iFilibi 4 - ɛWee ne ìTsɛm iHywasKyinak ɛn ne iHwet ndɔ ɛDaray 1 iPhɛ ɛlɛy, nyinɛn nigwaa nge ne nzi sim, ˆɛ so ɛn ne irway nge, nzi has irway ne yaang nyini, ɛ so ɛn irway ihwala nge gbik ne ɛkɔn ne ito ne igbɔm nge daa ɛtomɛ nge. Nzi roro ne nyinɛn, kyinak ɛn ne ihwet ndɔ ɛDaray ya, nyinɛn no ne nzi sim mo. 2 Nzi roro ne ɛYudiya gha, nzi ne ta roro ne ɛSintikyi gha, ryɔng ɛn ndɔ ɛDaray ya. 3 iGyɛ ne ɛtaay ɛtomɛ nge gha, nzi roro ne igyɛ, phyik nikuk kɛnaa wo daa ɛli ne nɛ nibhɛ kɛ tak iyɔm ɛtomɛ ne mee ndɔ sanga ibol iyɛnɛng ngge. ɛLɛy ne ɛKɛlɛmɛn ne ɛbyin nitaay ɛtomɛ nge gha ninaa ne irɛɛk nibhɛ so ndɔ ne ɛWee ne iKen no. 4 Yɛk ɛn irway ihwala cɛcɛɛy ndɔ ne ìtsɛm mon de ne ɛDaray ya. Nzi ne ta bo, yɛk ɛn irway ihwala! 5 Te ilyaak mon de teye ɛkɔn ne yaang ɛlɔ ninyi gbik. Seng ɛn, ɛDaray ya yek cɛcɛk. 6 Sɔng ˆɛ sap ɛn ɛkɔn nang. Yang mɔng ɛn ɛTaanggbey yegha gbik nikɔn na ne ˆɛ sim ɛn ndɔ ne ibol ne ɛbhɛ, roo ɛn ɛbhɛ ne irway ihwala. 7 Yaa ne lenɛ ɛlɛ wo ɛTaanggbey ya ne nang nyini irway ne laal ɛbhɛ ne ifɛ phyin icwas ɛten ɛsii gbik. iPhɛ yaa ne boos irway mon ne icwas mon ndɔ ɛYɛso ɛKiriti gha. 8 ɛTsim mɛ gbik nigwaa nge, te icwas mon da kyii daa ɛkɔn na ne ɛ so itin, ne ɛkɔn na ne ɛ kɛ hɔn sɛ nang ɛbhɛ ne ndiinday, ne ɛkɔn na ne ɛ sɛ so kancɛng, ne ɛkɔn na ne ɛ so wɛwɛy, ne ɛkɔn na ne ɛ yɛɛs ne ishwim, ne ɛkɔn na ne ɛ kɛ jam wɛɛ. Wu ɛdɛ ɛkɔn na sonɛ ne ɛ kɛ jam ɛ shɛs, ne ɛhaa ne ɛ kɛ hɔn idɛp, te icwas mon da ne kyii ne ɛdak kɛ. 9 Gbik ɛkɔn na ne ˆɛ kɛ mɛmɛ ɛn nɛ ɛlɔ nge gha, ne ɛhaa ne ˆɛ kɛ say ɛn ɛlɔ nge gha, ne ɛhaa ne ˆɛ kɛ phok ɛn ɛlɔ nge gha gbik ne ɛhaa ne ˆɛ kɛ yaang ɛn ɛlɔ nge gha, mɔn ɛn nibhɛ. ɛTaanggbey ne irway ne laal da yaa ne shɛɛ ne nyinɛn. iRway iHwala daa ne ìNang 10 N bok irway ihwala ne ɛDaray ya gbom, daa ɛli ne ˆɛ kɛ kyi ta taate ɛn ne mee wo. Nzi yɛɛ ˆɛ ku tas ɛn ne mee, sɔng ˆɛ kɛ ne ku sɛ ɛn ɛnkiinɛ yɛ ne ˆaa tɔɔrek ɛn mɛɛn nang. 11 Sɔng nzi bo wu nggɛ wɔs ɛkɔn nang. Nggɛ ku mɛmɛ nɛ nggɛ seng ngɛ ɛli ne naa shɛɛ ne irway ne laal ndɔ ne ishwɛɛ da ne nggɛ sɛ ito nge nɛ. 12 Nzi yɛɛ ɛli isang ɛkɔn na so, nzi ne yɛɛ ɛli ne ibok ɛkɔn de so. Nggɛ ku mɛmɛ nɛ nggɛ seng ɛli ne naa shɛɛ ndɔ ne bok ɛkɔn na ne sang ɛkɔn na. Nzɛɛ yɛɛ ne shɛɛ ndɔ ne ikpyak ne n da yɛɛ ne shɛɛ ndɔ ishwighi. Nzɛ ne yɛɛ ne shɛɛ ndɔ ne ihala, ne n da yɛɛ ne shɛɛ ndɔ ne iryat. 13 Nzɛ yɛɛ ne shɛɛ ishwɛɛ da ne nggɛ sɛ ito nge nɛ daa ɛli ne ɛKiriti gha ɛbhɛ ɛ naas me ihwet tɛ. 14 Gbik ne phɛ ɛlɛy, iphɛ kɛ ne jam mɛ ne ˆɛ kɛ phyik ɛn mɛɛn nten de ne ngga so ndɔ ne nggbang ngga. 15 Nyinɛn ninyi ne iFilibi na, ˆɛ yɛɛ ɛn ɛli ne nggaa tsa ɛtomɛ ne sanga iBol iYɛnɛng ngge nten de ne nggaa tek ivel ne iMakyidɔniya da, sɔng idɛ idira ninaa ne roos de kaa phyik me kang ne nyinɛn no nang. 16 ɛLi ne ngga ne ta so ne iTasɔlɔnika, ˆɛ kaa ne ta phyighis ɛn mɛɛn nɛ nikɔn na ne nzi tɔk nten de kang-ka-kang. 17 Sɔng nzi bo nzi tɔk ɛkɔn ɛlɔ mon na nang. Kwa! Nzi yang sim te ɛco nikɔn na ne ˆɛ mɔn ɛn mɛɛn nɛ wo sɛ ku i hanas se nɛ. 18 Kɛ tal me nikɔn na gbik nibhɛ ne phyin igbak. Sɔng n da sang ɛkɔn ɛlyilyɛghaa wo nang, daa ɛli ne nggɛ say nikɔn na ne ˆɛ kɛ tom ɛn ɛBafaratus segha nɛ wo. ìNang ngɛdaa wo ne bok ɛnkyinkyɔp, iphɛ so te ihap itsanga, ɛTaanggbey yaa ne say, ɛ phok iyɛnɛng ngɛ. 19 ɛTaanggbey ya ne nzi re ɛbhɛ ntsong ngga yaa ne nang nyini gbik nikɔn na ne ˆɛ tɔk ɛn ndɔ ne iryat ne ito-ndiinday ɛbhɛ ne ihywɛ le ɛlɔ ɛYɛso ɛKiriti. 20 Te ne nang ɛTaanggbey njwɛɛn na ne ɛKyɛɛ njwɛɛn na ne ndiinday ne ishay-ishay. Ɛɛy. Kyili ne Taal lɛ 21 Kyili ɛn mɛɛn ninyi ɛTaanggbey nɛ nibhɛ soye ninaa ɛYɛso ɛKiriti na gbik. Nigwaa na nɛ nibhɛ so ɛbɛ wo ne mee wo i kyiisi nyini. 22 Gbik ninyi ɛTaanggbey ya i kyiisi nyini, yang ji so ninaa nɛ nibhɛ so ne ijwee ɛgɔm ɛKɛɛsat ta. 23 Te izɛɛng ɛDaray ɛYɛso ɛKiriti de shɛɛ ndɔ ne irway mon. Ɛɛy. |
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
Nigeria Bible Translation Trust