ɛKiriti gha, ɛTaa ne ito-ndiinday ya nang nyini iKabyik ne ntsɛntsɛng, ɛ ta phaal nyini ito ɛbhɛ te ˆɛ seng ɛn ɛbhɛ yɛnɛng.

¹⁸ Nzi ne ta bol ne ɛTaanggbey ya wu te irwisɛ ne irway mon phaal le te ˆɛ seng ɛn ìyɛk ne irway yɛdaa wo ne ɛ kɛ yel-le nyini nɛ wo, ˆɛ ta seng ɛn iryat de ne ihywɛ so gbom ndɔ isha de ne ɛ kɛ sim ninyi ɛbhɛ na nɛ wo.

¹⁹ Nzi ta bol ne ɛTaanggbey ya wu te ˆɛ seng ɛn igbom ne ihwet ɛTaanggbey da ne sɛ sang ten ne ɛkɔn na ne ɛtomɛ gha ndɔ njwɛɛn no ne kɛ nang ne itin nɛ ne ɛbhɛ wo. iHwet tɛdaa wo ne ifɛ i mɔn ɛtomɛ gha ndɔ njwɛɛn no so ijwaan nɛ ne ivaa ɛTaanggbey da.

²⁰ iHwet tɛdaa wo ne ɛTaanggbey ya kaa mɔn ɛtomɛ ne ifɛ nten de ne ɛ kaa yiisik ɛKiriti yegha nɛ ne ikpuu da, ɛbhɛ nang ɛbhɛ ɛlɔ ne soos ɛndiinday ne iwɔ ne irwye ɛbhɛ wo ndɔ igbɔm ɛzay ɛdaa ne irywa da.

²¹ Daa ne irywa wo ne ɛDaray ya i re ne igbɔm daa nigɔm, nɛ nindiinday, ne ikpabyik, gbik nɛ ninaa ne ihwet ɛdak kɛ. Ne ɛ bok irywɛɛk ko ne ifɛ phyin irɛɛk ɛzay yɛdee wo gbik ne ɛzay ya ne ɛ yaaso wo.

²² ɛTaanggbey ya kɛ ne tek nikɔn na gbik ndɔ ne ita ɛKiriti de, ɛ ta yɛk ɛbhɛ nɛ ɛ teye ito nikɔn na gbik te ɛ re igbɔm ɛ phyik idira ninaa ne roos de.

²³ iDira ninaa ne roos de ne soye ibek ɛKiriti de. iDira ninaa ne roos de i ne te ɛKiriti yegha te hyɔrɔ ɛli ne ɛbhɛ wo ɛ kɛ shwaasek nikɔn na gbik ndɔ nilɔ na gbik ko.